الموضوع: زيت فتيس كوردوبا 2006 اتوماتيك

المشاركة الأصلية كتبت بواسطة a_7akam

بص ياباشا المهندس إيهاب كان لسة قايلي عن موضوع لون الزيت ده أنه مش مقياس. وعمتا لو انت الفتيس بتاعك نفس نوع الفتيس اللي عندي يبقى خلاص كده الزيت واحد وبعد البحث الكتير ونزلت سألت تاجر فولكس وكمان مركز خاص بسيارات فولكس لقيت الزيت الموصى به لونه أحمر وده اللي شوفت نوعين منه عند التاجر الأصلي عليه علامات مجموعة فولكس والغريب اني لقيته صنع في اليابان والثاني الفيبا وده ألماني طبعا واللي اتنين زي بعض تمام في اللون .
وكمان لما سألت مركز صيانه نصحني بزيت وولف wolf وشكر فيه جداً وقالي انه هوه حاطه في عريبته شخصياً وهيه جيتا jetta بس طبعا لما لقيت الناس اللي جربت الوولفر شكرت فيه وقالت انه افضل كمان من الولف فقررت اني أجرب وربنا يسترها إن شاء الله .
وفي ملحوظة اللي مركز الخدمة قالي إن الولف ممكن يفضل معاك لحد 40000 وده طبعا أقل من الزيت الأصلي اللي بفضل لحد 60000 بس كمان قالي انه افضل من الفيبا فمش عارف كده يبقى الفيبا ممكن يفضل قد ايه .
ده اللي اقدر افيدك بيه لحد دلوقتي . وإن شاء الله لحد ما الموضوع ينتهي واغير الزيت هبقى أعمل تقرير عن التجربة ديه واشرح فيها كل حاجة.
تحياتي

اشكرك شكرا جزيلا انا كنت مخنوق من الموضوع ده لان العربيه ماشية 160 دلوقتى ومتغيرش خالص وناقص ومش عارف اعمل ايه. طب بالنسبة للفلتر بتاع الفتيس متعرفش بكام ؟ ولو غيرت الفلتر الفتيس هياخد كام لتر

مش ده نفس شكل الفتيس بتاعك
http://www.parts-specs.com/photos/05...rence-2006.jpg

السلام عليكم, أنا أسف انى جيت متأخر, أعتقد انا ممكن أفيدكم شوية
أنا معايا ابيزا 2006 بقالى 7 شهور, اوتوماتيك 4 غيار, نفس الفتيس بتاعكم بالظبط وتقريبا نفس الموتور ال 16 فالف 75 حصان bky, عربية ما شاء الله جميلة, ولكن فعلا تعبت من قله معرفة الصنايعية بيها والتوكيل بتاعها ردىء الى أبعد الحدود
وابتديت أفكر فعليا انى ابيعها واجيب زيرو
العربية ماشية 80 الف, ومعايا انا مشيت حوالى الفين كمان, ومريت بنفس المرار الطافح انى احاول افهم زيت الفتيس صيانته ازاى, صاحبها القديم كان مهمل جدا ومغيروش طوال ال 80 الف كيلو
سألت الصنايعيه, فتى بقى, واحد يقولك غيره, واحد يقلك الزيت الفبريكه مايتغيرش, واحد يقلك زوده, وناس قالولى لو غيرته هايصفر, وناس بتقول غيره كله بالفيلتر, وطبعا التوكيل هايقلك الرأى الأخير, بس على ضمانتك

من أسبوعين بالظبط, فتحت الطبه, الزيت ماشاء الله نزل أسود وخفيف زى الميه, نزل قد كوبايه بالظبط, واعتقد ان كان فى زيت تانى جوه الفتيس نفسه, كان لازم استنى ساعة مثلا عشان ينزل
المهم, روحت جبت 4 ليتر زيت موبيل atf احمر, الناس المحترمة العباقرة بيسموه زيت باور, ولو قلتله atf دى مش هايعرفه, ب 55 جنيه الليتر
الزيت بتاع التوكيل بيبيع الليتر ب 200 جنيه, فى 5 ليتر, الف جنيه, الفتيس كله فى الحرفيين استيراد, ب 2000 جنيه
الفيبى اعتقد ب 100 جنيه او اقل, وفى حاجات تانيه كتير والسوق مليان نصب وفتى وقلة أدب
خليك فى نوع موثوق منه من مكان محترم

الفتيس مالوش مقاس, بتفك المصفحة من تحت, وبتلاقى الطبه رأسية بتفتحها بتنزل الزيت, المفروض يعنى ان فيلتر الزيت "بيسموها المصفاه" فوق الطبه دى, عريضه كده, وبحوالى 270 - 300 جنيه عند فتح الباب - التوفيقية
الزيت بقه نفسه بيتزود من فتحه فوق الفتيس (يمين الموتور) أفقيه عليها طبه بردو, هتحتاج قمع وخرطوم حوالى 50 - 60 سنتى متر كده
الفتيس عندى أخد 3 ليتر وشيلت ليتر
فى أعتقادى الشخصى, اللى أنا عملته ده ولا فرق فى حاجة, نفس صوت الفتيس ونفس النقلات ونفس الأداء, بتحس بالنقله شوية اول مرة وانت لسه طالع بالعربية, بعدين نعومة, التانى محسوس شوية, التالت ناعم, الرابع مش محسوس اطلاقا
جايز مافيش فرق أداء, بس هايحمى الفتيس, او هيبوظه
عامة, حبيت أنقل تجربتى, واتمنى لو صاحب الموضوع يبعتلى رقم موبايله عشان اسأله على حاجات فى العربية والصنايعيه, وربنا يوفق الجميع

التوكيل قالولى انه زيت أحمر, وكل الزيوت اللى شوفتها مناسبة للفتيس ده كانت الحمرا مش البيضه, و الزيت اللى نزل كان بنى محروق مش شفاف, الله أعلم الصراحة, دى من أكتر الحاجات المحبطة فى العربية دى, التوهان ده