قريرى عن الـ 301 بعد 7500 كم - بحياد قدر الامكان -

**mmkamalh** · 14-07-2014 03:33 PM

الأول انا عامل تقريبا 7500 كم، 301 فيرانى هاى لاين:
بعد مالعربية اتخبطت وهى راكنه تحت البيت و انا مسافر بره مصر، رحت التوكيل و راكبت مرايا شمال جديدة و سمكرة الباب الشمال و دهنته و الحمد لله انها جت على قد كده.... التأمين فعلا مهم كان زمانى راكنها لحد دلؤت :)
نيجى للموضوع:
اشتكيتلهم في توكيل غمرة من موضوع تقل العربية في درجات الحرارة العالية مع التكيف، و ده كان بيحصل لما الحرارة تكون 43 وانت طالع، العربية من الثبات للحركة تقيلة و استجابتها ضعيفه في الاول، مع العلم ان التكيف قايم بتبريد جيد جدا في الظروف ديه، يعنى سحب من الثبات ضعيف مع تبريد جيد جدا! ... المهم شرحت الموضوع للمهندس مجدى و انا بستلم العربية بعد الحادثه، قالى دى تظبيتة تكيف و دخلها تانى و غير الـ configuration بتاعة التكيف و قالى جرب... النتيجة بالنسبالى مُرضية، العربية لازال تبريدها ممتاز و سحبها اتحسن كتير من الثبات "70%" تقريبا... ديه المشكلة الضخمة اللى كنت شايفها في العربية و اتحلت الحمد لله بنسبة كبيرة
ثانيا: الاعتمادية
انا استخدمت العربية في ظروف قاسية جدا اخر 3 اسابيع، و اخر أسبوع تقريبا عامل 1300 كم بالعربية، في عز الحر طرق زحمة و مفتوحة، ممهده و مكسرة و الحرارة كانت في وقت من الأوقات 48 على شاشة الكونسول..... بصراحة العربية اثبتت انها اداها و ادود :) العربية لم يتغير أدائها نهائي في كل الظروف،.... لحد دلوقت التيل كويس لكن الله اعلم لما أوصل للعشرة هيبقى ايه النظام... حاجة تانية انا كنت قاصد بصراحة اقتع نفس العربية اليومين اللى فاتو عن عمد، كنت بحطها على السبورت مود و مشغل التكيف و بحرق جامد في عز جهنم اللى احنا فيها.. و العربية أدائها ثابت و ممتاز

ثالثا: ملاحظات أخرى
بصراحة كنت أتمنى ان عفشتها تبقى انعم من كده بس الحلو ميكملش، العفشة قوية لكن فعلا ناشفة

أخيرا: مقارنة بعربيتى الاكسنت 2010 اللى لسه معاية لحد الان، اقدر أقول الكوري فعلا انعم مقابل أداء اقوى و احسن من الـ 301 على الرغم ان الـ 301 مش VVT .... من الاخر العربية فعلا جميلة و تستحق فلوسها..

محمد كمال

**hero 99** · 14-07-2014 04:14 PM

ﺷﻜﺮﺍ ﻋﻠﻲ ﺍﻟﺘﻘﺮﻳﺮ ﺍﻟﺠﻤﻴﻞ
ﺑﺲ ﻟﻮﺳﻤﺤﺖ ﻫﻮ ﻣﻮﺿﻮﻉ ﺗﻘﻞ ﺍﻟﻌﺮﺑﻴﺔ ﻓﻲ ﺩﺭﺟﺎﺕ ﺍﻟﺤﺮﺍﺭﺓ الﻋﺎﻟﻴﺔ ﻣﻊ ﺍﻟﺘﻜﻴﻴﻒ ﺍﺗﺤﻞ وﻭﻟﺎ لسا

**عمرو بندق** · 14-07-2014 06:43 PM

شكرا على تقريرك و ربنا يعطيك خيرها و يكفيك شرها
بس لو تسمح تحكى بالتفصيل عملت ايه مع التأمين علشان أنا مش عارف أستفيد من التأمين ازاى

**airac2002** · 15-07-2014 10:46 AM

شكرا بأستاذ محمد علي التقرير الرائع ده لأني انا عامل نقس عدد الكيلومترات تقريبا وحصلت معايا نفس مشكلة التكييف والسحب من الثبات ولما رحت مركز غمرة قابلني المهندس احمد وقام بعمل اعادة برمجة وهي الان ادائها مقبول بنفس النسبة الي كتبنها بتقريرك للحركة من الثبات وفعلا هي سيارة جميلة
وكل سنة وانت طيب ورمضان كريم

**amrelsaqqa** · 15-07-2014 10:52 AM

ما شاء الله ربنا يباركلك فيها ويحفظهالك ، بس موضوع ظبط التكييف ده فات عليه قد ايه ؟؟
اصل ناس كتير معاهم الاوتوماتيك وبيقولوا ان التوكيل بيشتغلهم وضعف السحب بيفضل موجود معاهم

