بص يا باشا
أنا معرفش موضوع المكنه اللى فى البنزينه بس موضوع غسيل الريداتير سهل
أنا جربت أروح لمتخصص ريداتير, و كان شغله كويس, و فيه ميزة أنه بيسلك المواسير اللى جوه الريداتير بمياه نار مخففه و لو فيه إخرام أو تسريب بيلحمه طبعاً الكلام ده مش فى البنزينه.

بعد كده بقيت بسلك الريداتير بنفسى:
1- أفك الخرطوم اللى فوق الدينامو (و أغطى الدينامو بكيس بلاستيك كويس) أو تفك الطبه اللى تحت الريداتير (لو عرفت توصل لها), و تفضى شوية مياة بتاع لترين, و تربط تانى
2- بعد ككده تجيب زجاجتين خل طعام (بتاع السلطه ده) و تحطه فى الريداتير و القربه و تمشيلك بيه يومين
طبعاً الخل هيلف مع المياه و يسلك المجارى بتاعة الريداتير و البلوك و يشيل الأملاح المتراكمه كلها
(فيه ناس بتحط جاز مع الخل علشان يلين طرمبة المياة و برضه مزيل للصدأ)
3- بعد يومين: تجيب خرطوم مياة أو زجاجات / جراكن مياه (مصدر للمياه و خلاص)
4- مفك عادة و كام كولية (أفيز) حسب قطر الخراطيم اللى عندك, و ممكن تحتاج بكرة تافلون من عند محلات السباكه
5- هتفك الخرطوم الكبير اللى داخل من المكنه على الريداتير من فوق و تفك غطا الريداتير و تحط مياه عادية خالص (مياة حنفية) باستمرار - سواء بخرطوم المياة او الزجاجات - داخل الريداتير, و سيبها شوية تنزل كل اللى جوه لحد المياه اللى بتطلع من الخرطوم تبقى بيضاء
6- اربط الخرطوم اللى فوق تانى( و يفضل تلف لفتين تافلون على مكان تركيب الخرطوم قبل التركيب و تغير الكوليه لو محتاج)
7- فك الخرطوم اللى فوق الدينامو أو الطبه اللى تحت الريداتير و فضى المياه كلها
8- برضه أربط الخرطوم تانى و برضه تلف لفتين تافلون و تغير الكولية لو احتاجت, المهم تربط حلو علشان ميبقاش فيه تسريب
9- تغسل القربة من جوة و الخرطوم بتاعها غسله تمام (ممكن بمياه و صابون من الداخل و الخارج) و تربطهم مكانهم و تشد الحزام بتاع تثبيت القربه مكانها
10- تملى القربة و الريداتير مياه (مقطرة أو مياة تكييف أو خضرا بس مش الرخيصه)

و مبروك مقدماً