الموضوع: مصر مش أمى ... مصر مراة ابويا !

المشاركة الأصلية كتبت بواسطة دموع الثلج

حمد لله على سلامتك اولا
لو تسمحلى اسالك ايه هى الاسباب اللى وصلتنا لكده ؟؟؟؟؟؟؟؟؟؟
ايه اللى خلى ثمنك ارخص واسهل من دفع 500 جنيه ...؟؟؟؟؟؟؟؟؟؟؟؟
ايه اللى خلانا نحس بان البلد دى بقت ذى غابه والبقاء فيها للاقوى ..؟؟؟؟؟؟؟؟؟؟؟
ممكن تجاوبنى ............. طيب ممكن تقترح حل للمشكله .......... ده لو ليها حل اصلا
فى انتظار اجابتك

الله يسلمك واشكر ذوقك ومشاركتك
اجابة الثلاث اسئلة مش حلول للمشكلة ولكن محاولة لتفسير المشكلة

الناس على دين ملوكهم وشعب مصر عبيد من غلب , يعنى رمسيس التانى يحكم 68 سنة مفيش مشاكل هنبنيله مسلات ومعابد , هكسوس وحيثيين واشوريين ونوبيين وفرس وارمن ورومان واغريق وتركمان وجراكسة ومماليك والبان وماله ميضرش هناكل معاهم عيش وديتها ايه مع أيبك , مات أيبك مع أقطاى , مات أقطاى مع شجرة الدر , وهنأذن فى الجوامع للى يغلب . ييجى واحد زى على الزيبق يحط مبدأ نقول هيييييييييييه وفى وسط الضلمة تهل انت ولانعرف من فين او امتى ترفع بنيان الغلبان وتطاتى بنيان الوالى وترقص قصر السلطان ياعلى يازيبق , ولما يتقفش ويتعمل عبرة يمصمصوا شفايفهم ويقولوا حسرة على شبابه والله صغير !! طيب ياشعب يا نطع ماهو ودا نفسه فى داهية عشان مين مش عشانكم ! يقولوا انت عبيط عاوزنا نروح نخلصوا برجلينا ولا ايه , ياعم سيبك بكرة يطلع واحد تانى زيه يخلصنا ويكمل مشواره وآدينا مستنيين !!!
ووصل الاتراك وعرفوا طبع شعبنا من اول يوم , تديله بالجزمة تاخد منه احلى شغل تريحه يركبك وينسى نفسه وميشتغلش وانتشرت مقولة فلاح خرسيس , وابتدت مناحة ياشركسى يا ابو بندقية لا دين لا ذمة لا انسانية كرباج فى ايدك والناس عبيدك والفردة حتى عالجلابية ! وابتدت النكت والموروث الشعبى يزيد وعمك جحا اتخلق من خيالهم عشان يحكوا على لسانه اللى مايستجروش يفكروا فيه وهم نايمين ! وجم فرنسيس وانجليز وفتحنا كباريهات لعساكرهم وبيوت مشبوهة وعماد الدين وكلوت بيه وتاجرنا معاهم فى الأورنوص وشفنا يومين حلوين , لحد ما جه واحد صعيدى اسمه عبد الناصر وقال ارفع رأسك يا أخى فقد مضى عهد الاستعباد وارضك ملكك وابنك هيتعلم ونوديه بعثة كمان ويرجع دكتور وانت هتتعالج وتسكن ومحدش هيحكمك من السفارة تانى بس صبركم معايا شوية , قالوا هيييييييييييه ناصر يا حرية ياوطنية ياروح الامة العربية ناصر ناصر !! ومات ناصر وماتت مبادئه وكأن الراجل ما عاشش معاهم 18 سنة , واتغير الحال وبقى افرم افرم يا سادات وهييييييييييييييييييييه الانفتاح وصل واللى يحصلنى يكسرنى وسواق الاوتوبيس والورشة اللى هتتباع والاخوات نايمين وكلنا عارفين فيلم عاطف الطيب .
يعنى رامات الشعب ده بتفضى اول ما تعمل ريستارت للجهاز وينسى كل اللى كان عليه قبل كدة , هتعلمنا هنتعلم هتجندنا هنتجند هترقصنا هنرقص !!
وزى ما فيه حاجة اسمها خصائص شعوب زى الألمان النظام واليابانيين الدقة كذلك المصريين العبودية والنطاعة والفهلوة اللى هى بديل الاجتهاد ووجع القلب .

يبقى مين اللى وصل المصريين لكدة ؟ المحتل الغاصب ولا طبع ملة الشعب ده كدة ؟ يمكن لو اللى حكمه كويس بتبقى فترة تسكين لميكروب النطاعة اللى فى دمه ولما بيروح الحاكم الكويس بينشط الفيروس ويشم نفسه ويقول ايوة كدة يا راجل خلينا نعيش بقى !!

مش هقول الحكومة هقول الشعب والناس اللى لو طلعلهم مين من تربته هيقولوله ارجع ملكش دعوة احنا عارفين نمشى امورنا كويس !!

هتقولى والمصريين المحترمين هقولك دورى فى سلالتهم هيطلعوا عرب من نجد او أشراف من آل البيت او بلقانيين او من جمهوريات آسيا الوسطى .

مستنى اطلع من مصر بكرامتى وعلمى واسيبها لأهلها اللى هى لايقة عليهم وهم لايقين عليها كويس أوى ......

المشاركة الأصلية كتبت بواسطة gemino

موافق على كل كلمة اتقالت
بس ايه الحل ؟؟
*الكلام كبر و بقى على المكشوف خلاص و سياسة النعام المفروض يبقى فى دم و الناس تبطلها

العلم والمال فى الغربة وطن , اطلع منها وسافر

مشاركتى خلصت خلاص يا جماعة والكلام جاب آخره من اول عنوان الموضوع
وكفاية كده عشان نايل موتورز اللى بنحبه وبيصبرنا ميتقفلش بسببنا .
واوعدكم لو فرمنى توك توك مش هفتح بقى .
شكرا لكل من شارك وفضفض وطلع اللى فى قلبه .