الاخ الكريم محمد هانى والاخ الكريم ياسر
الحمد لله اخلاقكم الكريمه حلت الموضوع بس خلونى احل اللبس شويه انا متأكد انك اخدت على خاطرك لانك ما قابلتش الاخ العزيز محمد هانى لانك لو قابلته مش هاتزعل منه خالص وهاتعرف انه شاب فى منتهى الظرف و اللطف و مش من الشباب الى بيخبط من تحت لتحت بالعكس انا باحس فرحته بالعربيه زى فرحة طفل صغير ودى مش اساءه لانه فعلا عنده حق انا راكب العربيه وباجرى بيها احيانا قليله و برضه ركبت عربيات كتير لكن فعلا العربيه ما شاء الله تبارك الله مفيهاش غلطه و بتديلك اكتر من الى انت عايزه من كل ناحيه و اتمنى من الله ان يرزقك بها لان متعتك هاتخليك تقول اكتر من كده و ده عن تجربه
اما الاخ العزيز محمد هانى فلك منى كل التحيه على حسن تصرفك واشهد لك ان ما فهمه الاخ العزيز على انه اساءه ليس فيه اى سوء نيه فمعلش يا استاذ ياسر امسحها فيا
ندخل بقا فى الموضوع
ندخل على المهم التعديل و فيه ناس بتقول كلام تخين زى السنتر اوف جرافيتى هيتغير بتغيير الارتفاع و معتقدش ان الكلام ده صح وان صح فالنسبه لن تكون محسوسه وان تم الاحساس بها فتأثيرها مش هيكون على الثبات ولكن على استهلاك البنزين لزيادة مقاومة الهواء بدخوله تحت السياره الا ان تويوتا ما سابتش حتى النقطه دى وممكن الرجوع لفيديوهات الايرو ديناميكس بتاع العربيه لان مسارات الهواء مش بس على جسم السياره الخارجى عن طريق بروز مسارات على المرايات الجانبيه و جانب الفانوس الخلفى لا ده كمان عن طريق تصفيح اسفل السياره ومسارات الهواء تحتها وده الى ميخليش ثيات العربيه يتأثر و بالمناسبه انا سقت على سرعات عاليه جدا على تراكات فى المانيا و عملت مناورات وغرز على سرعات فوق ال ٢٣٠ كيلو يمكن مش بعربيتى التويوتا لكن انا جزبت ثباتها من اول ما اشتريتها بملف شديد جدا على ١٥٠ وانا كان معايا باسات ٢٠١٠ زيرو وبعتها بعد ٣ الاف كيلو لانها كانت تقيله اكتر من اللازم واستهلاكها فى الوقود عالى نسبيا خصوصا فى الجرى
ميزتين للتويوتا جديدتين
استهلاك البنزين مع الجرى اقل من استهلاك البنزين فى الزحمه الشديده و ده عن تجارب عديده
تانى حاجه ودى مهمه جدا انا اساسا من هواة المانيوال وباكره الاوتوماتيك لان استجابته ابطأ فى التسارع والمدهش مع الجير الجديد ال cvt ان المانيوال مود فيه استجابته احسن بكتير واسرع من الجير المانيوال طبعا هاسمع كلام عن السبورت مود انا مش معجب بيه و شايف انه بيديك صوت للجرى اكتر ما بيديك سرعه ولا يقارن بالمانيوال مود من ناحية الاستجابه
نقطه اخيره للحفاظ على الجير لما تيجى تركن حط الفيتيس على N وبعدين ارفع فرامل اليد و سيب فرامل هتلاقى العربيه نزلت شويه بعدها ممكن تحطها على ال P بكده مش هاتحمل على الفيتيس اثناء الركن و ده هيطول عمره وفى انتظار وصول اتصال التعديل
ملحوظه اخيره انا باعتذر اذا فيه حروف طالعه غلط بس انا داخل من التليفون والكى بورد بتاعته صغيره وعلشان اعدل كلمه بعد ما اتكتبت لازم امسح جمله كامله وانا باكسل بصراحه هههههه و وصلنى ملاحظات من اخوه فى المنتدى عن الموضوع ده ويمكن ده الى خلانى مشاركاتى اقل كتير الفتره الى فاتت وان كنت باتابع المنتدى باهتمام تحياتى