بص هاقولك على حاجة ...
أول حاجة تشوف شنطة السويفت السيدان وتقارنها بالفيرنا ... (عشان أنا معرفش شنطة الفيرنا حجمها قد إيه) وتشوف هل هي مناسبة ليك وهاتاخد شنطك لما تكون مسافر مثلا (والسفر هو الفيصل على فكرة) لو كدة توكل على الله
لو حسيت إنها مش مناسبة يبقى هاتفكر في خيار بديل
المشكلة إن حضرتك بتقول إن مشاويرك كلها وسط البلد وده يتطلب عربية صغيرة
أولا عشان الركنة ... غير كدة كنت قلتلك على السوزوكي الإرتيجا مثلا عربية حلوة 1400 سي سي .. بس حجمها كبير على وسط البلد (هي نفس طول السيدان العادية على فكرة بس بشنطة ستيشان مش أكتر) لو حجمها يمشي معاك في وسط البلد يبقى فكر فيها
ثانيا عشان توفير الوقود لأن هي دي الحتة بتفرق عربية موتورها صغير وعربية موتورها كبير ... لأن أكيد الموتور الـ 800 سي سي وهو شغال مثلا جنب الموتور 1600 سي سي في نفس الإشارة هايحرق موقود أقل منه النصف على الأقل (والحياة في وسط البلد ما شاء الله كلها وقوف في إشارات وزحمة لعينة ... الـ 1200 من الـ 1600 هايفرق الربع .. كمثال نظري وعلى فرض إن العربيتين واقفين جنب بعض أو ماشيين بهدوووء تاتا تاتا ... بحيث إن الواحد هايكون مش محتاج قوة الموتور الكبير في حاجة نهائيا
وكمان العربية في وسط البلد مجتاجة تكون أتوماتيك عشان الشلل .. والأوتوماتيك بتاع الـ 1200 هايستهلك وقود زي المانيوال بتاع الـ 1600 مثلا
كل دي عوامل حضرتك محتاج تفكر فيها
سيبك من حاجة الشوبنج مثلا وإنها ما كانتش بتكفي في الشنطة بتاعة الفيرنا ... لأن حاجة الشوبنج لو اتزنقت هاتحط بقيتها على الكنبة ورا مع الأولاد ودي بتكون حاجة استثنائية ولمدة مشوار قصير .. (من المول مثلا للببيت فقط) ... الفيصل هي حاجة السفر ... لأن السفر لازم الكل يكون مرتاح في قعدته
وكمان فكر في الميتسوبيشي الأتراج لأن شنطة الأتراج أعتقد إنها أكبر من شنطة السويفت السيدان ... وده مجرد إعتقاد مش متأكد لأني ما عملتش مقارنة بينهم عشان اهتمامي كان منصب على السويفت الهاتش باك
والناس اللى ركبوا الأتراج هنا في المنتدى بيقولوا استهلاكها في الوقود كويس وحجمها كويس
نيجي بقى للفرق بين البيرسونا وحاجة زي الألتو اللى كانت معايا ... البيرسونا على طرق السفر أفضل بكتير أولا شايلة حاجتك براحتها بدون ما تكون تعبان وموتورها مش مضايقك على ضعيف مثلا ولا حاجة واستهلاكها للوقود مع تثبيت السرعة والطريق المفتوح بيكون هائل بمعنى الكلمة وبيوصل لـ 300 ك/20 لتر
الألتو في السفر موتور ضعيف وبيستهلك وقود كتير جدا بالمقارنة بالبيرسونا وكمان صغيرة وضيقة ومش شايلة حاجتك كلها
والعكس تماما في وسط البلد ... البيرسونا في وسط البلد حريقة ينزين وبدون مناسبة وانت مش محتاج الحجم ده أساسا سواء حجم العربية أو حتى حجم الموتور
والألتو مافيش بعد كدة راحة في وسط البلد من توفير وحجم ... عيبها الوحيد إنها كانت مانيوال
عشان كدة عجبتني جدا السويفت ... حجم عملي وموتور مش ضعيف زي الألتو ومش حراق زي البيرسونا ينفع في مشاوير وسط البلد وهايسد في السفريات العادية بدون مايكون تعبان
وزيها الأتراج .. بس الأتراج ما عجبنيش تقفيلها وشكلها جوة وكونها ثلاثة سلندر مش أكتر خصوصا إني كنت بفكر في الهاتش باك مش سيدان
أتمنى أكون أزلت ولو جزء من حيرتك
المفضلات