الموضوع: أي مشاكل في فيات 131 الحل عندي (إن شاء الله)

المشاركة الأصلية كتبت بواسطة michohat

السلام عليكم ورحمه الله وبركاته
مشاكلى الحالية ف العربية هى كالتالى
الكرونه بتون : فسايبها لحد ما تخلص خالص وهشوف هتصرف فيها ازاى (اجيبها استيراد ولا اعدل ولا اجيب التروس زى ما قريت فى موضوع هنا فى المنتدى) صح ولا غلط

موضوع كارونه 131 بقى بجد مشكله لان النضيف فى الاستيراد قليل اوى ده غير ان 131 فيها حوالى 6 موديلات للكارونه من حيث السرعه و الحاله الى بتبقى متخزنه بيها الكارونه بتخلى الارقام دى تتمسح من عليها فباتلى لازم تفكها عشان تعد التروس بنفسك عشان تجيب واحده سريعه الموضوع معقد جدا للاسف بس إن شاء الله ليه حلول وقت ما تقرر تغيرها انا ممكن ابقى معاك لاكن انسى موضوع التروس و موضوع التعديل ده مع اننا لو ملقناش الاصليه هنبقى مضطريت لكارونه تيوتا و دى على فكره بتعديلها بتتكلف اقل من تمن 131 و عموما حاول تخلى الميكانيكى بتاعك يربطلك صاموله الفلانشه بتاعت الكارونه ممكن تكون مفكوكه شويه و هيا الى مسببه الونه


كنت رحت مرة عند ميكانيكى قال لى ان المكنه خفيفة شوية وفصل خرطوم جلد ف الماتور عاوز اعرف هيا خفيفه صح زى ما بيقول ولو اه ازاى اصلحها لانى عاوز العربية تبقى مش بحاله المصنع

الخرطوم الى خلعه ده خرطوم الفايظ بتاع الماتور و بيتخلع لما الماتور بيكون خفيف بس هل العربيه الزيت معاك بينقص ؟ لو بينقص يبقى فعلا الماتور خفيف انت الى تقدر تحدد نسبه تلف الماتور من نسبه الزيت الى بينقص و هلى لو فكيت بوجيه بتلاقيه عليه زيت ولا لا اما بخصوص حل الموضوع ده انا مش بنصح بفكره طقم الشنبر دى خالص الا فى حاله لو الشمايز مفيهاش عتب و دى الى بيحددها الميكانيكى لما بيفك

المساعد الخلفى خف شوية: ف همشى بيها شوية لحد ما اعرف هغيرة بايه و سئلت واحد قال لى انه ممكن يمشى بيه شوية
عيب المساعد الخلفى فى 131 بيبان او العربيه ابتدت تعوم من ورا و ده اخطر عيوب المساعد الخلفى بالنسبه للعربيه دى لو العربيه فعلا بتعوم معاك من ورا يبقى مينفعش تصبر عليهم و خصوصا لو بتمشى على سرعات عاليه

الساعه اللى فى التابلوة : هيا الساعه شغاله بس المسمار اللى بتحكم فيه فى العقارب مش عاد شغال

ده الترس بتاع المسمار باظ ممكن اوصفلك حد كويس بتاع عدادات يغيرهولك و هيحطلك واحد معدن و بكده الساعه هتدوب و الترس ده لا

عداد السرعه: لما العربية بتبقى واقفة العداد مش بيكون واقف على الصفر

المشكله دى بردو هيحلهالك بتاع العدادات و انت بتعمل الساعه

عداد لفات الماتور: كنت حاولت افك التابلوة علشان اصلح الساعه فحصلت الخسائر التاليه وير السرعه انقطع فترتب عليه انى جبت واحد ورحت عند بتاع العدادات يركبه وقال لى انه هيظبط لى الساعه ففك وش العدادات البلاستيك وحرك العقارب بايده وقفل العدادات على كده فبعد ما خرجت من عنده لاحظت ان عداد لفات الماتور بقى اعلى من الضبط بتاعه (الميكانيكى كان لسه ضابطها على8 لقيتها فوق ال 10 يعنى زياده 5) فرجعت له قال لى انه مش جه ناحيته ودى شغله كهربائى رحت للكهربائى فك وش العدادات تانى و عدل المؤشر بتاع عدد لفات الموتور فهل العداد كده بقى بيقرا صح؟

