الموضوع: مذكرات مدير محطة بنزين

سنة 1996 كنت لسة راجع من السعودية وكنت لاسة مافتحتش مكتبي
وكان عندنا محطة بنزين في العباسية
وعملت مدير لهذة المحطة لعدة اشهر
محطات البنزين دي عالم تااااني
كنز ..... كل حاجة فيها بتجيب فلوس
اما لو صاحب المحطة شمال .... بتبقي منجم ذهب ... لكن حرام طبعا
ايامها كان سعر لتر البنزين ال 90 بجنيه
والبنزين ال 80 ب 90 قرش
والسولار ب 40 قرش
مكانش فيه 92 ولا 95 لسة
الصدمة الاولي .... تخيلو مكسب المحطة الاجمالي ( قبل المصروفات ) في لتر البنزين ابو جنيه كام ؟؟؟
كان وقتها 14 مليم
مفروض ان المحطة لسة ح تصرف منه مرتبات وكهرباء وتأمينات وضرائب واتاوات وخلافه
اما السولار كان 9 مليم
يعني البنزين كدة بيحقق خسارة

لنا عودة

____________________________


دخل المحطة بيشمل عدة بنود
بيع البنزين والسولار ... وده بيحقق خسارة
بيع منتجات بترولية اخري زي الزيوت والشحوم وسوائل الباكم والهيدرولك ودول مسعرين من الشركة وربحها متوسط
بيع منتجات اخري مثل الفلاتر والمناديل والمعطرات والمنظفات ودي ربحها كويس
الخدمات ... وهي الغسيل والتشحيم وغيار الزيت والزوايا والكاوتش ... وده هو الجزء المربح في المحطة
غير بيع المخلفات
الجراكن الفاضية والكراتين الفاضية وحتي الزيوت المستعملة كانت بتتباع عشان يخلطوها بالسولار وتستعمل في الافران البلدي القديمة قبل ما يشغلوها بالغاز
بردو لنا عودة


____________________________



طب واحد يسألني يقولي يا كابتن لطيف ... طب ليه بيبيعو البنزين لما هو بيخسر ؟؟؟؟
ارد واقولو ... سؤال وجيه ونميس جدا
اولا لو امتنعت عن بيع البنزين يبقي اتركبت جنحة وهي الامتناع عن بيع مواد تموينية ... وممكن تقلب بجناية ومش بعيد تاخد اعدام او مؤبد :) وممكن الشركة ( موبيل او مصر للبترول او كالتكس ) اللي انت تبعها تلغي عقد التوريد بتاعك
وفي نفس الوقت لو مش بتبيع بنزين مفيش زباين ح يدخلو المحطة اصلا ... وح تبقي معليهاش رجل وفاضية ومش ح تبيع اي حاجة ولا تعمل اي خدمات
وعلى رأي المثل
عشان الورد يتسقي العوليق
..
..
فاصل ونواصل


____________________________



الخدمات في محطة البنزين يعتبر نسبة ربحها عالية جدا
لأن مالهاش تكلفة غير المية والكهرباءوالعمالة
لكن مفيش اي خامات بتستخدم
المرتبات طبعا ضعيفة جدا لأن الاعتماد الاكبر علي البقشيش
مرتبات العمال عندي كانت في حدود ال 100 جنية الي 200 جنيه
...
طب المحطة بقي ايه طرق النصب اللي بتعمله عشان تسرق الزبووووون
اول حاجة ان ممكن تكون الطرمبة ملعوب في العيار بتاعها .... يعني اللتر اللي بتشترية يبقي في الواقع اقل من لتر
الطظرمبات دي بيتم معايرتها عن طريق موظفين في التموين مختصين بالمعايرة
بييجو ساعات يعملو تفتيش مفاجيئ وبملو بتاع كدة نحاس سعته 20 لتر وله مسطرة زجاج لقياس الكمية بالظبط
بيعبي من الطرنبة 20 لتر بالظبط ويشوف فلي المعيار ده الحجم الفعلي
وطبعا فيه نسبة خطأ بسيطة مسموح بها
وبعدين يروحو قافلين غطا الطرمبة ومبرشمينه بسلك وفيه ختم رصاص لضمان عدم فتحه
ولو المفتش جه لقا الختم مفكوك تبقي قضية تموين
لو بقي صاحب المحطة شمال ... بيدي رشوة لمفتش المعايرة علي ان يضبط الطرمبة باقل من الواقع
يبقي الطرمبة تقرأ 20 لتر وانت في الحقيقة واخد 18 مثلا
....
دي اول لعبة ممكن تتلعب
....
لنا عودة


