الموضوع: أخوكم الصغير محتاج نصيحتكم في موضوع شخصي

المشاركة الأصلية كتبت بواسطة MoToRiZeR

شوف يا باشا

إنت أول حاجة لازم تسأل نفسك و تعرف كويس .. هل إنت مش عايزها تضيع من إيدك .. لأنك خايف "حد" بيخاف عليك و بيسأل عنك و عايز مصلحتك يضيع منك .. ولا عشان إنت مش عايزها هي بالذات تبعد عنك ؟

بمعني أصح .. هل هتفتقدها هي كشخص .. ولا هتفتقد الإحساس بإن فيه حد بيخاف عليك و بيسأل عنك و عايز مصلحتك ؟

لأن فيه ناس عامة بيبقوا محتاجين الإحساس بالأمان من خلال علاقة فا بيرتبطوا بناس غير مناسبين ليهم و بيعملوا نفسهم مش واخدين بالهم من حاجات كتير و في الأخر كل ده بييجي علي دماغهم و العلاقات دي بتفشل ، يعني ممكن تلاقي بنت تطلع من إرتباط تخش في التاني و التالت و الرابع و كله ورا بعض مع إنها يعني مش لعبية و مش player .. بس هي بتبقي عايزة حد تحبه و خلاص فا بتربتط بأي حد تحس إنه بيحبها .

إنما الناس اللي بترتبط بشخص بذاته عشان "هو" نفسه مش عشان عايزين حد جنبهم و بس العلاقات دي غالباَ بتنجح .

بإختصار .. فيه ناس بتحب الحب .. و فيه ناس بتحب أشخاص معينين .. في الحالة الأولي كتييييير بيفشلوا و غالباَ بياخدوا فوق دماغهم .. و في الحالة التانية غالباَ بينجحوا .. لو ناس بتجمع بين الحالتين دول أكيد بينجحوا (بس يكون الشخصين كدة) .

فا لو لقيت إنك هتفتقدها كشخص ممكن تفكر ترتبط بيها .. لو لقيت إنك هتفتقد الدور اللي بتقوم بيه في حياتك فا إنت ممكن تقابل غيرها كتير هيخافوا عليك و يبقوا عايزين مصلحتك أكتر منها في حياتك بعد كدة بس إنت وسع دايرتك الإجتماعية شوية و قوي علاقتك بالناس .

بجد كلامك فالجول .. انا هجاوبك عالسؤال بامانة .. انا لو لقيت حد خايف عليا و بيسأل عني و عايز مصلحتي ليه محبهوش؟ و بعدين هو انا بميل اكتر لاني هفتقد الدور ده .. بس حاسس اني مش هقابل حد تاني يلعب الدور ده .. وزي ما قلت قبل كده ممكن مقدرش اوسع دايرتي بحكم وظيفتي و خصوصا اني ان شاء الله مسافر.. فممكن تبقى أصعب بالنسبالي

المشاركة الأصلية كتبت بواسطة MoToRiZeR

لو كدة يبقي هي وضعها كصديقة أحسن .. لأن إنت بتحب أثرها علي حياتك إنما مش بالضرورة ده يكون حب الإرتباط و الجواز .. و بالنسبة لأنك حاسس إن عمرك ما هتقابل حد تاني يلعب الدور ده فا ده إحساس مش صحيح رغم إنه ممكن يسيطر عليك فترة طويلة في حياتك و تيأس خلاص و فجأة يطلعلك حد out of noweher :) فا انا بجد مش عايزك تتسرع و انا عندي رأي بس مكنتش عايز أقولهولك من الأول بس مرضتش إلا اما أشوف هتقول إيه عالسؤال اللي فات .. الإنسانة اللي هترتبط بيها لو عن حب مش جواز صالونات مش هتفكر أرتبط بيها ولا لأ .. لأن دي هتبقي عملية عقلية محسومة عندك خلاص يا أه يا لأ .. و طالما شاكك و لسة بتشاور عقلك يبقي هي جواك لأ بس إنت بتحاول تقنع نفسك إنها أه عشان زي ما بتقول خايف متقابلش حد تاني كدة بس زي ما بيقولوا .. you can never tell .. محدش عارف إيه اللي هيحصل .. و علي فكرة انا عارف إحساس إن يبقي في حد عزيز عليك مرتبط بحد خنيق لأن أعز أصدقائي خاطب واحدة انا و هي بقالنا أربع سنين نطيق العمي ولا نطيق بعض :D و شكلنا في مرة انا و هي هنتفق و نرنه علقة .. هي عشان انا صاحبه و انا عشان هو خطيبها .. فا اللي عايز أقولهولك .. متحطش في دماغك إن شغلك و سفرك هيبقوا حائل بينك و بين حياتك الإجتماعية بعد كدة .. if you stop searching it'll find you .. و حاول علي قد ما تقدر توازن بين شغلك و حياتك الإجتماعية لأن ناجح جداَ لا تساوي "مبسوط" و انا جربت الإحساس ده اما تبقي ناجح أوي في شغلك بس مش مبسوط في حياتك و الحمد لله قدرت أطلع منه و سيبت الشغل :D لأن برضه الواحد هدفه في الحياة راحة البال .. ولا إيه ؟

