الموضوع: أخوكم الصغير محتاج نصيحتكم في موضوع شخصي

قبل اي شيء

معلش ايه الجملة الغريبه دي

و ثانيا دي مش هتقدر تصون بيتك

يعني بناء علي ايه هو قال كده؟

اصله لو هو صاحبك اوي و معاك علطول مش ممكن يكون شاف عليها حاجة انت متعرفهاش

مانتا اكيد عارف عنها كل حاجة زيه زيك

يبقي هو قصده ايه؟

ثانيا

انا مش باشوف ان 20 سنة سن صغير للارتباط

خصوصا انك بتقول انك بس عاوز يكون مجرد في حاجة رسمي بينكم مؤقتا لحد ما تخلص دوامة الجيش و الخ الخ

يعني قدامكو وقت لحد ما تتجوزو

انا شخصيا بافضل اوي السن الصغير للجواز

لانه بيبعد الشاب و البنت عن اي معصية و بيخليهم يبدأو حياتهم مع بعض من بدري

اصلي بصراحة مبحبش جملة (عيش حياتك) دي خالص

حياة ايه اللي هيعيشها

هو ليه الناس مصورة الجواز علي انه حبل رابط الراجل و مكتفه بالمنظر ده؟

ما ممكن يتجوز و يعيش حياته مع مراته و يتفسحو و ينبسطو و يقضو احلي ايام مع بعض

و يبقي برضه في وقت لاصحابه و لاهله و لخروجاته و كل حاجة

ده شيء طبيعي جدا و اي زوجة عاقله هتتفهم ده كويس جدا و هتفهم ان التحكمات الفارغة مش من مصلحتها هي قبل اي حد

ثالثا

شوف انت بتحبها ليه اصلا

يعني هل انت فعلا فعلا بتحبها و مش قادر تعيش من غيرها و لا هي مجرد حد قريب منك اوي بتحب تحكيله و بتستريحله و بتلاقيه فيه الصدر الحنين

علي فكرة مفيش اي مشاكل لو انت بس بترتاحلها و بتحترمها

لانه مادام اخلاقها كويسة و هي متربيه و متدينة يبقي عادي برضه انك تتقدملها و تخطبها !!!!

لاني باشوف ان الراحة و الاحترام و التفاهم دول اساس اي علاقه ناجحة

المهم بس عشان متبوظش علاقتك بيها كاصدقاء عالفاضي

لو انت فعلا عملت استخارة و ارتاحت للموضوع و قررت فعلا يبقي تحاول تجس نبضها الاول عشان ميبقاش في اي احراج للطرفين

عن طريق صديقه او صديق مشترك

و لو حسيت ان في قبول يبقي توكل علي الله و اتقدملها رسمي بعد ما تخلصوا

و متنساش ان اهم شيء الاستخاااااااااااااااااار ة

صدقني و الله العظيم

دي بجد من نعم ربنا علينا

لانك مش بتستشير حد عادي زيك

ده انت بتستخير ربنا سبحانه و تعالي

و هو الاعلم بالغيب

بوســـــــــي

شوف يا باشا

إنت أول حاجة لازم تسأل نفسك و تعرف كويس .. هل إنت مش عايزها تضيع من إيدك .. لأنك خايف "حد" بيخاف عليك و بيسأل عنك و عايز مصلحتك يضيع منك .. ولا عشان إنت مش عايزها هي بالذات تبعد عنك ؟

بمعني أصح .. هل هتفتقدها هي كشخص .. ولا هتفتقد الإحساس بإن فيه حد بيخاف عليك و بيسأل عنك و عايز مصلحتك ؟

لأن فيه ناس عامة بيبقوا محتاجين الإحساس بالأمان من خلال علاقة فا بيرتبطوا بناس غير مناسبين ليهم و بيعملوا نفسهم مش واخدين بالهم من حاجات كتير و في الأخر كل ده بييجي علي دماغهم و العلاقات دي بتفشل ، يعني ممكن تلاقي بنت تطلع من إرتباط تخش في التاني و التالت و الرابع و كله ورا بعض مع إنها يعني مش لعبية و مش player .. بس هي بتبقي عايزة حد تحبه و خلاص فا بتربتط بأي حد تحس إنه بيحبها .

إنما الناس اللي بترتبط بشخص بذاته عشان "هو" نفسه مش عشان عايزين حد جنبهم و بس العلاقات دي غالباَ بتنجح .

بإختصار .. فيه ناس بتحب الحب .. و فيه ناس بتحب أشخاص معينين .. في الحالة الأولي كتييييير بيفشلوا و غالباَ بياخدوا فوق دماغهم .. و في الحالة التانية غالباَ بينجحوا .. لو ناس بتجمع بين الحالتين دول أكيد بينجحوا (بس يكون الشخصين كدة) .

