الموضوع: خبرة ملاك الصني الجديدة مع ارتفاع العربية

المشاركة الأصلية كتبت بواسطة grumby78

حضرتك طبعا عارف ان الفولفو لاتنتمي الى الفئه دي - اقتصادية - لامن قريب اوبعيد وان ثمن اقل فولفو s60 298000 جنيه ده غير سعر اعادة بيع ضعيف وتوكيل سياسته التسويقية فاشلة وده واضح من المبيعات في فئته و قطع غيار غالية جدا .. اما البونتو ايفو اللي سعرها اغلى من الصني برضو مع مشاكل في الجيربوكس وسعر اعادة بيع ضعيف وتوكيل سيء - أوماترا - مش عارف الجديد اخباره ايه ؟ وقطع غيار غالية في حين ان فيات علامة اقتصادية في اوروبا اصلا ... هنا في مصر بيتعاملوا معاها انها حاجه عالية !!! اما فورد فيستا ذات ال 158000 جنيه لاقل فئة اتوماتيك وعربية بالحجم ده وقطع غيارها غالية وتوكيلها عايش في كوكب تاني عشان متوقع مبيعات منها بالسعر ده .. فلا تعليق

دي سياسة سوق مش سياسة توكيل

السوق المصري العقيم بيفرض عليك عربيات تانية او محدودة زي الباسات او الجيتا او بي ام دابليو في فئة الفولفو .. هل ده معناه ان العربية وحشة؟؟ مش هنضحك علي نفسنا ونقول ان المشكلة في قطع غيار غاليا او توكيل زبالة .. قطع غيار الباسات والجيتا والاوكتافيا والعربيات دي كلها غاليا جدا وسعرها قريب من الفولفو

نفس الكلام علي الفيات البونتو اللي كانت في يوم من الايام ب ١٠٠ الف ومكانتش بتنافس في فئتها السعرية

والفيستا فينها دلوقتي بين العربيات؟؟؟

دي ثقافة شعب وسوق حافظ مش فاهم

توضيح بسيط :
انتشار نيسان في مصر ده لثقة الناس في اسم نيسان "قديماً" مش عشان جمالها مثلاً
المفروض الشركات بتتقدم يوم بعد يوم الا نيسان اعتقد انها وقعت بسبب الصني

المشاركة الأصلية كتبت بواسطة grumby78

يعني حضرتك زعلت وكتبت كلام كتير اوي عن بروتون وكل ده عشان قولتلك قبل ماتنتفد غيرك على اختياره ياريت تبص لاختيارك !! الغريب جدا ان حضرتك بتنظر على سلوك المستهلك المصري اللي انا شايفه طبيعي جدا في ظل غلاء الاسعار وفي نفس الوقت حضرتك راكب عربيه لاليها اسم ولاتوكيل محترم ولاقطع غيار متوفره ورخيصة ولا سعر منخفض يناسب انخفاض مستواها .. بروتون دي ممكن اقارنها بالصيني النضيف شويه وده اخر المنتج ده عندي .. يعني ايه الاغراء للمستهلك المصري انه يجازف ب 116 الف عشان عربيه ماليزي شكلها حلو .. ؟!!
في الوقت اللي حضرتك مستغرب من السوق المصري انا شايفه مفهوم جدا في ظل اسعار عالية جدا لعربيات متواضعة - زي بروتون كده - وتوكيلات تتعامل مع صاحب العربيه انه منجم دهب لازم تقلبه بغض النظر عن جودة الخدمة .. المصري بيشتري حاجه معمرة ليها سمعة سعرها كويس مصاريف تشغيلها مقبولة وسعر اعادة بيع مرتفع ..
اخيرا قالوا كده برضو عن نيسان لما ابتدوا يجمعوها في مصر وقالوا كده عن n16 اللي دلوقتي حليت للناس وانا ركبت الاتنين وال n17 افضل منها بكتييييير في كل حاجه . الاشاعات حاجه وتجريب العربيه في الاستعمال اليومي حاجه تانية . نيسان ماركة محترمة وتوكيل محترم جداااا مقارنة بباقي التوكيلات . ومازالت مبيعات نيسان تتزايد وده واضح جدا في شوارع اسكندرية عندي . دمت بصحة