____________________________




لكن باقي البنود غير البنزين كلها مكسب
الخدمات مكسبها عالي
بيع المنتجات البترولية مكسبها معقول
بيع المعطرات والاكسسوارات والمناديل وخلافة مكسبها عالي
بيع فلاتر الزيت مكسبها عالي
وطبعا المخلفات وتأجير اي مكان في المحطة سواء للكاوتش او الزوايا او الميكانيكا او الكهربا .
كل ده بيعوض عدم الربح من البنزين طبعا

نيجي بقي لحركة تانية ساعات العمال بيعملوها لسرقة الزباين
بيبقي مثلا اللي قبلك حاطط 10 لتر بس وانت داخل بعده تفول
ييجي لما يحطلك انت مايصفرش العداد .... بالتالي العداد يعد من بعد ال 10 بتوع اللي قبلك
يبقي لو حطلك 30 ح يقرأ العداد 40
ودي بيعملوها لما يكون العداد علي رقم بسيط والزبون اللي بعده ح يمون كمية كبيرة بحيث ماياخدش باله
..
وعشان تتجنب كدة
لازم تتأكد انه حط المسدس مكانه قبل ما يمونلك لان العداد بيصفر بمجرد وضع المسدس في مكانه ع الطرمبة ثم سحبه مرة اخرى
اول ما بيسحب المسدس من مكانه العداد يصفر
او تصفير العداد يدويا في الطرمبات القديمة اللي مش دجيتال
او تتأكد من ان العداد رجع صفر تاني قبل ما يمونلك
وفي جميع الحالات يستحسن انك تكون متابع العامل بيعمل ايه او تنزل من العربية تشوف بنفسك
كدة مش ح يفكر يلعب معاك لو هو نيته وحشة
ودي طبعا مالهاش علاقة بصاحب المحطة ... دي لعب من العامل

يطلع بقي واحد فكيك يقوللي ان البنزينة بتغش البنزين بتحط عليه مية
كدة انا ازعل منه اوي
البنزين لا يذوب في الماء
يعني حتي لو خلط البنزين بالمية
الميه ح ترقد تحت في تانك المحطة والبنزين يبقي عايم فوقها لانه اخف من الماء
وساعتها لو كان ارتفاع الماء في قااع التنك قليل يعنل لم يصل الي مستوي الماسورة اللي بتسحب البنزين الي الطرمبات ... يبقي الماسورة ح تسحب بنزين ويا دار مادخلك شر
اما لو ارتفع الماء الي اعلى من مستوي ماسورة السحب
يبقي الطرمبة ح تسحب ماء بالكامل او معاة شوية بنزين مثلا .... يعني ح تبقي مفقوسة جدا والعربية مش ح تدور اصلا الا لدقيقة او اكتر قليلا وح يرجع يعكل مشكلة للمحطة
وان كان حوادث اكتشاف مياه في البنزين حصلت معايا شخصيا وح اقلكم عليها في وقتها
اومال بيغشوه ازاي يا حاج احمد ؟؟؟؟
اولا : بيخلط انواع البنزين
يعني مثلا النقلة ال 80 ال 9000 لتر بيحط منها 300 لتر في تانك ال 90
او يحط من ال90 في تانك ال 92 حسب الوضع الحالي
كدة ال300 لتر دول في وسط تانك سعته 20 الف لتر مش ح يبانو
ويبقي هو كسب الفرق في السعر في كرشه
وده طبعا بيبقي بالاتفاق مع السائق اللي بيفضي النقلة او بيسحب الينزين من الطرمبة ويفضيه في التانك ... لكن كدة يبقي بيفضح نفسه قدام كل العمال وحد ح يبلغ عند اكيد
ثانيا : انه يخلط السولار بالبنزين
وبيستخدمو مواد كيماوية بتساعد علي اذابة الجاز في البنزين
والفرق كله في كرش المعلم طبعا
....
بكرة نكمل

