الموضوع: تحذير بيجو 301...كارثة على الطريق

المشاركة الأصلية كتبت بواسطة syd

الف حمدلله علي السلامة
وقدر الله وماشاء فعل

انا شغلي في أكتوبر وبيتي في الهرم
فأحياناً بروح من نفس الطريق دة

اولا خلينا نحلل الموقف ونقول مين غلطان ومين مش غلطان

الطريق دة منحدر جامد جامد جامد
مهما حملت علي الفرامل - العربية مش بتقف
احياناً (وبصراحة غالباً) بيكون في رمل علي جانبي الطريق وحضرتك بتقول انك روحت اخر الشمال
حضرتك علي حد قولك بتقول معاك المدام وأخواتك

وبناء علي ما سبق ذكره
العربية محملة علي الأقل 4 أشخاص بالغين
الطريق منحدر قوي جداً
رملة ناعمة علي الطريق

الabs اشتغل وانت حسيت بالvibreation

اعتقد الغلط عندك

انا شخصياً رغم مروري من هذا الطريق مئات المرات وعارف وحافظ ملفاته ومطباته الا ان احياناً الفرامل بتخوني وبلبس اول مطب (لأنهم سلسلة مطبات ورا بعض بالظبط 3 مطبات وبعدهم علي مسافة 500 متر كمان 3 مطبات اقل حدة منهم)

علي فكرة انا متعاطف معاك 100% ومش شغال في توكيل بيجو او في شركة التأمين
ولكن انا بقول تحليلي للموقف علشان محدش تاني يتغر في عربيته ويقول دة عيب فردي ويدخل نفس النفق بنفس السرعة ويعتمد علي فرامله

انت ممكن تشكك في الabs انه ازاي يمسك وازاي العربية تزحف (الا لو علي حظك كان اشتغل علي اخر لحظة وبالتالي مش هيلحق يوقفك)

ربنا معاك ويعينك

تحياتي والف سلامة مرة تانية

لا يا سعادة الباشا اللى حصل كالآتى

انى نزلت نفق حازم حسن و طالع من النفق و انا على سرعة لا تتجاوز ال90 و شايف المطب من على بعد و شلت رجلى من البنزين و العربية هديت لحد سرعة 60 كان المفروض لو الفرامل سليمة ان العربية تقف بكل سهولة و على فكرة لو مكانش فى مطب يجبر اللى قدامى على الوقوف انا ماكنتش هخبط فيه اطلاقا عشان المسافة بينى و بينه كبيرة و سرعتى مش عالية و اكبر دليل على ان السرعة مش عالية ان الخساير مش قوية اوى و اكبر دليل انى ضغطت فرامل هو رعشة الabs و بالرغم من كده العربية واخدة سرعتها تماما بدون اى وقوف برغم انى لما لقيت مصيرى انى هلبس قمت ضاغط عالآخر و اعتقد انك لو راكب عربية خنفسة و ضغطت عالاخر عالسرعة دى كنت هتقف

انما دى مشكلة فى العربية بل كارثة

و انا لا احمل نفسى اى لوم اطلاقا سوى انى مااحسنتش التصرف بانى استخدم هاندبريك او انقل سرعة اقل

غير كده انا كنت فى منتهى التركيز و قمة الانضباط و انا لو غلطان كنت هروح اى قسم و اقول حد خبطنى و جرى و ماكنتش هعمل قصة

و مايهمنيش اصلا العربية كلها فى داهية بس فى نظرى ان تسيب الفرامل ده كارثة و لو اتكرر عالطريق السريع او فى موقف اصعب هتبقى الخساير اكبر ممكن تودى بحياة انسان

الرد الجاى هيكون فيه موقفى مع الوكيل الصبح هرفعلكم صور

لله الامر من قبل و من بعد ...
معقوله فيه فرامل كده ... ده اهم حاجه فى الاروبى عامه وسائل الامان اللى بتيجى على حساب الكماليات كمان دى فيها مشكله ... ارجو من صاحب الموضوع موافاتنا باخر التطورات و ربنا معاك .

