الموضوع: ترصيص لجين 2 بعد فك الكاوتش ليتم لحامه و تجربة النيتروجين

السلام عليكم أخواني الكرام أصحاب الجين 2 و أصحاب السيارات الآخرى

اللي حصل كالتالي :

العربية في العجلة الامامية يسار كانت مخرومة خرم صغير بيسرب الهوا على مدار يومين أو 3 و ضغط الكاوتش كان بينقص في اليومين دول .
المهم رحت محل كاوتش محترم في 6 أكتوبر (موزع لبريدجستون عند أرامكس كدا )
العامل كان سوري الجنسية و مؤدب جدا و بيشتغل من غير كلام كتير و من غير رغي . (الله يكون في عونهم )

الراجل فك العجلة كلها علشان يلحمها لحام داخلي (وياريتني كنت خليته يعمله خبور )

فك العجلة و لحم الخرم و كله تمام
قلتله أملالي بقى بقية الكاوتش نيتروجين ...... المهم راح مفضي العجل كله و بعدين ملى الكاوتش كله نيتروجين .

و حاسبت و مشيت
لما طلعت على الطريق السريع ........ أكتشفت أني عندي رجة في الدريكسيون و بتزيد مع السرعة
المهم بتظهر قوي لما أوصل ل 110 (طبعا أنا كنت بزود سرعة علشان أجرب و أشوف الموضوع واصل لغاية فين)

سافرت بها و رجعت ....... و رحت بردجستون نفسه (بجوار مسجد الحصري )

عملت ترصيص و الرجة راحت تماما (أنا جربت لغاية 130 بس ) انا أصلا مش بعلى بالسرعة أعلى من 100 في أغلب الأوقات .

طيب أنا عملت قبل كدا خوابير و عمري ما أحتجت موضوع الترصيص ده
فك الكاوتش من الجنط هو السبب طبعا و ده كلفني زيادة 20 جنيه للفردة ثمن الترصيص في بردجستون .

أنا عملت قبل كدا خوابير و كمان في العجل الأمامي و حاسس أنه مش فرق كبير بينه و بين اللحام الداخلي

النصيحة بقى
لو فكت العجلة و الكاوتش تم تفريغه من الهوا ........ لازم تعمل ترصيص .

==============================

تجربتي مع النيتروجين
الحاجة الوحيدة الفارقة في الموضوع
ثبات الضغط الخاص بالكاوتش .......... و ده ممتاز لأنه بيزود الثبات (لأن الضغط متساوي في الأربع عجلات)
ثانيا بيظبط أستهلاك البنزين

==============================

تقييمي لبردجستون
الموزع اللي عند أرامكس ............. خدمة ممتازة و سريعة .
بردجستون الأصلي اللي عند الحصري .......... خدمة ممتازة و أضطرت أستنى دوري علشان كان فيه عربيتين قبلي .

مع تحياتي للجميع و يارب الخير لمصر و المصريين جميعا .

المشاركة الأصلية كتبت بواسطة d . A .\ ayman

الف شكر على المشاركة ياباشا

العفو يا باشا .

أنا فعلا فكيت وركبت قبل كدة من غير ما احتاج ترصيص بعدها ... بس يركب الكاوتش على الجنط من غير ما يتلف منه ولا كدة ولا كدة


عموما أحسن إنك رصصت تاني لأن برضه وزن اللحام بيفرق في العجلة من غير ما يبان .. ولو إنه مش مستاهل الفرق ده في الفلوس بس صبر نفسك بكدة :) :copy of m-s5:

هو انت عندك لسة مركب الكاوتش بتاعها الجوديير ولا غيرته ... ولو هو عامل معاك إيه في الفرامل؟

عشان عندي ابتدى يزحلق من بعد الـ 25 ألف كيلو جامد ... حتى في الملفات .. عملها معايا مرة .. بصراحة بقيت أعلمه حساب وأنا ماشي لغاية ما أغيره بإذن الله

أنا بصراحة مش مبسوط قوي من الكاوتش .. حاسس برضه أنه مش حلو في الفرامل .
لسة للآسف ماشي عليه

هاغيره بإذن الله بحاجة حلوة و قوية في الفرامل ,

نزلت سألت على البردجستون . تورانزا ....... الفردة عاملة 610 جنيه . مش فاكر الموديل طبعا و نسيت أصور النقشة و لكن فيها موديلات تاني أعلى في السعر .