____________________________




نرجع للمحطة ومشاكلها وبلاويها
لكن الاول نصلي علي سيدنا وحبيبنا النبي عليه افضل الصلاة والسلام
...
يوم من الايام لقيت واحد جاي عاوز مدير المحطة
قابلته
طلع راجل ساكن جنب المحطة واشتكالي انه مون م المحطة والعربية عطلت منه والميكانيكي قاله ان البنزين فيه مياه
قعدت مع الراجل وفهمته ان حتي لو حد عاوز يغش البنزين ماينفعش بالمية زي ما شرحتلكم في المشاركة السابقة
والراجل اقتنع ان الميكانيكي بيشتغله ومشي
بعدها بكام يوم رجع تاني بنفس الشكوي لكن من ميكانيكي تاني وبعد مامون من عندنا الصبح بردو
قعدته معايا
وجبت علبة مادة كيماوية زي المرهم كدة لما بيجي عليها مياه بتتلون باللون الاحمر علطول دي كنا جايبينها من شركة البترول بيكشفو بيها عن وجود المياة
وجربتها قدامه في كوباية ميه لونت احمر علطول وجربتها في شوية بنزين مالونتش
وطلعت المقياس بتاع التانك اللي تحت الارض اللي بنقيس بيه التانك
وهو عبارة عن خوصة نحاس طويلة حوالي 3.5 متر مبططة زي المسطرة ومدرجة بننزلها من فتحة معينة في بيارة فوق كل تانك عشان نشوف التانك فيه بنزين قد ايه
ودهنت اسفل المقياس بالمرهم ده
ونزلت المقياس قدام الراجل للآخر بما يعني ان لو فيه مياه في اي مكان ف التانك ح يلون احمر علطول
وطلعت المقياس قدامه
...
وبعدين ........
نكمل بعد الفاصل الاعلاني

ههههههه
لازم التشويق ده لزوم الاثارة
طلعنا المقياس .... لقيناه بنفس لونه ومش احمر ... يعني مفيش مياه
علشان الراجل يطمن اكتر
بعد ما طلعت المقياس روحت راشش عليه شوية ميه راح ملون احمر
الراجل اقتنع ومشي
لكن انا ماقتنعتش وما طمنتش
بعد ما مشي
روحت جايب مراقب المحطة وكان بقالو كتير ف المحطة من قبل ما نشتريها بسنين وحضر تركيب التانكات الجديدة
وقعدت استجوبته
طلع ان المقياس ده بيقيس من فوق مش من تحت
يعني لازم ينزل في التانك بالكامل لغاية القمة العلوية بتاعته ماتخبط في الفتحة اللي في البيارة اللي علي وش الارض
وكان المقياس علي طول التانك بالظبط قبل كدة
فكان كل ما يقيسو التانك طرف المقياس السفلي يخبط في ارضية التانك
ومرة في مرة ومع القياس كل وردية
قاع التانك اتخرم وبقي يسرب بنزين ف الارض
لما ركبو تانكات جديدة في تجديد المحطة ارادو تجنب المشكلة دي
راحو قطعين حوالي 25 سنتيمتر من قاع المقياس عشان مايطولش القاع وفي نفس الوقت يقيس من قمة التانك عادي
اذن المقياس بالمعجون اللي في طرفه لم يصل فعليا الي قاع التانك ... ولو كان فيه مياه اكيد ح ترقد في القاع
روحت فاكك وش فتحة القياس اللي ف البيارة ورابط المقياس بحبل ومنزل المقياس لغاية ما المقياس خبط في قاع التانك
طلع المقياس احمرررررر
يا وقعة مربربة
.....
نكمل كمان شوية

____________________________




اسف للتأخير
مش باعرف اكتب غير من المكتب لان البيت لازم اكتب من ع الموبايل وده صعب مع طول الكتابة
طب المية دي جت منيييييين ؟؟؟
غرفة التفتيش اللي زي البكابورت دي وفيها فتحة المقياس ولهل غطاء حديد زي غطاء البلاعات
دي موجوده فوق التانك ... يعني في وسط المحطة
ومنها غرفة تفتيش لكل تانك ... ال 80 وال 90 والسولار
مع غسيل السيارات وتنظيف المحطة المياه بتتسرب لغرفة التفتيش
المفروض انها متركبة بفلانشة ولها جوان كاوتش عشان ما تسربش ميه
ومع سوء الصناعة والاهمال و..... مصر بقي
الفلانشة بتاعة خزان ال 80 اللي الراجل ده بيمون منه سربت ميه
نقط نقط ... وتنزل لتحت طبعا لان البنزين اخف من المياه