ماهو حضرتك اللي جبت سيرة بروتون عشان كدة اتكلمت عنها

كل واحد حر في عربيته وكل واحد يختار اللي هيختاره .. بس قبل ماايختار لازم يعرف العيوب والمميزات لكل عربية .. لكن حضراتكم مصممين ان العربية ملهاش عيوب وده بعيد تماماً عن الصحة
محدش قال لحضرتك بردو اني بقارن البروتون بعربيات تانية .. كفاية انها من بلد مسلمة ده اللي شجعني اني اجيبها .. اداء العربية كمان من المميزات اللي خلتني اجيبها وده شيء بردو بعيداً عن النيسان صني
وقطع الغيار انا مش عارف ليه الاشاعة دي منتشرة اوي كدة .. قطع الغيار رخيصة مش غالية .. ارخص من البومة "خلي بالك انا بتكلم عن البودي" لكن اسعار الاجزاء الميكانيكية زيها زي البوما تقريباً .. يعني معرفش الناس بتقول عليها حاجتها غالية ليه .. الفتي لادين له .. مفيش عربية في الفئة السعرية دي قطع غيارها ارخص من الجين2 .. حتى الصني اللي مفروض انها منتشرة :)


وحاجة اخيرة احب اوجه نظر حضرتك ليها .. مش معنى ان العربية منشرة او مبيعاتها كتير تبقى تحفة ومفيش زيها .. انا لو معايا نيسان صني n16 وعايز اغير هجيب ال n17 وهندم على كدة .. تقريباً 80% من اللي جابو نيو صني ندمانين علي كدة ومنهم اللي تقبل العيوب ومنهم اللي عايز يخلص منها ومنهم اللي مش طايقها .. ال20% الباقيين عايزين عربية فيها تكييف كويس وواسعة وخلاص .. مش مهتمين بجري ولا بأمان ولا اي حاجة .. وممكن يكونو عارفين عيوبها ايه وعايشين معاها عادي .. او ممكن يكونوا بيحبو العربية لمجرد انها عربيتهم .. واللي عربيته مفيهاش مشاكل اتمنى ان ربنا يباركله فيها ويبعد عنه المشاكل

تحياتي ليك

حاجة كمان نسيت اقولها لحضرتك

الشركات حول العالم بتطور نفسها وبتدي موديل احسن وامكانيات احسن بعد الموديل اللي قبله وده واضح في بروتون مع ان انتاجها قليل بس بردو موديلاتها الجديدة احسن من القديمة زي الجين2 والبيرسونا

اما شركة نيسان .. لا تعليق الصراحة عليها .. دمرت سمعتها بالنيو صني بعيوبها وشكلها وادائها .. وفي الاخر حضرتك بتتريق عالبروتون انها "ماليزي" .. الصني هندي تقفيل مصري :))

انا معايا بروتون وصني والإثنين لهم ميزات وعيوب والإثنين يعتبروا في المجمل صفقة رابحة، ولا تزعلوا نفسكم الموضوع مش مستاهل وكل عام وأنتم بخير.

يا جماعة انا فتحت الموضوع لاستفسار عن ارتفاع العربية لاني ليا غرض في العربية اللي هشتريها مش أكتر

يعز عليا ان الموضوع يتقلب لمشادات وزعل بين الأعضاء


بس أنا بإذن الله هخليكم تضحكوا على فكرة المقارنة بين العربيات والماركات في حد ذاتها، و الكلام على ان العربية دي معيوبة ودي عربية ما تتركبش

أنا عايش في دبي، وبمشيئة الله راجع مصر نهائي على العيد وعلشان كده بسأل على عربية اهم حاجة فيها تكون عالية لان ليا ذكريات سيئة مع المطبات في مصر

المهم انا كان حصلي موقف في دبي مع حتة الحكم على عربية وانتقاد عيوبها، خلاني اغير نظرتي شوية للأمور

