اسئلة هامة بخصوص الكيا بيكانتو ٢٠١٤..ارجو الافادة

**hany_maged** · 25-05-2014 04:21 AM

السلام عليكم يا رجال الكيا...مبدئيا دي اول مشاركة ليا هنا بعد متابعه لفترة طويلة لمشاركتكم...انا بافكر اجيب عربية بيكانتو اوتوماتيك ٢٠١٤ بس حابب اسأل الاسئلة الاتيه:

١-هل العربية دي تصلح للسفر المستمر(يعني مرتين في الشهر مثلا)?
٢-اسعار قطع الغيار ايه و مدي توافرها؟
٣-سمعت ان عفشة العربية ناشفة و الكراسي غير مريحة في المشاوير الطويله..هل الكلام ده صحيح؟
٤-اجيب خليجي وللا وكيل؟انا قلقان من الخليجي بصراحة و حوار الضمان ده
٥-ترشيحاتكم ايه بالنسبة للمعرض اللي هاشتري منه مع العلم انني هاشتري قسط

**svneleven** · 25-05-2014 06:06 AM

أنا معايه العربية موديل 2013.
بخصوص السفر طبعا تصلح للسفر و بتمشي حلو جدا لحد 140 تحس أنك متحكم فيها. العربية موتورها مناسب لحجمها جدا. العربية اعتمادية من الدرجة الأولي.
قطع الغيار ما اتعاملتش معاها الحمد لله لكن أظنها غالية شوية علي ما سمعت. موجودة عند كل بتوع الكوري.
أنا معايا خليجي و الحمد لله لحد النهاردة تمام لكن فيه ناس ممكن يحصلها مشكلة و تقول يا ريتني كنت جبت وكيل و فيه ناس جابت وكيل و حصل مشاكل و التوكيل نفضلهم. أنا رأيي اتوكل و هات خليجي و ان شاء الله خير.
أنا جبت من المصرية لكن الصراحة بيغيرو كلامهم كذا مرة و المندوب اللي رخصلي تبعم تحس أنه صايع كده مش شخص نضيف و قعد يفاصل في الاكرامية اللي اديتهالو.
جبت قبل كده الانترا من أباظة و كانو محترمين فوق الوصف و سمير ريان بردو جبنا منه بيكانتو 2011و كانو محترمين جدا بردو.
أتمني أكون أفدتك و بالتوفيق.

**hany_maged** · 25-05-2014 06:18 AM

SVNeleven...انا متشكر جدا جدا جدا لردك الاكثر من رائع ...انت جبتلي من الاخر..دعواتك ليا بقي لانني بقالي فترة من غير عربية :)

**hany_maged** · 25-05-2014 10:30 PM

ايه يا رجالة الكيا محدش عايز يقول حاجة تانيه عن البيكانتو ٢٠١٤ اوتوماتيك؟؟؟؟؟؟؟

**eslamsubaru** · 26-05-2014 03:48 PM

انا معايا 2013 اوتوماتيك من التوكيل ..

العربية جميلة جدا ناعمة و القعدة الأمامية مريحة الكنبة الخلفية اللى بتقعد مستقيم فيها فممكن مع المشاوير الطويلة اللى قاعد ورا يتعب.. الشنطة طبعا صغيرة مش لشيل شنط كتير .. انما لو الكنبة الخلفية اتقفلت هتديك وسع كتييير للشنطة .

العربية مع السفر مريحة , طبعا مش ثابتة قوى خصوصا فوق ال 110 .. ممكن انا حاسس بكده علشان معايا سوبارو فطبعا فرق الثبات مخلينى احس بيها كده ..

قطع الغيار شوف الموضوع ده فيه اسعار قطع غيارها :
http://www.nilemotors.net/Nile/419046-2013.html

بالنسبة لموضوع الضمان مع احترامى لجميع الأراء : ضمان الوكيل افضل شئ . و عمرهم ما قصروا مع حد كل اللى ممكن يكون حصل مماطلة لمعرفة السبب و الاعتراف بيه انما فالأخر بتاخد حقك ..
الضمان بتاع الخليجى كل الشركات اللى بتضمنك بتديك ضمان على الموتور فقط و مفيش حاجة ثانية نهائى و ناس كتير حصلها مشاكل كهربائية و مشاكل بالفوانيس و الفتيس و طبعا انسى .

انا رأى انك مش هتدفع دم قلبك فى عربية علشان فالأخر مبقاش ضامنها .. اه الخليجى اوبشن اكتر بس مش مضمون.

موضوع التقسيط فيه تقسيط عن طريق التوكيل نفسه و ده مريح ..

و ربنا يوفقك ..