ومع الوقت عملت كمية مياه رقدت تحت في قاع التانك بتاع المحطة
لكن المفروض انها اسفل التانك تحت مستوي ماسورة السحب اللي بتدي الطرمبات
ايه اللي وصل الميااااه للكرنبة ... قصدي الطرمبة
واشمعني الراجل ده بالذات اللي حصل معاة الموضوع ده دون غيره
ده السؤال اللي ح نجاوب عليه في الحلقة القادمة كمان شوية
..
اسيبكم بقي مع اعلان من بتوع الفضائيات اللي يحرق الدم :)

وعلي غرار تحقيقات الكوارث الجوية بتاع نشونال جيوجرافيك
عملت تحقيق موسع ودقيق جدا
اشمعنى الزبون ده اللي اشتكي
وايه اللي وصل المية من قاع التانك للكرنبة ؟؟
وبعد معاناااة..... ظهرت الحقيقة بدون مواراااة
الباشا الزبون كان شخصية روتينية جدا
يعني افعاله متكررة بنفس المنوال
يصحي من النوم الساعة 6.30 الصبح
يدخل الحمام الساعة 6.45
يفطر الساعة 7.00
ويقرأ الجرنال ويشرب الشاي الساعة 7.15
ينكد علي مراته وعياله وينزل الساعة 7.45
يكون علي باب المحطة الساعة 8.00 كل 3 ايام عشان يمون قبل ما يروح الشغل
يروح المحطة يلاقيها مقفولة عشان عربية نقل البنزين بتمون تانكات المحطة .... اجراءات الامن والسلامة البند 32 مادة 102 مكرر
ينتظر 5 دقائق لغاية ما التفريغ البنزين يخلص ويمون ويروح شغله
وهنا بقي المشكلة
مع تفريغ البنزين من الفنطاس بتاع العربية في المحطة .... البنزين بيعمل تقليب شديد لمحتويات التانك اللي بتكون اصلا قليلة جدا قبل التفريغ
كأنك بتصب مياة في كوباية مية فيها شوية مياه معكرة في قاع الكوباية من ارتفاع كبير
المياة اللي في قاع التانك بتختلط مع البنزين علي شكل قطرات مياة كتيرة جدا
تقعد شوية لغاية ما تترسب تاني في القاع بفعل كثافة المياة الاثقل من البنزين
....
الزيتونة في الموضوع ....
لما تروح تمون وتلاقي المحطة مقفولة وجاري تفريغ البنزين .... لا تنتظر حتي يتم التفريغ ثم تمون مباشرة
روح مكان تاني او انتظر نص ساعة وابقي ارجع مون
لأن نفس الموضوع بيحصل مع الشوائب اللي في قاع التانك
بعد شوية الرواسب بترقد تاني في القاع
.....
طب انا بقي عملت ايييييه ف الكارثة دي ؟؟؟
ح اقولكم كمان شوية اكون أخدت الدوا وشربت باقي النسكافية اللي كيلاني عملهولي

كل فترة كدة كنت اعمل غزوة الي التوفيقية
اشتري مالذ وطاب بالجملة
معطرات
ملمعات
اكسسوارات
اضافات بنزين وزيوت
باكم
الحاجات دي بتتباع في المحطة بضعف تكلفتها بتاعت الجملة تقريبا
والاكتر الفلاتر بتاعت الزيت
نسبة ربحها كبيرة جدا
كل ده من مكاسب المحطة
غير بفي ايجار اي مكان ممكن يستغل
كشك الكاوتش
مجرة بتاعت زوايا
...


____________________________




بعض المحطات كانو بيشغلو العمال بتوع البنزين بالاخص بدون مرتبات
يعني ببلاش
وكل دخلهم من البقشيش
لكن كنا بنستحرم كدة وكنا بندي مرتبات
قد تكون قليلة نوعا ما واقل من بتوع التشحيم والتنظيف
لكن كان فيه مرتبات وتأمينات اجتماعية كمان
...
المحطات الكبيرة بقي اللي عليها ضغط جامد وعلي طرق كبيرة زي صلاح سالم او الاوتستراد او الدائري كانو بيشغلو العمال ببلاش ... وكمان بياخدو منهم فلوس
كان وقتها العامل بيدفع ارضية لصاحب المحطة 2 جنيه علي كل خرطوم في الوردية الواحدة
يعني 4 جنيه علي كل خرطوم ف اليوم ... دي اسعار سنة 1996 يا جماعة.... كل ده في ايرادات المحطة