اول شهر في شغلي مديري طلب مني اروح معاه اجتماع خارجي بعربيته، و نزلت معاه الباركينج بتاع المبنى و ركبت عربيته اللي كان شكلها مش مألوف ليا وما دققتش في ماركتها او موديلها. أول ما دخلتها لقيت نفسي داخل مساحة ضيقة جدا و مضطر اتني ضهري علشان اعرف اقعد. وحسيت اني قاعد على ارض الباركينج بس جوة عربية من كتر انخفاضها. العربية اتحركت وطلعنا على الطريق السريع لقيته كبس بنزين وطار بسرعة جنونية، الموتور كان صوته فظيع و مزعج بس العربية سريعة جدا وبتاخد الملفات على نفس السرعة بدون ما تتهز ولا تميل شعرة، ويمكن هي دي الميزة الوحيدة اللي شفتها فيها.

خلصنا الاجتماع و رجعنا ونفس السيناريو. المهم طلعت من العربية قرفان منها ومن مديري، و حاسس انها كانت تجربة زبالة لركوب عربية سيئة عمري ما افكر اني اركبها تاني واستحالة افكر اشتريها ولو هاخد فوقيها مليون جنيه.

رجعت الشغل ونسيت الموضوع، وعدت 3 ايام قبل ما اكتشف بالصدفة من واحد زميلي اني كنت راكب عربية بورش

العربية كانت بورش تارجا S4 موديل 2014، عربية تمنها في مصر [OVERLINE]2 مليون و 110 الف جنيه[/OVERLINE] على حسب كونتاكت كارز (مع اني معرفش هي بتتباع في مصر ازاي وليه ولمين وازاي عربية بالانخفاض ده هتعرف تمشي 10 متر في الطرق المصرية)


عربية ب 2 مليون جنيه والعبد لله شافها معيوبة وعليها ملاحظات ومارضاش اني اركبها او اتعامل معاها. ومحدش يضربني، بس التريوس في ذمتي احسن منها خصوصا في مصر!!


يا جماعة, كل عربية وليها غرضها وناسها. واللي اشوفه حلو بعنيا غيري يشوفه مش حلو والعكس صحيح
بس المهم اكون راكب ومبسوط وواخد غرضي من العربية، وهو راكب ومبسوط وواخد غرضه من العربية.
في واحد غرضه سرعة وثبات لما يجري ويحرق على سرعات عالية اوي، هات عربية تحققلك غرضك وربنا يحفظك بس افتكر (ولا تلقوا بأيديكم الى التهلكة)

واحد تاني زي حالاتي غرضه ارتفاع عن الارض وبعد عن المطبات والحك واعتمادية واحتياج اقل للميكانيكية والصيانة وآخري في السرعة 140، هاخد غرضي من عربية زي التريوس ومش هدي ودني مع اللي بيقول ثباتها وحش ولا غيره ما هو طبيعي الثبات بيقل مع الارتفاع مش عيب في الماركة نفسها وانا مش بتاع سرعات اصلا

لولا اختلاف الأذواق لبارت السلع

تخيل لو الناس اجتمعت على حب عربية واحدة ونزلت الشارع ما لقتش غير الموديل ده هو اللي ماشي في كل حتة


انا رأيي ان كل العربيات والموديلات اللي جت سيرتها في الموضوع ده عربيات محترمة وبتأدي الغرض منها في النهاية و مفيش عربية منهم حلوة في المطلق او وحشة في المطلق

النيسان صني عربية محترمة ، قد يكون فيها بعض العيوب زي اي عربية، بس مش كوارث تخليها ما تتجابش وفي الأخر بتأدي غرضها بكفاءة في مقابل سعر لا ينافس وكل العربيات فيها عيوب والكمال لله وحده

البروتون عربية محترمة واثبتت نفسها وبرضه فيها عيوب بس في نهاية اليوم بتأدي غرضها على احسن وجه