هل لما العداد كان بيقرا معاك ان العربيه اعلا من عشره كنت لما بتبطل بتلاقيه عند الصفر ولا كان اعلا من الصفر لو كان اعلا من الصفر يبقى كان متحرك من مكانه فعلا و خلاص المشكله اتحلت لو كنت لما بتبطل العربيه كان بيرجع للصفر تانى يبقى كده فى احتمال ان العربيه هيا الى تكون عاليه و انت سبتها عاليه و اخرت الار بى ام او حصلت مشكله فى عداد الار بى ام فبقى بيحسب غلط و خلى بالك لو عداد الار بى ام بتاعك 8000 لفه بيكون الصفر بتاعه عند 5 لاكن لو كان 6000 لفه بيكون الصفر بتاعه عن الصفر


العربية خرجت من التجديد و محتاجه تجديد: لسه كنت مجدد العربية فى شهر 5 اللى فات ومكنت مديها لواحد كنت بثق فيه (بتاع دوكو كنت بتعامل معاه زى القومسيونجى يعنى اى مشكله فى العربية يجى ياخدها من البيت ويلف بيها يصلحها ويرجعها تانى ) فقال لى انه هيتولاها وانها هتبقى عروسه فقولت له انى عاوزها زى ما خرجت من المصنع فوثقت فيه وسبتها له
وكان غير اهل للثقة فشغل السروجى اى كلام وبوظ حاجات كتيره فيها اصليه وضيع اللى ضيعه (الكوبسته, الكراسى بتلق, السقف مش متقفل كويس,الفبرتين اللى على القايم من بره اتكسروا, فبره قايم الباب من جوه اتكسرت, فبره قايم الزجاج من جوه اتكسرت, والعازل , وحاجات كتيرة)
اما السمكرى فشغله مش كان كويس برضه ( رقع البارومه اللى ف الابواب من تحت وخلى الابواب فيها عالى وواطى, )
وكمان الدوكو طلع مشقق
وحاجات كتيرة بايظه مستكت ليها اجنده وبحاول احصرها
ولما عملت خناقه مع الراجل وكنت همسك فيه رسينا انه هيعملها تانى على حسابه فسبتها له ولما جبها لي لقيت كل اللى عمله فيها انه سحقها واداها ورنيش تانى
فقرفت منه ومن العربية
وخدتها وفى النيه انى هعملها تانى بس استحرمت انى اشيلها تانى فقولت امشى بيها سنه وفى السنه دى اكتب واسجل عيوبها واحاول ادور فيها على حد يساعدنى ارجع العربية بحاله المصنع ولانى مش عندى النيه انى ابيعها ولا افرط فيها لانى اتعودت عليها
فممكن تساعدنى ارجعها حتى للحاله اللى كانت عليها قبل التجديد الفاشل
انا من محافظه الشرقية ويا ريت لو عرفنا نتقابل ونتعرف ببعض

إن شاء الله تخليها زى ما انت نفسك فيها بالظبط و متقلقش كل العيوب الى انت بتتكلم عليها الى اتسبب فيها السروجى ليها حل إن شاء الله و الحجات دى موجوده استيراد كتير متقلقش

طب مشاكل الميكانيكا والعفشة اللى فيها ليهم حل ؟

ظهرت مشكله جديده فى العربية وهيا وانا ماشى لما بزود عن 100 الاقى العربية بتترج وبتتنطط والتابلوه والركسيون بيتهزوا جامد اكن الطريق بقى مليان عين قط وانا ماشى عليهم ولما بنزل عت ال100 الرجه والتنطيط يروح

روح مركز ترصيص و ظبط زوايا

1 - اكشف على الترصيص
2- اكشف على حاله الكواتش " لو الكاوتش فى كسر حيعمل كده "

*كان عندى نفس المشكله , السبب كان فرده كاوتش فى الخلف كان فيها كسر .
المشكله اتحلت مع تغير فردتين الكاوتش الخلفيتين .

يعنى ايه الكاوتش فيه كسر؟

المشاركة الأصلية كتبت بواسطة michohat

يعنى ايه الكاوتش فيه كسر؟

يعنى المداس بتاع الكاوتش مش مستقيم ....
الى يقدر يفيدك فى الموضوع ده واحد بتاع كاوتش او مركز الترصيص و ظبط الزوايا

يا ريت يابشمهندس حلول لونة الكرونة هل ممكن تتصلح واغير تروس ولا لازم اغيرها كلها ولو هغيرها تمنها كام ارجو من حضرتك الرد