ميتسوبيشي أتراج و لا كيا بيكانتو

**eng.m7md.ali** · 25-06-2014 01:22 AM

المشاركة الأصلية كتبت بواسطة S O P H O S

معلش يا باشا لو تسمحلي اعلق فقط علي النقطة دي
طبعا مؤكد تقصد الياريس هتشباك ازاي البيكانتو افضل منها
وازاي الياريس ميتدفعش فيها 50 الف
لو علي كده اعتقد الجين مش هتوصل 40 الف بردوا
اتمني تتقبل استفهامي من جملة حضرتك
لا اكيد حضرتك عارف ان الياريس احسن من البيكانتو
وعلي الاقل عربية فيها محرك من شركة عريقة وفيها كل وسائل الامان بالاضافة الي التقفيل الفرنسي الخ
يعني مش فاضية زي الفيرنا الي وصت حاجة و 90 الف
فأنتظار رأي حضرتك لانه يهمني
تحياتي لشخصك الكريم ..

مش عايز حضرتك تفهم كلامي غلط

وعشان احنا في مصر هيا فعلا عربيات متسواش ولا حتى الجين2 .. اعتقد العربيات دي كلها برة في نفس رينج السعر

لكن لما تنزل عربية ياريس اللي هيا المفروض عار على التويوتا ب 150 الف ده قمة النصب .. لما تنزل عربية من كيا اسمها بيكانتو ودي تعتبر اقل عربية اتعملت من كيا وسعرها هنا يوصل ل 100 الف يبقى ده قمة النصب .. ونفس الكلام على الاتراج ونفس الكلام على ال i 10 ...

العربيات دي كلها فئة واحدة .. لما يوصل سعرها او يعدي الفئة اللي بعدها يبقى كدة هبل في الجبل .. وللاسف الناس بتشتري واحنا اللي بنساعد على النصب ده

جين 2 سنة 2009 كاملة اوتو كانت بتعمل 87 الف .. دلوقتي بقت ب 118 الف ومتغيرش فيها حاجة غير فوانيس خلفية .. نفس الكلام على الافيو سنة 2009 كانت اوتو ب 74 الف .. دلوقتي بقت ب 105 الف وهيا هيا بالظبط معادا اختلافها من قدام

تخيل عربية زي هيونداي سوناتا من كام سنة كانت بتتباع ب 120 الف وبنقول غالية جداً والناس مستكتراهم .. دلوقتي الياريس بقت ب 150 الف بصدر رحب جداً

ياصلاة النبي

**sue214** · 25-06-2014 01:34 AM

المشاركة الأصلية كتبت بواسطة mk3

معقول يا جماعه الاتراج مفيهاش ايرباج و abs ؟؟؟؟

لا فيها اير باج واحدة و abs

**sue214** · 25-06-2014 01:41 AM

المشاركة الأصلية كتبت بواسطة sue214

هشوف كده اخره ايه :) شكرا لحضرتك

روحت المعرض فعلا يا فندم و كان معايا اخويا و قالنا مش هقدر انزل فيها اكتر من 500 جنيه .. اي خصم عايزينه زيادة عن كده ممكن تتكلمو فيه مع الحاج سمير ريان .. هل ده طبيعي ؟ و لا ربنا وقعنا ف واحد مبيعات رخم ؟ ههه :) ارجو الافادة

**mfia** · 25-06-2014 06:53 AM

المشاركة الأصلية كتبت بواسطة sue214

روحت المعرض فعلا يا فندم و كان معايا اخويا و قالنا مش هقدر انزل فيها اكتر من 500 جنيه .. اي خصم عايزينه زيادة عن كده ممكن تتكلمو فيه مع الحاج سمير ريان .. هل ده طبيعي ؟ و لا ربنا وقعنا ف واحد مبيعات رخم ؟ ههه :) ارجو الافادة

انا قلت اللي حصل معايا فعلا وممكن جدا يكون اللي قالي السعر ضايع وساعة الجد ةالتنفيذ يرجع ف كلامه ويقولي انا كنت قايلك سعر غلط أسالي في مكان تاني ولو الاسعار واحدة توكلي على الله

**sue214** · 25-06-2014 11:18 AM

المشاركة الأصلية كتبت بواسطة mfia

انا قلت اللي حصل معايا فعلا وممكن جدا يكون اللي قالي السعر ضايع وساعة الجد ةالتنفيذ يرجع ف كلامه ويقولي انا كنت قايلك سعر غلط أسالي في مكان تاني ولو الاسعار واحدة توكلي على الله

تمام،، شكراً جداً لحضرتك :)