من اساليب الغش ف المحطات بقي غير خلط البنزين
الزيوت السايبة
ودي كانت وقتها منتشرة جدا
يعني ببساطة الغش في كمية الزيت
خصوصا في زيت الفتيس والكرونة لانهم بيتم توزيدهم من تحت العربية وقياسهم بيتم بطريقة بدائية عن طريق عداد بيلف عدد دوائر معينة في المسدس اللي بيزود بيه
يعني متوقفة علي ضمير العمال وصاحب المحطة وغالبا بيتم تقريبها الي اقرب نصف لتر
ده طبعا غير الزيوت المغشوشة اصلا
وغير كمان الاعطال اللي ساعات بيتم افتعالها عشات يشغلو الورشة اللي ف المحطة او تصليح الكاوتش وده طبعا اسلوب معروف للجميع

برغم اننا كنا في سنة 1996 يعني في قمة سيطرة الامن علي البلد
لكن كان لازم بردو نظبط موضوع التأمين
كان فيه اتاوات غير مباشرة بتدفع للشرطة
مثلا
تموين عربية الباشا
تموين بوكس القسم
ده غير اصلا اجرة غفير عبارة عن واحد راجل صعيدي معاه سلاح وعمال يلف في المنطقة طول الليل وبيبقي مسئول عن منع البلطجية انهم يقربو من المنطقة بتاعته
خصوصا ان المحطة مفتوحة طول ال 24 ساعة
ومشرف الوردية بيبقي معاه مبالغ كبيرة اللي هي ايرادات وردية الليل
يعني ممكن اوي حد يدخل يثبته وياخد الفلوس ويهرب لو مفيش تأمين

المشاركة الأصلية كتبت بواسطة a.saad

فين باقى موضوع العربية يا حاج احمد

لا مؤاخدة
انا فعلا ما كملتش
يظهر اني كتبت ونسيت اعمل بوست
القصد
وقفت بيع البنزين ال 80
وكررت الاختبار علي تانكات السولار و ال 90 لقيتهم مفيش فيهم مياه
جبت بتوع الصيانة بشكل ودي عشان مايحصلش مشاكل رسمية
ونزلنا ماسورة الي قاع التانك وسحبنا بموتور شفط بيطلع بخرطوم علي المجاري
سحبنا حوالي 250 لتر مياة لغاية ما بقت تجيب بنزين
اما الراجل ... عوضته ببنزين مجاني مقابل البنزين اللي اتفضي من عربيته
لكن بدون ما اقولو علي التفاصيل طبعا عشان سمعة المكان ... اقنعته ان حد من العمال ممكن يكون عمل حاجة غلط وممكن يكون اثر علي البنزين بشكل او بآخر وعشان اكون مطمئن ح احطلك بنزين بدل اللي راح منك
وةطبعا نصحته مايحطش بنزين بعد تفريغه في المحطة مباشرة عشان الشوائب
وبقيت اقفل المحطة نص ساعة بعد التفريغ عشان الشوائب تكون اترسبت ف القاع وعشان الموضوع ما يتكررش
وطبعا عالجنا التسريب
بس كانت ليلة يا عمدة

المشاركة الأصلية كتبت بواسطة aif

من اساليب الغش ف المحطات بقي غير خلط البنزين
الزيوت السايبة
ودي كانت وقتها منتشرة جدا
يعني ببساطة الغش في كمية الزيت
خصوصا في زيت الفتيس والكرونة لانهم بيتم توزيدهم من تحت العربية وقياسهم بيتم بطريقة بدائية عن طريق عداد بيلف عدد دوائر معينة في المسدس اللي بيزود بيه
يعني متوقفة علي ضمير العمال وصاحب المحطة وغالبا بيتم تقريبها الي اقرب نصف لتر
ده طبعا غير الزيوت المغشوشة اصلا
وغير كمان الاعطال اللي ساعات بيتم افتعالها عشات يشغلو الورشة اللي ف المحطة او تصليح الكاوتش وده طبعا اسلوب معروف للجميع

زيت الفتيس والكورونة بييجي من الشركة في براميل عبوتها علي ما اتذكر 213 لتر
كان البرميل بيطلع منه للزباين مبيعات بحوالي 220 او 230 لتر نتيجة فروق الكسور
لان مش ح نحاسب الزبون باقل من نصف كيلو
وقتها كان فيه محطات بتبيع من البرميم باكتر من 400 و 500 كيلو
قولت اكتب الملحوظة دي قبل ما انسي
سلااام مؤقت

