أهلاً بيك يا أستاذ عمر، و يا رب تكون تمام. اللهم صلي و سلم و بارك على حبيبك المصطفى و على آله و صحبه و سلم تسليماً كثيراً. بالنسبة لسؤال حضرتك... بإختصار كدة هما كلمتين و ماتزعلش مني. بعد تجربة مريرة و عذاب... القديم يغور! وجع قلب و مكانينكي و سمكري و بهيجي و كهربائي و اشي قطع غيار أصلي ولا مضروب و مصنعية لدة و دة و دة! و وقت ضايع و مشاوير دي عربية بقلها بتاع 30 سنة بتدحر في شوارع المحروسة مستني منها إيه بظبط؟! كتر ألف خيرها هي من وجهة نظري العربية قالت خلاص... أنا رأيي إركب عربية والدك حالياً لو مفيش إمكانية إركب مواصلات بكرامتك و كبر قرشك و إركب مواصلات و كدة مهيكونش عليك رخص و لا أي مصاريف صيانة أو بنزين أو مناديية أو أو - إنت عارف إن العربية دي ذي البيت المفتوح...، و لما أمورك المالية تتحسن جيب زيرو أو عربية بقلها سنتين تلاتة شغالة و خلاص و دة عشان تاخد خير العربية و تركب العربية و إنت مرتاح، أنا بجيب عربية عشان اركبها و مش بجيب تهمة عشان تركبني... صح؟ لو غاوي وجع قلب جيب عربية وكلاها البارومة و مش مكيفة و مش هنضحك على بعض مهما تكون العربية حالتها شغالة فهي هتطلع روحك مصاريف و جهد و وقت و حرقت دم و عمرها بردو بعض كل ده مهتزبت معك و ترجع ذي الاول. أنا بكلم حضرتك ذي أخوية و خايف عليك و على قرشك و تعبك و ربنا يعمل لحضرتك الأصلح إن شاء الله و ابقى طمنا. أخوك أحمد سامي