فا لو لقيت إنك هتفتقدها كشخص ممكن تفكر ترتبط بيها .. لو لقيت إنك هتفتقد الدور اللي بتقوم بيه في حياتك فا إنت ممكن تقابل غيرها كتير هيخافوا عليك و يبقوا عايزين مصلحتك أكتر منها في حياتك بعد كدة بس إنت وسع دايرتك الإجتماعية شوية و قوي علاقتك بالناس .

طبيعة سنك كدة، الواحد فى السن ده بيكون مسروع على الخطوبة والجواز وبالتالى ممكن الى حد كبير اختياراته بتكون متسرعة لأن ضغط احتياجه للخطوبة والجواز عليه بيخلى عقله اوتوماتيكيا ميشوفش غير النص المليان من الكوب ويتهم اى حد يحاول يورية النص الفاضى بأنه متجنى على الطرف التانى وان الطرف التانى مافيهوش العيوب دى كلها

انا رأييى انسب سن للخطوبة والزوج هو بعد انهاء الجيش والعمل او بعد تمام 25 سنة ايهما يأتى لاحقا، علشان تكون خدت خبرة مناسبة بالحياه وحصلت لك حالة من الاحتكاك الحقيقى بالبشر فى حياتهم العادية وليس فى عالم الفانتازيا الوردى بالجامعة، لأن الاحتكاك ده هيغير حاجات كتير جدا من افكارك وهيقربها من الواقع

اصبر ومتتسرعش، نفس النصيحة اللى قالها لى والدى الله يرحمه من 15 سنة، ومفهمتهاش وقتها، لكن لما ربنا شاء انى فعلا اتريث فى مسألة الزواج(بدون ارادة منى لكن جت كدة) كانت رؤيتى واختيارتى مبنية على اسس اكثر واقعية بكتير من لما كنت اصغر فى السن، وصدقنى بنات الناس كتير والعلاقات الطيبة كتير وما تخشى ان تخسره اليوم ستجد افضل منه غدا ، وده مش مجرد كلام عواجيز لكن واقع عاشه كل اللى اكبر منك شوية

انا مبدأيا موت علي نفسي من الضحك علي تعبير "محمية الذكور الطبيعية"

شوف يا سيدي الفاضل"حلوة سيدي الفاضل دي ؟؟"
عمر ما كان فرق السن مشكلة في موضوع الجواز الا إذا كانت البنت "وتحديدا البنت "الموضوع ده عاملها قلق.
مش دي القضية
ولا القضية ان انت النهارده عندك 20 سنة بس وهاتتجوز او هاتخطب

المشكلة وده من واقع خبراتي و احتكاكي بناس لذاذ زيك كده وفي نفس سنك كتيير عندي في الكلية، ولاني باشوفهم من منظور اوسع كتييير من ايام ما كنت طالب لسه بادرس.. ان الناس دي شخصياتهم متقلبة بشكل كبييييير جدا ، بمعني ان اللي انت شايفة النهارده في البنت وعاجبك ، ممكن بكرة تيجي تلاقيه مختفي ، وطبعا فيه تقلبات من دي بتبقي عنيفة وواضحة وومكن تتنبه ليها بسرعة... وفيه تغيرات من دي علي المدي البعيد بتبان .. وساعتها تلاقي نفسك مرتبط بحد مش لاقي فيه حاجه من اللي عجبتك زمان

طبعا انا مش باعمم .. بس اغلب تجارب الارتباط اللي بتبقي في سن من اولي ل 3 جامعة بتبقي فاشلة للأسباب دي

وعلي الرغم من ذلك فيه تجارب ناجحة وناجحه جدا كمان ، بس دي بتبقي نابعة عن حب حقيقي و فترة صمود كبيرة من اتنين فعلا زي ما بيقولو بقي واقعين في دباديب بعض،

انبهك لحاجه كمان ... مش معني انك ميسور الحال ... وجاهز انك تتجوز ... انك تديها جواز ... فيه حجات ما ينفعش تدوس فيها الا بعد لما الرؤية تتضح تماما و يبقي الجواز ده حاجه بتجري في نفس المسار اللي رسمته لحياتك.. مش عقبة هاتوقفك وترجعك لورا.
و اخيرا ... زي ما بقول للطلبة عندي هاقولك ... اعمل كل اللي نفسك تعمله ... بس ما تنساش انك لحد ما هاتستلم شهادتك من الجامعة انت الهدف الاول في حياتك في الفترة دي ... انهاء دراستك .. واوعي تخلي حاجه تعطلك

وربنا يسدد خطاك .. ويهديك الصواب
تحياتي