هههههههههههههههه أكيد طبعا راحة البال ودماغي وسلامتي :D بس معلش في حوار صاحبك ده انا لو مكانك انا هبعد عنه بالراحة و هوضحله الاسباب (انك مش عاوز تكون سبب في اي خلاف ما بنهم) ..وهو بالنسباله يا اما هيرجعلك تاني يا اما هيفضل البنت اللي خطبها "وده بالنسبالي معلش يعني ميبقاش صاحب"
بالنسبة لكلامك اذا كان من جوايا مقتنع او لأ .. ف انا اصلا عمري ما حبيت قبل كدة ولا بفكر فالارتباط .. بس دي المرة الوحيدة اللي فكرت فيها .. و زي مانتا شايف محتاس حوسة سودة ..
بصراحة انا بدأت اقتنع اني اسيب الحياة ماشية زي ما هي ماشية لغاية ما اشتغل و اقدر اكون مسئول .. ساعتها لو هي موجودة يبقى خير و بركة .. لو مش موجودة يتقى اللي فيه النصيب هيكون ان شاء الله .. ولا ايه رأيك ؟

المشاركة الأصلية كتبت بواسطة drhaytham

هوه ده الكلام الصح صلي استخارة كتير واتوكل على الله
اسال الله العلي القدير ان يكتب لك الخير
ملاحظة صغيرة بس ياريت تغير الاسم drdevil

بارك الله فيك يا دكتور و ربنا يستجيب منك ان شاء الله
انا حاولت في كل الاسامي و انا بعمل تسجيل ملقتش غير ده اللي وافقوا عليه .. هجرب اسامي تانيه و هغيره ان شاء الله
بجد بارك الله فيك

عاوز أنبهك لحاجة بسيطة أخدت بالى منها ..... بالإضافة لكلام الأعضاء الأفاضل.

خلى بالك ليكون شعورك ساعة خطوبة صديقتك دى .. هو شعور بالغيرة و خوف من فقدان صديق عزيز عليك .....
الشعور ده كتير بنحسه لما تلاقى صديقك (أنتيمك) وجه إهتمامه لشخص آخر غيرك .... زى شعور الطفل الصغير لما مامته تخلف أخ ليه.

حاول تصبر شوية .. لأن الجواز شىء و الصداقة شىء آخر ... و مفيش مانع يكون ليك صديقة بنت ... إنتوا ناس محترمة و مش بتعملوا حاجة غلط ... و المفروض خطيبها ميتضايقش من الصداقة دى و ميفكرش بالطريقة دى من الأساس و إلا حياته هتبقى كلها مشاكل.

على فكرة انا لما لقينها اتخطبت انا اللي بعدت .. حتى هي استغربت موقفي ..

خلى بالك إنتا كده إديتها إحساس إنك شايف إن علاقتكوا ببعض غلط ... و ده شىء مش سليم ... و هيخليها تحط علامات إستفهام كتير عنك و عن علاقتك بيها ... حاول توضح موقفك ليها بعد ما تقرر علاقتك بيها هتستمر إزاى؟
و حاول برضه تعرف هى موقفها إيه منك ..... لأن هى طرف برضه ... و مش وقت ما تحبها هتحبك و وقت ما تبقى صديقها هتبقى صديقتك.