____________________________




نبدأ كلامنا بالصلاة والسلام علي خير الأنام
اللهم صل وسلم وبارك عليك سيدي وحبيبي يا رسول الله وعلى آل بيتك الاطهار واصحابك الاخيار وعلي التابعين ومن تبعهم باحسان الي يوم الدين
ونحن معهم برحمتك يا ارحم الراحمين
تفتكرو عربيات الحكومة والقطاع العام بتمون ازاي ؟؟
الجواب : بيبقي عندهم ادارة مخصوص للسيارات بيتصرف للسائقين بونات تموين من محطات مصر للبترول او التعاون بصفتها الشركات الحكومية
البون بيبقي ب 20 لتر او 40 لتر واحيانا 10 لتر علي ما اذكر
ومختوم بختم الجهة ومرقم ومكتوب فيه عدد اللترات ونوع البنزين
السائق بيدي البون للمحطة ويمون
المحطة بتجمع البونات دي وتختمها بختم المحطة وتفرغها في نموزج يتم ارفاق البونات به وتقديمه لشركة مصر للبترول
وتصرف الشركة القيمة بعد كام يوم او تخصمها من قيمة البنزين اللي بيورد للمحطة
الناس بتوع حملات السيارات في الحكومة والشركات الكبيرة بيقومو بالخنصرة من البونات
تلاقية كل فترة موفر دفتر بونات في جيبه من تموينات الشركة او الجهة الحكومية اللي هو فيها
لكن ما يقدرش يصرفها غير عن طريق محطة بنزين
شوفتو ازاي بقي
اشرب الكركدية الساقع اللي جابه كيلاني واكمل :)

وااااو
الكركدية رائع

براوة عليك يا كيلاني
يجي مسئول السيارات الفاسد بقي يدور علي صاحب محطة فاسد زيه
ويديله دفتر البونات اللي قيمته 2000 جنيه ب 1000 او 1200 حسب ما يتفقو
وصاحب المحطة يصرفه من مصر للبترول ب 2000 وحار ونار في جتتهم الاتنين
...
وساعات السواق نفسه بييجي لعامل المحطة معاه بون ب 40 لتر
يمون 20 بس وال باقي يقسمة مع العامل

اما الطبيعي اللي من غير سرقة
ان السائق يمون 39 لتر بس ويسيب اللتر الباقي بقشيش للعامل
يعني عشان مايدفعش بقشيش من جيبه بيخلي الحكومة هي اللي تدفعة
ماشاء الله
شعب فاسد بالفطرة
الا من رحم الله

من ضمن قلة الضمير في شغل المحطات
بييجي ناس عاوزة تشتري الجراكن الفارغة لكن عاوزينها بحالتها
يعني ح ياخدوها يعبوها زيت مغشوش او مستعمل ويبيعوه غالبا ف الاقاليم بعيدا عن اعين الرقابة
..
بييجي ناس عاوزة تشتري فلاتر البنزين المستعملة عشان ينظفوها ويحطولها كرتون من جواها وتتباع
...
طبعا في الايام اللي احنا فيها فيه بلاوي تانية اكيد بيعملوها عشان يكسبو بسبب ازمات الوقود

من الذكرايات الطريفة
سنة 1996 بدأت شركة بيبسيكو تنزل بطاطس شيبس لايز في مصر
لقيتهم جايين عاوزين يوقفو مندوبين ومندوبات في المحطة وكل حد يمون ومعاه اطفال يدولو اكياس شيبس ليز مجانا
مش عاوز اقولكم اننا قعدنا اكتر من شهر بناكل ليز ف البيت اكتر ما بنشرب ميه
وكان في بداية نزوله تحفة
وطبعا كل يوم الحاج مدير المحطة بياخد كرتونة حلوة
وعمال المحطة بيتروقو
ناس كريمة اوي اوي يا خال
بس مكانش معاه همبرجر