وعلى فكرة العربية vti وده المرادف للـ vvt عند بيجو وستروين

VTi Engine - Wikipedia, the free encyclopedia

وبرضه انت قارنت النعومة بينها وبين الاكسنت ونسيت تقارن الفرامل والثبات ;)

**mmkamalh** · 15-07-2014 11:28 AM

المشاركة الأصلية كتبت بواسطة hero 99

ﺷﻜﺮﺍ ﻋﻠﻲ ﺍﻟﺘﻘﺮﻳﺮ ﺍﻟﺠﻤﻴﻞ
ﺑﺲ ﻟﻮﺳﻤﺤﺖ ﻫﻮ ﻣﻮﺿﻮﻉ ﺗﻘﻞ ﺍﻟﻌﺮﺑﻴﺔ ﻓﻲ ﺩﺭﺟﺎﺕ ﺍﻟﺤﺮﺍﺭﺓ الﻋﺎﻟﻴﺔ ﻣﻊ ﺍﻟﺘﻜﻴﻴﻒ ﺍﺗﺤﻞ وﻭﻟﺎ لسا

اتحل معايا بنسبة 70% تقريباً، بالنسبالى أداء العربية بعد إعادة برمجة التكييف مُرضى بنسبة كبيرة.... اكرر التحسن من وجهة نظرى 70% و ليس 100%

**mmkamalh** · 15-07-2014 11:30 AM

المشاركة الأصلية كتبت بواسطة airac2002

شكرا بأستاذ محمد علي التقرير الرائع ده لأني انا عامل نقس عدد الكيلومترات تقريبا وحصلت معايا نفس مشكلة التكييف والسحب من الثبات ولما رحت مركز غمرة قابلني المهندس احمد وقام بعمل اعادة برمجة وهي الان ادائها مقبول بنفس النسبة الي كتبنها بتقريرك للحركة من الثبات وفعلا هي سيارة جميلة
وكل سنة وانت طيب ورمضان كريم

الله اكرم الف شكر و ربنا يباركلك فيها ان شاء الله

**mmkamalh** · 15-07-2014 11:37 AM

المشاركة الأصلية كتبت بواسطة amrelsaqqa

ما شاء الله ربنا يباركلك فيها ويحفظهالك ، بس موضوع ظبط التكييف ده فات عليه قد ايه ؟؟
اصل ناس كتير معاهم الاوتوماتيك وبيقولوا ان التوكيل بيشتغلهم وضعف السحب بيفضل موجود معاهم

وعلى فكرة العربية vti وده المرادف للـ vvt عند بيجو وستروين

VTi Engine - Wikipedia, the free encyclopedia

وبرضه انت قارنت النعومة بينها وبين الاكسنت ونسيت تقارن الفرامل والثبات ;)

الله يبارك فيك يا عمرو ... موضوع إعادة برمجة التكيف تقريبا كنت عامل 5000+ كم من حوالى 5 أسابيع بالتقريب، زى ماقولت ان التحسن ملحوظ جداً و نسبته في نظرى تقارب الـ 70% ... شكرا على المعلومة المهمة الخاصة بالـ VTI :) طمنتنى اكتر ان الموتور updated :)
اما عن الفرامل و الثبات... الفرق مش محتاج يتناقش، انا بسوق عربية مراتى الاكسنت دلؤت بحس انى راكب عربية ملاهى :) :) .... هما ولاد الايه فنانين في عمل مواتير انعم من الحرير.. لكن باقى عناصر المقارنة لصالح الـ 301 من غير نقاش :)

**عمرو بندق** · 15-07-2014 12:17 PM

ايه يا رجالة هو شرح موضوع التأمين صعب للدرجة دى ... رمضان كريم

**mmkamalh** · 15-07-2014 12:34 PM

المشاركة الأصلية كتبت بواسطة عمرو بندق

ايه يا رجالة هو شرح موضوع التأمين صعب للدرجة دى ... رمضان كريم

بص يا عمرو باشا، انا كنت مأمن على العربية من اول يوم، تأمين شامل، لما حصلت الحادثة و رجعت من السفر كلمت مندوب التأمين حكيتلوا اللى حصل، قالى تكاليف الإصلاح على اللى انت بتحكيه متكملش 10000 جنية "مراية و سمكرة باب شمال و رش الباب"... لو فوق الـ 10 تلاف لازم محضر الأول... اطلع على التوكيل... طلعت على التوكيل... عملت مؤيسة حادث و سبت العربية و بعت المؤيسة للمندوب على الإيميل... تانى يوم بعت حد من عندهم يعياين العربية في التوكيل و يوافق على المؤيسة.. اول ما يوافق على المؤيسة التوكيل يبداء يشتغل... اشتغل و خلص.. كلمونى رحت استلمت و دفعت من جيبى الفلوس... و خدت العربية تانى يوم على التأمين عاين العربية بعد الإصلاح و مضى مهندس المعاينة انها تمام ... و بعديها بحوالي 20 يوم استلمت شيك بالمبلغ اللى دفعتوا... معلومة انا مأمن مع مصر للتأمين