نصيحتى فكر شوية و بلاش تسرع .. و شوف إنتا سبب شعورك تجاهها ده .. هو غيرة و خوف من فقدانها و لا حب؟

و لو إنى أشك إنه حب ... لأنى مريت بتجربة شبيهه شوية ... و كانت نفس الأحاسيس دى عندى .. بس لما لقيت علاقتها بيا زى ما هى ما إتأثرتش بعلاقتها بشاب تانى بتحبه و خطبته دلوقتى ... حسيت إنها فعلاً أحسن صديقة ليا و إخلاصها للصداقة دى أكتر منى بمراحل ....... بس أنا اللى بعدت دلوقتى عشان مشغولياتى ... لكن هى من فترة لفترة بتسأل .. و أنا مش بتكسف على دمى .. صباح الندالة اللى أنا فيها يعنى ... :D

صحيح .. أنا 20 سنة برضه .... بس من المعذبين فى الأرض حالياً ..... بعيد عنك طب .. فمش لاقى وقت أحب غير الكتب :D

aA

أهلا بيك يا drdevil87 معانا في المنتدى
وكتر خير كل الأعضاء اللي ردوا بنصايح من خلال تجاربهم وخبراتهم

أنا برضه هقوللك رأيي من خبرتي ومن تجارب ناس حوليا..
الواحد ف السن اللي انت فيه بتكون عنده العواطف والمشاعر متقلبة..مش مفهومة..وعلاقة الصداقة ممكن تتفسر على انها حب وتعيش على الأساس ده وبعد فترة تلاقي ان وجودها معاك بقى عادي وممكن الاستغناء عنه..خصوصا لو قابلت اللي يقوم بنفس دور الصديق اللي تستريحله وتحكي معاه وكدة.
أنا بقوللك الكلام ده لأن الواحد ف الجامعة بيبقى عايش حياة بعيدة كل البعد عن الحياة الواقعية ولا تمت لها بصلة أصلا..فبيبقى مفاهيمه ومواصفات شريكة الأحلام مش واضحة ومش محددة..فممكن أي واحدة لو قربت منك وارتحتلها تحس بنفس الشعور تجاهها.
الحياة العملية والشغل والجيش كل ده فعلا بيغير البني آدم كتييييييييييير خالص وبيغير تفكيره..وزي ما تفكيرك انت هيتغير هي كمان تفكيرها هيتغير..يعني انت ممكن تفضل ثابت على موقفك و"حبك" ليها لكن هي لما احتكت بالحياة العملية لقيت انها عايزة مواصفات أخرى لشريك الحياة.
متزعلش من كلامي..انت مواصفاتك عموما تدل على انك شاب تطمح له فتيات كتير..انا بس بديك أسوأ الإحتمالات اللي لازم تفكر فيها كويس.

بإختصار..استنى شوية ومتكلمهاش ف الموضوع..ركز في دراستك..وخلال فترة السنتين ولا التلاتة دول ممكن تسأل عليها أكتر وعلى أهلها..تدرس شخصيتها أكتر وتعرف أسباب فشل علاقاتها اللي فاتت ايه..و بعد كدة لما تحتك بالحياة العملية وتدخل الجيش وطبعا أولا وأخيرا تعمل استخارة على الموضوع..كدة هتلاقي نفسك ف حالة من الاتنين:
*يا إما طلعت من الجيش..البعد نساك..أو حسيت انها مش مكون أساسي لحياتك..وده اختبار جامد لحقيقة مشاعرك ناحيتها..السفر للعمل والجيش..وساعتها يبقى انت كنت بس محتاج تملى فراغ عاطفي عندك ف المرحلة دي مش أكتر..وإنك لما نضجت شوية..لقيت ان مش هي اللي هتقف الدنيا لو مكانتش شريكة حياتك..يبقى انت ان شاء الله ربنا كاتبلك غيرها تسعدك وتكون جنبك.
*الحالة التانية..انك بعد الإستخارات المتكررة..والاحتكاك بالحياة العملية..ودراسة البنت من كافة النواحي..لقيت انك فعلا مش قادر تستغنى عنها..وانها فعلا فيها مواصفات الزوجة الصالحة ولا يعيبها شئ..وانها لحد دلوقتي لسة متخطبتش..أكيد كل دي أدلة من ربنا انها هي نصيبك.

أعذرني على الإطالة..وربنا يوفقك لما فيه الخير ويكتبلك شريكة الحياة اللي تسعدك.