**sue214** · 25-06-2014 05:07 PM

المشاركة الأصلية كتبت بواسطة mfia

انا قلت اللي حصل معايا فعلا وممكن جدا يكون اللي قالي السعر ضايع وساعة الجد ةالتنفيذ يرجع ف كلامه ويقولي انا كنت قايلك سعر غلط أسالي في مكان تاني ولو الاسعار واحدة توكلي على الله

أنا دلوقتي فهمت إلي حصل .. حضرتك العربية إلي كان بيكلمك عليها الأتراج هي إلي بضمان الرواس مش بضمان التوكيل الرسمي إلي هو دايموند موتورز .. و دي فعلاً عاملة 109 ألف ف كل المعارض و نازلة بفئة واحدة بس أوتوماتيك .. لما سألت فرق إيه عن الدايموند .. قالولي انها الخليجي بتاع الأتراج و بيبقى بضمانهم و عندهم قطع غيارها

**mk3** · 25-06-2014 06:10 PM

لتر يمشى 21 كيلو قووووول 15 كيلو
اعتقد الاتراج هى المستقبل

**S O P H O S** · 26-06-2014 12:44 AM

المشاركة الأصلية كتبت بواسطة mk3

لتر يمشى 21 كيلو قووووول 15 كيلو
اعتقد الاتراج هى المستقبل

السيريون كانت بتعمل كده ال 1000 سي سي

**raedegypt** · 26-06-2014 04:01 AM

فيرنا اتوماتيك 92 عربيه مش محتاجه وعمرنا فى مصر ما نجرى فوق 50كم من الزحمه ... الافيو 102 حلوة برضه التوكيلات قويه والعربيات ده قطعها متوفرة فى السوق
من الاخر خد لك واحدة من دول وانسى اى حاجه
البيكانتو حلوة بس سعرها بالنسبه لحجمها اوفر ومحتاجه عربيه تانيه معاك
الفيرنا والافيو عربيات وسط حلوة ومناسبه لمصر فى كل حاجه
المانيوال حرام يندفع فيه فلوس حتى لو ايه .. مع الزحمه يوجع ركبك

**D . a .\ AYMAN** · 05-07-2014 06:55 PM

أنا كنت محتار زيك كدة بين الأتراج والبيكانتو وكان كمان معاهم السوزوكي السويفت وفي الآخر طلعت الأتراج برة المنافسة تماما لعدة أسباب

1- أولا هي 3 سلندر وأنا معايا ألتو 3 سلندر وركبت عربيات كتير 3 سلندر وده بيخللي الموتور فيه رجه خفيفة ملحوظة عند تشغيل السيارة على الحمل الخالي ودي كانت خانقاني بصراحة في الألتو ما تحسيش الموتور ناعم زي البيكانتو مثلا (بصراحة موتورها ناعم جدا) ودي النقطة اللى حسمت لما شغلت العربيتين جنب بعض وشفت الفرق

2- التقفيل من جوة لصالح البيكانتو بمراحل سواء الدركسيون الجلد في البيكانتو الهاي لاين والفرش الجلد والتابلوه والفتيس والكونسولة (ودي أذواق طبعا) بس جودة التقفيل لصالح البيكانتو في الخامات المستخدمة

3- من ناحية الوسع أقدر أقول بكل ثقة إن البيكانتو أوسع من جوة من الأتراج بدرجة ملحوظة لما ركبت الإثنين جنب بعض بالضبط كنت أنزل من دي وأركب دي وأرجع أنزل منها عشان أركب الأولانية لأني ما كنتش مصدق بس فعلا البيكانتو أوسع وتاخد ثلاثة ورا كويس وإثنين مستريحين على الآخر

4- موتور البيكانتو أنعم بمراحل والباور بتاعها ناعم جدا وجميل وعزلها كويس (من جوة صوت الموتور مش مسموع

5- ده غير بقى العيب الأساسي للأتراج اللى حضرتك قلتي عليه وهي إنها لسة عربية جديدة مشاكلها لسة مش معروفة وسعرها مش قليل وولا مغري أساسا إن الواحد يجرب فيها وصعب أدفع الرقم ده على سمعة ميتسوبيشي فقط بالإضافة للعيوب اللى قلتها فوق

السويفت بقى لما دخلت في المقارنة لخبطتلي الموضوع في دماغي مع العلم إن السويفت مش عربية جديدة ولكنها بس قليلة شوية في السوق المصري لكنها عربية أثبتت جودتها وكفائتها في أسواق أوروبا وآسيا ... والموضوع ده في خلاصة الحيرة اللى أنا فيها حاليا لو تحبي تاخدي نظرة عليه

http://www.nilemotors.net/Nile/429598-2015-2015-a.html