روحت الصبح التوكيل فى ابو رواش بما انى كنت راكن العربية قصاد الاستقبال امبارح و عما وصلت التوكيل الساعة 9 و ربع الصبح لاقيت المهندس ريموس بيتصل عليا بيقولى انت فين قلتله انا قصادك فا قابلته و حسيت ان العربية ملعوب فيها لانى لقيت العربية مش على وضعها و الازاز و المهندس واقف قصادها و كده

فا انا كنت مبلغ العيال بتوع الامن بالمشكلة لما وصلت بالليل و ماحدش يلومنى و يقولى قلتلهم ليه لانى كنت متوتر جداً و دماغى كانت مش فيا

المهم قالى خير قلتله حصل كذا كذا قالى لالا اكيد انت اللى كنت سرحان او ماشى بسرعة قلتله يا باشا لو انا سرحان او ماشى بسرعة كانت الصدمة هتبقى اكبر بكتير

قلتله و فى دليلين على انى كنت دايس فرامل اول حاجة انى حسيت برعشة جامدة و اكتشفت انه الايه بى اس و ده اكبر دليل انى كنت دايس فرامل

و انى لو كنت دوست بنزين ماكنتش هحس بالرعشة و كانت العربية هتجرى و العربية دى ما شاء الله بتشم البنزين فا كنت هلبس لبسة محترمة كان ممكن اجيب فيها موتور

قلتله و بعدين حضرتك لو طلعتلى تقرير بيقول ان الفرامل دى سليمة فا ده فى حد ذاته كارثة كبيرة هتخوفنى انى اركب العربية دى تانى

قالى بص احنا بنضمن سلامة عملائنا و العربية سليمة و العيب فيك و قالى حتى تعالا نجرب و خد العربية جربها و اشتغلت من غير مشاكل

المهم يمين شمال الراجل خلاص هو و اللى حواليه اتلموا و كلهم فى نفس واحد انت اللى غلطان لدرجة انى كنت هصدق

قلتله طب اكشفلى على العربية بالكامل و على كامل اجزاء الفرامل قالى مش هكشف الا لما تعمل محضر و تجيلى

طبعا بغض النظر عن الاسلوب المستفز و اللى مافيهوش ريحة الاحترام من معظم الموظفين

بس قلتله طيب غيرلى خرطوم الريدياتير عشان اقدر اروح بيها القسم

غيره و اتكلف 120 جنيه و اخدت منه غطاء الكنترول و روحت البيت و لسه بفكر اعمل ايه

لتانى مرة بقول و هقولها لنفسى قبلكم
لو طلعلى تقرير بإن الفرامل سليمة مش محتاجة اى صيانة تبقى كارثة لانى واثق بنسبة 100% من نفسى لحظة الحادث

ارجو التفاعل قبل ما حد يحصل معاه زيى و لا قدر الله يكون الضرر صعب مايتعوضش بالفلوس

دلوقتى بقى انا فى قمة الحيرة بسبب موضوع ان الفرامل مافهاش مشكلة دى

فى ناس بتقولى روح اعمل محضر بان حد فرمل عليك و انت خبطت فيه و جرى حتى المهندس موريس ده نفسه قالى كده قالى روح اعمل المحضر و قول كذا كذا

و بالرغم من ان لو ده حصل يبقى برضه الفرامل ماتصلحتش و هبقى متعرض فى اى لحظة ان يواجهنى الموقف ده تانى ممكن اخسر فيه اكتر من المرة دى

محتاج اراء الناس الخبرة اوى اوى فى المواضيع دى عشان انا محتار حيرة قذرة

لدرجة انى فكرت انى اروح اجيب كبوت استيراد و اكسر الضمان و اصلحها على حسابى و هوفر الآلاف اللى بتضيع فى التوكيل الحرامى

قولولى اعمل ايه