الموضوع: قطع الغيار الأستيراد

السلام عليكم,
أنا عندى قطعة مفقودة فى الماتور, أو بالتحديد على الماتور, بلف كده, اتجاه واحد, بيركب فوق غطاء التاكيهات بمسمار الانكيه 5, وبيطلع منه خرطوم يدخل فى عمة الماتور, بيدخل هوا ويمنع خروج الزيت non-return valve
المهم البتاع ده أعتقد ميكانيكى ابن حلال اخده وانا مش واخد بالى, وبعدين الماتور ابتدى يجيب زيت من فوق كل مشوار, والناس تفتى واللى يقلك هانغير وش السلندر واللى يقول جوان غطا التكيهات, ببساطه عشان مافيش صنايعى واحد يوحد ربنا عارف العربية من الأصل
ما عادا الورشة اللى فى السابع, الميكانيكى اول ما شاف الزيت قالى هنا فى بلف كده وفهمنى, واحد بس فى مصر
المهم جابلى بلف كده صغير اى كلام وحتتين خرطوم, حاجة مؤقته كده عشان امنع الزيت لحد ما أنزل الحرفيين اجيب البلف بتاعها
مافيش من البلف جديد مبدئيا, مافيش فى الوكاله (اخرهم جولف 3 بالعافيه) ولا فى السابع
نزلت الحرفيين, وبس, قطع غيار العربية الابيزا 2006 تعتبر مجوهرات, تعامل معاملة الذهب عيار 24
فى شارع اسمه الجولف هناك, متفرع من شارع المرسيدس, تقريبا 2 او 3 اللى لقيت عندهم حاجة للعربية من الأساس, ومحدش راضى يفك القطعة دى من اى ماتور, قد عقلتين صباع كده, بلف عادى جدا بس بحجم معين, على اساس انه ماتور كامل, صباح الاحباط
سألت على مفتاح زراير الزجاج الكهربا, مفتاح عادى بيطلع وينزل, ب 250 جنية
هو فاهم كويس ان دى خرده مالهاش قيمة فعلية, بس انت محتاجها وعربيتك واقفة عليها
صباح الأستغلال, وتقريبا كلهم متفقين على التسعيره دى

اللى بفكر فيه دلوقتى انى الاقى اى موقع من بره اطلب منه القطعتين دول, لو امكن ونشوف اى حد نازل يجيبهم معاه!
او لو اى حد يعرف الاقى الحاجة دى فين بسعر معقول!
او لو حد عنده موتور بايظ اخد منه البلف ده!

من الأخر, احنا بتعاقب عشان عايزين نركب عربيات كويسه
وشكرا

كلامك ده بيخليني احمد ربنا مليون مره اني مجبتش الابيزا واشتريت بدالها ماتريكس
على الرغم من اني وقتها كنت مستغبي نفسي جداً اني عملت كده
الحمد لله وربنا معاك

المشاركة الأصلية كتبت بواسطة syd

الف مبروك يا باشا
بس مش عشان الفالف دة استبعد عربية زي الأبيزا من اختياراتي
انا شخصياً لو قفلت معايا - اما هركب طبة للخراطيم دي
او ممكن اغير محرك كامل

تحياتي

هغير ماتور على بلف يا باشا ؟؟
ومش هاينفع طبه عشان ده بيدخل هوا, هاشوف اى بلف اتجاه واحد واوصله بخرطوم من العمه

ما احترامى الشديد
الماتريكس عربية جميلة والكورى عامة حاجته كتير ومتوافرة
انا ماسوقتهاش بس سوقت كتير قوى, سقت مازدا 2013 ولانسر 2013 وصنى 2013 وياريس 2010 واوكتافيا 2010
ومش باخد العربيات دى لفه, لأ سقتها كل واحدة حوالى 2000 - 4000 كيلو
والاوكتافيا دى بتاعت والدى
بالنسبالى أنا, الابيزا 2006 دى تيجى بعد الأوكتافيا والمازدا, بدون مبالغة
من التقفيل جوه, المتانه, الاعتمادية, النعومة, الثبات, الكماليات, واهم حاجة "الأمان"
مع انها فى فئة سعرية بتاعت 60 - 70 الف واللى بحكى عليهم دول كلهم فوق ال 90 الف

هو من الأخر كده السوق المصرى للسيارات بيعاقبنا وخلاص

هو ده بالضبط, لأنى شفته فى عربية ابيزا تانى

Seat Ibiza Vw Polo BBY Engine Non Return Breather Valve | eBay

هو e-bay شغال فى مصر ؟؟