خد بالك ياباشا إنها بتلعب في ملعب العربيات الموفرة للوقود ومصاريف التشغيل والملعب ده الأنواع الجيدة فيه قليلة فعلا ولكن مطلوبة حاليا
يعني مثلا أنا معايا الألتو 800 سي سي ومعايا البيرسونا ... وبصراحة البيرسونا برغم متعة قيادتها إلا إن اللى نازل وسط البلد أو مكان زحمة سواء أنا أو المدام بيسيب البيرسونا وياخد الألتو لأن البيرسونا غول بنزين جنب الألتو في الزحمة والعكس صحيح تماما
يعني لما أكون مسافر وأمشي بالألتو على سرعات عالية بتعمل استهلاك بنزين أكتر من البيرسونا اللى على طريق السفر بتكون موفرة جدا واستهلاكها بيقل جدا ويكون زي الألتو في الزحمة وأكتر كمان
عشان كدة في ناس كتير جدا ممكن تفضل عربية صغيرة الحجم سواء في الموتور أو حجم الصالون نفسه لأن كل مشاويرها في وسط البلد ومالهاش في السفر لأن فرق التوفير يستاهل فعلا
المشكلة بقى إن الملعب ده مافيهوش غير السوزوكي الألتو اللى من غير كماليات ووسائل أمان كفاية ... وبعديها الماروتي اللى من غير تكييف حتى والناس ابتدت تبعد عنها للسبب ده وبصراحة تقفيلها وشكلها خلاص بقى قديم جدا ومن جوة سيئة للغاية
وبعد كدة الآي تن اللى مش ماشية أساسا في السوق
الساجا اللى كل الناس أجمعت على إن استهلاكها عالي للبنزين لأن موتورها قوي بصراحة والناس بتحب تستمتع بيه وبتحرق عليه جامد وبكدة يفقد معنى إنه موتور موفر تماما
السيريون اللى اختفت من السوق بعد ما كانت ممكن تحقق معدلات كويسة بسبب توكيلها
السويفت والسيلاريو (اللى هي أصلا الألتو) اللى برضه مالهمش نصيب بسبب توكيلهم (مع إنهم عربيات رائعة جدا)
مافيش بعد كدة بيلعب في السوق غير البيكانتو تقفيل كويس شكل كويس من برة وكويس من جوة وسعرها بعيد عن أقرب منافسيها بـ 10000 جنيه يبقى طبيعي لما الميراج والأتراج ينزلوا على إنهم ياباني يبقى ده سعرهم
عشان كدة في ناس ممكن تفضلها على عربية زي الجين 2 ... برغم إن كفاءة الجين أفضل بكتير ... لكن عنصر التوفير مع الجودة مش هايكون متوفر غير في دي
وبعدين ... في ملاحظة كمان ... هي الفيات بونتو بكام وكام سي سي ... الفئة العالية فيها بتعمل 125 ألف و 1200 سي سي برضه (على السعر القديم .. الله أعلم هاتبقى بكام بعد التوكيل الجديد) ... وده راجع لجودة التقفيل العالية جدا ووسائل الأمان المتوفرة فيها كسيارة أوروبية بمواصفات أوروبية
من الآخر مافيش عربية تسعيرها في مصر مضبوط
المفضلات