بخصوص استرا انجوى محتاج المشورة للضرورة القصوى

**bahy55** · 26-07-2014 02:50 PM

المشاركة الأصلية كتبت بواسطة omar mahmoud

هل في تاجر محترم في عمله و بيراعي ربنا في شغله؟؟؟(طبعا في بس قليلين) حضرتك المفروض اول واحد تنفض لكلامه هو التاجر لإن المرسيدس بالنسباله اي كلام و الفيرنا هي جميلة الجميلات.
لو الأوبل فعلا بتولع في الصيف يبقي إزاي ناس كتير معاهم اوبل من اول ما نزلت مصر في التسعينات و في ناس جايبة اوبل من قبل سنة 1950 و اقصي دليل علي اللي معاهم العربية و كل مشاويرهم بيها سفر صيف شتا.
لو اشتريت العربية هتكشف علي العربية كلها بما فيها دورة التبريد زيها زي اي عربية.انا بقابل ناس كتير بتقول الكلام الغريب ده لحد ما اتشليت منهم.

انا قدامى نموذج حى زميلى اللى معاه العربيه دى بيروح بيها شرم على طول لان شغله ف شرم وعمره مااشتكى من حرارة . مع العلم ان شرم درجه حرارتها زى السعوديه كده مش اى عربيه تستحمل حرارتها . لك ان تتخيل

**bahy55** · 26-07-2014 01:32 PM

ايه ياجماعة ؟ مفيش حد ف المنتدى كله معاه العربيه دى يقولى اشتريها ولا ابعد عنها ؟ ويقولى العربيه مريحاه ولا كل شويه عند ميكانيكى زى ما تاجر قاللى ؟ اتمنى حد يرد لانه كلامكوا هيفرق معايا جدا

**HISHAM80** · 26-07-2014 02:13 PM

حضرتك جربت الفتيس easytronic

**bahy55** · 26-07-2014 02:47 PM

المشاركة الأصلية كتبت بواسطة hisham80

حضرتك جربت الفتيس easytronic

جربته اه فى العربيه دى . لانى بسوق مانيوال واوتوماتيك ف ملقيتش اى مشكله ف التعامل معاه

**pharohtemo** · 26-07-2014 04:37 PM

من كام أسبوع كنت بأفكر مع نفسى و وصلت لقرار إنى لما أغير العربية مش حأركب أوبل تانى أو بمعنى أدق مش حأركب ألمانى تانى... العربية بتسخن مع أنها عمرها ما عطلت بسبب السخونة بس الجو الحر مع الزحمة و الوقوف المتكرر فى الإشارات بيأثر سلبيا على الفتيس الإيزيترونيك و ده خلانى غيرت طقم دبرياج قبل كده ..
الألمانى صيانته غالية .. الألمانى تكنولوجيا معقدة .. الألمانى بلاعة مصاريف .. الألمانى تكييفه أضعف من اليايانى و الكورى و ممكن نكتب قائمة طويلة تخلى الألمانى ميبعش عربية فى مصر :)
طيب ...
برضه من ما كام يوم و أنا واقف فى إشارة كافى خيرى شرى و ساكت لقيت مرة واحدة حاجة رزعت فيه من ورا ناحية اليمين لدرجة إن العربية أتحركت !!! نزلت و انا متأكد إنى حأفطر على اللى خبطنى و بعد ما بصيت لاقيت اللى خبطنى (ميكروباص سوزوزكى) أتبهدل و أنا يا دوب الرفرف أتحك و دى مش اول مرة أتخبط من ورا و لما بكشف على العربية مش بلاقى حاجة و ده نادر لما تلاقيه إلا فى الأوبل و الألمانى ...
جه فى بالى برضه أوقات بأكون بأخد ملف حاد و أنسى نفسى و مادوسش فرامل و بعدين ألاقى كل اللى كانوا جنبى بقوا ورا و مضطريين يهدوا و ده علشان أنا راكب أوبل و ألمانى لازق فى الأرض و ثابت فى الملفات ... أفتكرت لما كنت بأخد غرزة أو بأعدى عربية و أرجع ألم تانى و العربية بتتحرك زى ما أنا عايز من غير سنتى زيادة و لا إنحراف و غيرى لو مش راكب أوبل أو ألمانى اللى عربيته بتعوم أو بتسحف منه..
كل ده و السحب جميل و الأداء مرضى و فى أمان تام (بإذن الله و أمره)
الخلاصة مفيش عربية كاملة و علشان تجمع كل حاجة كويسة فى عربية واحدة يبقى حتدفع كثير أوى و حتلاقى بند أو بندين ناقصين عن عربية أحلامك .. فكر كويس و شوف أنت عايز إيه من عربيتك و أكشف عليها علشان تعرف أنت بتشترى إيه و حتتعامل معاها إزاى بعد كده و ربنا يوفقك لعربية كويسة