كل العربيات اللي بنتكلم فيها عربيات حلوة جدا وفي ناس كتير مش طايلة تجيبها

مش معنى كده اني بكدب كلام الاخوة اللي بيهاجموها بشراسة او اي حد بيهاجم عربية من اي نوع وطلع من تجربة مريرة مع موديل عربية معينة نصيبه جه وحش فيها وطلع عينه فلوس ومشاوير وحماية مستهلك واحباط او حتى حادثة لا قدر الله، بس للأسف احيانا الكلام في المنتدى هنا بيبقى مبالغ فيه ومش عقلاني وفيه درجة كبيرة من التعميم وعن دون تجربة ولسوء فهم، زي مثلا اللي يقارن ثبات عربية على السرعات العالية من فئة SUV بثبات عربية سيدان ويبني كلامه على ان ال SUV وحشة وهي المقارنة اصلا غلط لان دي ليها غرضها وناسها ودي ليها غرضها وناسها

كل ده كوم، والمشاكل الفردية اللي بتظهر في العربيات كوم تاني - بس مش معنى كده انها مشكلة عامة في الماركة او الموديل، دي بتبقى نصيب

هختم كلامي بمعلومة غريبة سمعتها وبتأكد الحتة الاخيرة

العربيات في الاول ولا في الآخر بتتصنع بأيدين بني آدمين مش معصومين من الخطأ
والشعب الأمريكي مثلا عارف الموضوع ده، بيعمل ايه؟
العربية الجديدة بيكون ليها تاريخ للتجميع
معظم الامريكان بيفضلوا يشتروا عربية متجمعة يوم التلات أو الأربع أو الخميس، ودي بتبقى من وجهة نظرهم اقل ايام ممكن العربيات المتجمعة خلالها تظهر فيها مشاكل أو عيوب صناعة
ليه؟
وجهة نظرهم
الاتنين (بداية الاسبوع) بيكون لسة العمال راجعين من آخر الاسبوع وما سخنوش!
التلات بداية التألق
الأربعاء وصلوا للفورمة
الخميس المنحنى ابتدى يقل بس برضه كفاءة
الجمعة النشاط قل وكله بيفكر في نهاية الاسبوع اللي قربت
السبت والأحد أجازة!

كل عام وانتم بخير وربنا يبارك في عربية اي واحد من اي ماركة وياخد منها غرضه واكتر
وربنا يعوض على اي واحد مر بتجربة وحشة مع عربية و ينوله الاحسن منها

المشاركة الأصلية كتبت بواسطة grumby78

يعني حضرتك وقت عيوب البروتون بتقولي انا عارفها ومتعايش معاها .. اما النيسان صني اللي انت مش مالكها قاعد بتعملها احصائيات ؟؟!!! 80% قرفانين و 20% متعايشين ؟؟!! بذمتك ده كلام يترد عليه ؟ يعني حضرتك قاعد تنظر وتعمل احصائيات وانت قاعد قدام جهازك ومش مالك للعربية ومعاك عربيه ماركة مجهولة وبتقولي كفاية انها من بلد اسلامي !!! طب ارد عليك اقولك ايه ؟ يعني حوار اللامنطق والارتجال و السوق المصري اللي حضرتك بتتمسخر عليه انت غلبته بصراحة بالكلام بدون اي سند وكمان احصائيات جاهزه !
العربيه مش عاجباك حقك وخلاص عرفنا انها مش مريحاك ونيسان الغلبانه ضيعت نفسها وبتتوارى عن الانظار وملاك العربيه وانا منهم متعايشين .. الرسالة وصلت وكلامك في النهاية لايمت للحقيقة بصلة .. شكرا

انا مش عارف ليه واخد الكلام على قلبك اوي كدة

او يمكن معندكش كلام ترد بيه .. بردو حضرتك محسسني ان شركة بروتون دي من بقيت عيلتي وانا مش واخد بالي .. كدة كدة هيا لاتعنيني في شيء عشان اموت نفسي دفاعاً عنها

وبعدين الاحصائات اللي حضرتك بتتريق عليها دي مبنية على تجارب واراء ناس كتير جداً مش مجرد واحد ولا اتنين ولا حتى تلاتة عملو مواضيع هجومية ... تحياتي .. وواضح مدى الاسى اللي حضرتك وصلتلو لما معرفتش ترد لان حضرتك اصلاً اللي مدخلني في الموضوع مش انا