الموضوع: القرية الذكية

المشاركة الأصلية كتبت بواسطة Ahmed A.Maksoud

أحب أوجه عناية حضراتكم أن العدد هيزيد قريب قوى.......

هنبعتلكم حوالى 700 أو 800 موظف فى الحى المالى :)

المفروض أن الموضوع ده كان هيتم قبل رمضان بس أجلوه شويه و دلوقتى الناس بتوع ال Network بتوعنا شغالين فيه............
بجد ربنا معاكم.....

أنا قلتلهم لو أتنقلت الأدارة اللى أنا فيها هناك....هقدم أستقالتى :) أنا ساكن فى مدينة نصر قٌرب الدائرى كده.....يعنى لو رايح القرية الذكية هيبقى سفر كل يوم....

و اى سفر دة 75 كيلو رايح بس(انا كمان ساكن فى مدينة نصر وكنت بروح القريقة كل يوم )بس الحمد لله ربنا تاب عليا.

المشاركة الأصلية كتبت بواسطة iunknown

ايه اللي بيحصل ده
انا شغلي اصلا مش في القرية الذكية بس عندي عملا هناك وتقريبا مابيعديش يوم من غير ما اروح القرية الذكية

المفروض ان القرية الذطية دي حاجة جديدة لسه ماكملتش 10 سنين ومعروف انها مقر لشركات عالمية وشركات كبيرة جدا وموظفينها غالبا هييجوا بعربياتهم و باتوبيسات الشركة.

الباركينج بقة مشكلة ضخمة جدا من بعد العيد

كل شركة عندها دورين تحت الارضي عاملاهم جراج وده طبعا للمديرين الكبااار مش لأي حد

الموظفين بقة قدامهم حلين
يا اما ييجوا الساعة 6 الصبح علشان يلحقوا مكان في الباركينج اللي قدام الشركة وده اخره 20 - 30 عربية على احسن الظروف ( فيه شركات فيها اكتر من 500 موظف)

يا يروحو الباركينج البعيد اللي في الشارع اللي قدام اريكسون ويركن هناك وبعدين ياخد شاتل باص يرجعه شركته
ده كويس

اللي حاصل بقة الكام يوم اللي فاتوا من بعد العيد ان البارك البعيد ده بقة مليان هو كمان
يعني حتى الحارات اللي العربيات بتمشي فيها علشان تخرج بقت العربيات تركن فيها
حاجة غريبة

مافيش تخطيط كما هي العادة في مصر.

رأيي أنه شئ طبيعي و جود باركينج بياخد حوالي 50 سيارة تحت المبنى و أمامه باركينج اخر 20 سيارة أمام المبنى (أساسا للزائرين).

التخطيط سليم و على أعلى المواصفات الدولية.

لكن المشكلة إنه مفيش بلد في العالم المتقدم كل موظف بييجي بعربيته الشغل.

تعالى نحسبها بالعقل لو كل دور فيه 90 موظف و المبني أربعة أدوار يعني حوالي 400 مكان للموظفين بس و لسة الزائرين. مفيش أي منطق يقول إن مبني 4 أدوار يتعملو باركينج سعة 500 سيارة!!

المشكلة أنه إحنا بنستكبر نركب مواصلات "ياى" و لازم نروح بالعربية عشان الفشخرة و القرية لها أتوبيسات محترمة جدا يعني مش حنركب أتوبيس 500 بتاع العتبة و الناس تدوس عليك.

والله في هولاندا مهندس في شركة بترول بيروح الشغل بالعجلة (طبعا دة extreme بالنسبة لمصر) و في أمريكا كله مشي أو بالمواصلات (دة في نيو يورك و أمثالها) لوجود مبانى إدارية كبيرة.

المشاركة الأصلية كتبت بواسطة Mohamed-Saoud

لو هدفع 500 في اتوبيس يوصلني الشغل غير التاكسيات... لأ الأحسن أدفعهم قسط عربية تكون ملكي و أروح و اجي بيها زي ما أحب و على الدوله أنها توفرلي مكان باركينج في شغلي. و الصحراء كتيييييييير ما شاء الله.

كمان... معظم شغل الاتصالات بيعتمد على الحركة و التنقلات و قليلا لما الواحد بيقعد في المكتب و بالتالي العربية دي ضرورة في القرية الذكية مش الأتوبيس و لا العجلة :) مع احترامي لبشمهندس أحمد طه.

يا عم أنا مافياش ركب للعجل ده للناس إلي عندهم صحة في بلاد تشرح القلب.

لكن الحقيقة إن شركة حضرتك ملزمة بتوفير باص للقرية الذكية لأنها خارج المدينة ده حقك و التنقلات الخاصة بالشغل لها pool car بردو من الشركة.

القصد أنه العيب مش في تصميم القرية و لكن في الشركات و الموظفين.

يمكن عشان أنا شغلي في أبراج نيل سيتي (الباركينج مأساه بكل المعاني) في الشارع مستحيل أما في المساكن مع البلطجية و ال......... الركن بتلاتة جنية للناصح و خمسة جنية للزبون لما بروح القرية عشان لية مشروع هناك بحس إني فالجنة و إن حضرتك بتتبطر عالنعمة.

أعتقد أن كلامك صحيح بخصوص الباركينج العمومي الغير مناسب لحجم القرية الصحراء واسعة و الباركينج العمومي ممكن يبقي زي بتاع المطار كده المساحة بالهبل لكن أنا بردو مصر إن المباني بها باركينج ملائم لنشاط مبني إداري أربع أدوار.

و للعلم المباني مش حتتضاعف بس لا دي في الخطة إنها تصبح ثلاث مرات العدد الحالي و ربنا يبارك و يوسع المحور.