الموضوع: ملاك الصنى 2014 ادخلو دافعو عن العربية بجد

انا مش فاهم هل غرض المنتدى تبصير و توعية الناس اللى بيشتروا عربيات جديده و اخذ الاراء فى المشاكل اللى بتحصل و لا ادخال الكره للناس فى عربياتهم اللى بيملكوها ؟؟

المشاركة الأصلية كتبت بواسطة atwa

انا معى سوبر صالون 2013 الشكل الجديد عاملة 30000الف كيلو بسم الله ما شاء الله بمشى بيها على طريق الجيش بسرعة 200 وعلى الطرق السريعة ما بتستهلش بنزيم5.5 الى 6.5 لتر *100كم بس خفيفة لوحدى بخاف منها انما لو معاى 2-3 بتبقى راسية ومرتاح البال ومحدش بيعدى منى غير الاسكودا!!!!!!!!!! مع العلم كان اول اختيار كان البروتون برسونا عريسة ملهاش حل بصراحة بس مشكلتها التوكيل ثانى اختيار النترا 2012 الشكل الجديد كنت مبهور من شكلهاوحجزتها ولااكن فية واحد صديقى قال لى اركبها قبل ما تشتريها فعلا اجرتها يوم ماارتحتش ليها فكرت تانى فى البروتون وحجزتها رحت عندعز العرب ما عجبنيش اسلوبة وحسسنى انى جى اشحت منة فجاة وظهرت الصنى الشكل الجديد لاان القديم ما بقبلوش خالص قلت عربية تادى الغرض والسلام

ما عليش ياريت بلاش تقول سرعة 200 بالصنى لانه فيه هنا ناس يتقرا و بتجرب نفس الموضوع و العربيه فعلا مش مصممه للسرعه دى لانها سيتى كار بنسبه كبيره و مش هاتكون ثابته باى شكل من الاشكال علشان ما يبقاش عليك ذنب و ناس تمشى بها على سرعه عاليه على حسب كلامك و يحصل حاجه لاقدر الله

انا من ملاك العربيه نيو صنى 2014 عامله 3500 ك

العربيه معايا زى الفل ولم يحدث معى اى مشاكل وهى ممتازه من حيث السعر والامكانيات

قد تكون مساله الشكل فيها اذواق ولكن ممكن اتغاضى عن مساله الشكل فى مقابل اشياء اخرى

ولان مفيش عربيه كامله فيها كل مايتمناه الانسان فهنا لازم كل واحد يشوف هو عايز العربيه لايه وايه المطلوب منها

علشان كده انا استقريت على نيسان صنى رغم ان كان فيه خيارات اخرى ليه انا مقتنع بيها

اولا انا استخدامى عائلى فهى مناسبه جدا لى من حيث الوسع الداخلى والشنطه

ثانيا عاليه عن الارض فهى مناسبه جدا لى لانى كنت باعانى من المطبات اللى عندنا كانت بتبهدل العربيه

ثالثا العربيه انا جربتها شخصيا لحد 140 ك ثابته وده على سبيل التجربه لكن انا اخرى هو 100- 120 بس مابحبش ازود عن كده لان الطرق بتاعتنا مش بتاعه الجرى ولان كثير من الحوادث بيكون سببها السرعه فهنا مساله الثبات بعد كده ماتهمنيش فى شئ لان هى كده ثابته معايا فى الرنج ده

رابعا العربيه عفشتها ناعمه ومريحه وعوامل الامان فيها كويسه وخصوصا ال abs

خامسا التكييف جيد مش ممتاز ومش بياثر على السحب ولو اتشحن كويس بيبقى ممتاز

طبعا التوكيل من اهم الاسباب اللى خلتنى اشترى الصنى فهو ممتاز ومنتشر فى كل انحاء مصر وناس محترمين

علشان كده انا اشتريت الصنى والحمد لله مش ندمان على القرار

نيجى بقى لموضوع الدفاع عن العربيه او مهاجمتها

كبر دماغك وريح نفسك وسيب اللى يقول يقول انا شخصيا مكبر دماغى ولم اعد اهتم بهكذا كلام

لان العربيه معايا كويسه ومستمتع بيها وكمان العربيه منتشره جدا وكل يوم بتنتشر اكثر قد يكون هناك بعض المشاكل لدى البعض وليس الكل وكلها تتركز فى خامه التيل ودى اكيد هيكون ليها حل عاجلا ام اجلا غير كده

استمتع بعربيتك وماتخليش حد ياثر عليك بكلام طالما انك مقتنع ومريحاك فلن تجد اجماع على عربيه حتى لو كانت ماركه عالميه

وعلى راى المثل على قد لحافك مد رجليك ورحم الله امرئ عرف قدر نفسه

علي فكرة الصني مش اعلي مبيعات
اعلي مبيعات
هيوانداي فيرنا .. ايمجراند