اول ما مسكت المحطة كنت معنديش فكرة عن التفاصيل بتاعت الشغل
كنت بانزل اعمل كل حاجة بايدي مع العمال
من اول تموين العربيات
لغاية التشحيم وغيار الزيت
مرورا استلام الشحنات الواردة وتفريغ البنزين من الفنطاس للمحطة
عشان محدش م العمال يضحك عليا او يخمني
كان لازم اجرب كل حاجة بايدي عشان لما اقول اي تعليمات او اوامر للعمال اكون فاهم هما بيعملو ايه بالظبط .... وكنت شباب وصحتي مساعداني
مرة كنت واقف ع الطرمبات وجه عيل صبي ميكانيكي عاوز سولار في ازازة بلاستك بتاعت بيبسي فاضية
وانا عملت فيها ابو العوريف وخدت الازازة منه وحطيت بوز المسدس في بوق الازازة .... وضغطت بمنتهي البراءة
وانا كنت مش متخيل قوة المسدس بتاع السولار ... وايدي مش حساسة اني اقدر اضغط بشويش اوي عشان مايطلعش السولار بقوة
وطااااااااخ
لقيت نافورة سولار ضاربة في وشي ومغرقة نصف جسمي العلوي
استحميت بالسولار يا مؤمن
وكانت ليلة يا عمدة ..... ممكن ما افتكرش انا استحميت كام مرة يومها ...... بس الحمد لله النظارة حمت عيني
وكمان السولار بتاع المحطات مختلف عن الجاز المنزلي
ريحته زي الزفت
اي حاجة سخنة اشربها يا كيلاني

____________________________




في ختام الموضوع
احب انوه لعدة نقاط
- ده اللي انا عرفته في شهور قليلة عن خبايا المحطات وعالمها اللي مليان دهاليز اكيد ده مش كل حاجة واكيد مع الوقت تطورت اساليب الغش والسرقة

- اكيد زي ما فيه ناس حرامية فيه ناس شريفة بردو ... مش معقول كل المحطات وحشة ولا كلها كويسة

- البنزين مصدره واحد لجميع المحطات وجميع الشركات الفروق بتنتج عن سوء حالة سيارات نقل الوقود وسوء حالة تانكات المحطة ... وطبعا سوء اخلاق وضمير البشر

- اكيد التفاصيل اللي كتبتها ممكن تكون غير دقيقة لأنها من 18 سنة .... سامحوني لو كنت كتبت حاجة خطأ او مش دقيقة نظرا لحالة الذاكرة

الخلاصة عشان ماينضحكش عليك او تتسرق اثناء التعامل في محطات البنزين

- لازم تتعامل مع محطة محددة تكون بتثق فيها ويكون معروف عنها انهم ناس عندها ضمير ... يعني مش كل يوم في محطة

- لما تيجي تمون بنزين انزل من العربية واقف جنب العامل .... كدة حتي لو ناوي يغشك ح يخاف ... وع الاقل عشان تضمن مايدلقش بنزين على صاج العربية او خارج غطاء التانك

- بلاش تمون بعد تفريغ البنزين في المحطة مباشرة ..... لو لقيت بنزين بيتفرغ انتظر شوية او مون وقت تاني

- بلاش تسيب عربيتك تفضي من البنزين خالص ... مون لما التانك يبقي تحت النص بشوية ... كدة انت اللي ح تختار الوقت والمكان اللي بتمون منه بدل ما تتزنق وتمون من اي حتة عشان العربية مافيهاش بنزين

- بلاش التعامل مع البنزينات اللي علي طرق سريعة خارج المدن .. لن دول مالهمش زباين وكل تعاملهم بيبقي مع ناس قد يكونو اول وآخر مرة يمونو من عندهم .... عشان كدة الغش عندهم بيبقي اكتر من البنزينات اللي جوا المدن

- لما حد في البنزينة يقولك العجلة دي ناقصة روح لبتاع الكاوتش يكشف عليها ..... ماتسمعش كلامه ... ده عاوز يشغل بتاع الكاوتش وممكن يبهدلك الكاوتش عشان ياخد منك فلوس .... صلح الكاوتش بتاعك عند المحل اللي بتتعامل معاه ... اقصي حاجة ممكن تزود هوا بس وتبقي واقف جنب العامل .... ولو قالك لف الدركسيون شمال او يمين .... يبقي عاوزك تبعد عنه عشان يخرم الكاوتش ويقولك عاوز 12 لحام وكل لحام ب 7 جنيه .... الخ الخ
انا عن نفسي عندي كومبريسور للطوارئ وباتعامل مع محل معين بتاع كاوتش

من الاخر ..... فتح عينك عشان محدش يستغلك وخلي عينك ع العداد قبل وبعد التموين واتعامل مع اماكن ثقة
...
وربنا يستر طريقنا جميعا

