الموضوع: الفلوانس مزعلاني من يوم ما جبتها

المشاركة الأصلية كتبت بواسطة hany saad

لو قفلت من العربية خلاص و حاسس أن مشاكلك مش هتتحل أو ملكش نفس تروح التوكيل و تحاول فى المشاكل يبقى بيع......
أنا أستلمت عربية زيرو و كان فيها قطمة و فانوس led غيرتهم فى الضمان و الحمد لله مستمتع بالعربية جداً حتى الأن

بالنسبة تشترى أيه جديد، دعنى أقولها لك صراحة....مفيش عربية كاملة و مفيش عربية هتملى دماغك 100%
لازم هتلاقى حاجات على حساب حاجات، قد تكون بعض المشاكل بسيطة للبعض يمكن التغاضى عنها و قد تكون لا تحتمل بالنسبة للبعض الأخر

- كورولا 2013 الشكل القديم كانت مع زميلنا هنا الدكتور مصطفى مجدى، عربية رمز الأعتمادية على مستوى العالم و بايعه ما شاء الله فوق المليون وحده.....الراجل أشتراها زيرو و للأسف كان فيها مشكلة سيستم فرامل abs كامل و لف بيها يصلحها و فى الأخر زهق و قفل منها و بعها

-سيراتو برده من العربيات اللى نادرة الأعطال (شكل قديم) و لكن كتير من اللى راكبينها كارهين عفشتها....السؤال هنا...تركب عربية أعطالها نادرة بس عفشتها قارفاك فى حياتك؟؟

- الكروز بتستهلك بنزين جامد و هتتعامل مع منصور

- فى رأى الشخصى مفيش عربية كاملة، كل شركات العربيات بتجمع عربياتها و بتجيب القطع من مورد او أتنين على مستوى العالم و وارد يحصل مشاكل فى أى قطعة، هتحتاج توكيل محترم شوية و بعض طول بال من حضرتك على ما تظبط العربية و تتأكد أن كل قطعها تعمل بكفاءة و هى دى فكرة الضمان على فكرة

- لو فى أى شركة فى العالم ضامنه منتجها 100% أنه خالى الأعطال يبقى هتنزله بدون ضمان

- أحنا عندنا فى الشركة مرسيدس c250 موديل 2012 مغيرة 2 مساعد تحت الضمان قبل ما تكمل 10 ألاف كم و كمان جزء خطير فى الموتور (صوت خبط مع التدوير و هى بارده) قبل ما تكمل سنتين و التوكيل قال لازم بنزين 95 و دورت على الأنترنت و لقيتها مشكلة معروفة و طبعتلهم المشكلة و الtechnical note من مرسيدس ألمانيا و غيروا القطع و كانوا عايزين يدفعونا و لما قفلت معاهم غيروها بدون ولا كلمة و العربية ظبطت و بقت 100 فل.

أنا حابب أوضحلك أن المنتدى هنا مش مقياس لأى شىء و كون أن مفيش مشاكل أتكتبت هنا على الكورولا أو الألنترا أو الكروز أو السيراتو أو الشارك أو....مش معنى كده أن العربيات دى خالية العيوب، فيه عيوب قد تكون عيوب قطع بتبوظ أو ممكن عيب فى العربية نفسه كتصميم: منخفضة، عفشة ناشفة، رخيصة من جوه، تقفيل سىء، ناقصة كماليات هامة جداً، شكل خارجى سىء، غير مميزة و هكذا.....

على سبيل المثال، مفيش أى شىء ذكر فى المنتدى عن عفشة الألنترا الجديدة و أد إيه هى سيئة إلا موضوع لسه مكتوب حديثاً... و أنا عرفت عن الألنترا بالصدفة من زميل ليا فى العمل و راجل ركيب إلنترا من زمان و أشتكالى أن العفشة بتدب فى دماغة و التقفيل سىء و لازم يرزع الشنطة علشان تقفل وده مقارنة بموديل 2008 اللى كانت معاه....السؤال هنا: الألنترا إعتمادية فوق النمرة واحد و مفيش حاجة بتبوظ فيها وفى إعادة البيع هتكسب كمان و لكنك سايق العربية كل يوم متضايق من العفشة (اللى مش بتبوظ على فكرة) و مش حاسس ببهجة و لا فخامة العربية الزيرو

بالتوفيق فى أى إختيار هتختاره

تحياتى

اضم رأيي لرأيك . ما شوفتش فعلا حد من اصدقائي برغم انهم راكبين كل الماركات بيشكر فيها تماما . ده حتى الجيب شيروكى . لازم تقبل حاجه امام حاجه . ميزه امام عيب انت شايفه