المشاركة الأصلية كتبت بواسطة 2CODE

يا حج احمد خلي كيلاني يعملك حاجة سخنة الاول بعدين فهمني النقطة دي بارك الله فيك

دلوقتي في اول الموضوع عرفنا ان البنزينة دي منجم دهب - تمام بس ازاي ؟؟؟؟

هل تقصد ان منجم دهب بسبب تأجير المكان للكاوتشات والغسيل وبيع المعطرات وغيره ؟؟؟؟ ده مش منجم دهب ابداً هيكسبك اه لكن مش منجم دهب

هل تقصد بيع سوق سودا من صاحب المحطة او غش في البنزين ؟؟؟؟ هنا بقى 100% منجم دهب

اين منهم تقصد يا حج أحمد ؟؟؟؟ انت نسيت تتكلم عن النقطة دي اللي ذكرتها في اول الموضوع

بص يا باشا
كيلاني لسة جايبلي النسكافية باللبن ومتحلي بعسل نحل
يعني المزاج عنب
...
بيع البنزين مش بيكسب لكن بيغطي مصروفات كتير وممكن يكسب لو البيع كتير وممكن يكون دلوقتي العمولة زادت الله اعلم
عندك بيع زيوت
وبيع اكسسوارات
وبيع مناديل ومعطرات ولبان وشيبسي وملمعات
واصلاح كاوتش
وغسيل وتشحيم وغيار زيت
زوايا وترصيص
اصلاحات كهرباء وميكانيكا
رفع عربيات للكشف عليها
سوبر ماركت
ماكينة بيبسي
ارضية علي كل خرطوم
عمالة بمرتبات رمزية او ببلاش
كراتين وجراكن وحتي زيت مستعمل بتتباع
فلوسك بتبات في حضنك كل يوم ... مش مرمية في السوق
معندكش اي ديون معدومة او ناس مش ح تدفع
دورة رأسالمال سريعة بشكل غير عادي بل انك ممكن تشتري باآجل وتبيع كاش
يعني بتشتغل بفلوس الناس مش فلوسك
..
ده كله مش كنز
كل المزايا دي في مشروع واحد
الكلام ده طبعا علي المحطات المحترمة اللي مش بتسرق
الكلام ده يعني بارقام اليوم مش اقل من 10 آلاف جنيه مكسب صافي بعد كل شيء يوميا للمحطة الصغيرة في القاهرة
ده مش كنز ؟؟؟؟؟؟؟



تم نسخ المشاركات في الموضوع وتجميعها بواسطتي
مشرف القسم العام
م 1أ
17/6/2014 1:50م

وتم تثبيت الموضوع لمدة شهر لتعم الفائدة علي الجميع

المشاركة الأصلية كتبت بواسطة amrelsaqqa

5 - 6 -7 جنيه بقشيش !
عمرى ما عملتها في القاهرة وفي البنزينة المعفنة اللى عندنا في البلد اخرهم بياخدوا 2 جنيه هو اينعم بتبقى العربية مثلا خدت بـ 74 ويقعد يزود للزور لحد ما تبقى 79 الا شوية وفي الاخر يقولك 82 ، بس مش لدرجة 7 جنيه بقشيش مرة واحدة كدة ! هو اه بيستعبط بس في الاخر بيبقى اللى هو خد 2 جنيه

وفي اي مكان تانى بمون عادى جدا بدون جنيه زيادة الا لو حد هيمسح الازاز ولا حاجة وفي المحطات المحترمة زي امارات مصر بيمسحلك الازاز مجانا وانت اللى بتديله الـ 2 جنيه من نفسك مش بييجى يطلبها منك

معظم البنزينات بيستعبطوا فى بنزين 80 ويبيعوه بـ 1 جنيه بدلا من 90 قرش
+ كمان بيطلب بقشيش
مثلا 40 لتر بنزين 80 سعرهم الرسمى 36 جنيه بتلاقى العامل بيحاسبك على 40 جنيه وياخد كمان 2 جنيه بقشيش ياعنى كده اجمالى البقشيش 6 جنيه ... وده بيحصل قدامى كتير جدا
عن نفسى انا برفض هذا الاستهبال وبحسب اللتر بـ 90 قرش وبدفع من 1 جنيه الى 2 جنيه بقشيش ولو مش عاجبه باخد البقشيش وبديله حساب البنزين فقط
ولو قل ادبه بشتكيه