امبارح وانا مروح مره واحده العربيه الدواسه طريت تحت رجلى اوى بتاعه الدبرياج ومفيش اى غيار عايز يتاخد خالص كل الغيارات واقفه بطلت العربيه ودورت تانى نفسى الكلام حاولت اخدا لغيار والعربيه مبطله اخدت غيار وفضلت ماشى على التانى لحد اما روحت وكملنا الميكانيكى وروحتله على التانى بردو والعربيه عماله تبطل وحالتها متسرش بالمره قالى عايزه طقم دبرياج ومش هنقدر نعرف عايزه بليه ولا لا الا لما نفتح ونشوف

روحت جبت طقم لوك من نيو اوبل فى المعادى ( مش واثق اذا كان اصلى ولا لا ) بس هناك فى نيو اوبل ناس محترمه الصراحه واكدوا انه اصلى بس اللوك المخلوع من العربيه علامه لوك محفوره عليه كده وتحس ان العلامه فعلا اصليه لكن التانى كدسك مفيش فرق لا فى وزن ولا خامات بس هيا العلامه والحاجات الى تقلق ديه

المهم ركبنا الدسك والاسطوانه وطلع البليه قالى البليه سليمه حرام نغيرها على الفاضى وقفلنا على كده

النتيجه دواسه الدبرياج كان بقالها اكتر من سنتين تقيله جدا واخدت عليها على كده لدرجه انى لما كنت بسوق اى عربيه تانيه يبانى او كورى كنت بباه مش عارف اسوق من نعوميه الدواسه وعندى كانت تقيله اوى

دلوقتى الدواسه خفيفه اوى ما شاء الله بس عاليه شويه ومش واخد على دوستها وحاسس انى بتعلم سواقه من اول وجديد

الغيارات بقت سلسله جدااا فى نتشات خفيفه اوى بس بتروح مع الوقت ورايى فيها ان الميكانيكى لما فتح قالى الفتيس مكنش فيه زيت خالص وحطيت زيت فالفولين موبيل 80 90 العليه البيضه الى غطاها ازرق ولما الفتيس بيقعد فتره من غير زيت بياخد على كده ولما بيخش عليه زيت بيتبرجل

تكلفه الليله كلها

طقم دسك واسطوانه 950 جنيه

زيت فتيس 50 عبوتين العبوه ب 25 جنيه

جركن ميه حمرا توتال اربعه لتر 75 جنيه وجركن تانى احتياطى معايا الاجمالى 150

اكراميات ومراضيات 20 جنيه

مصنعيه 300 جنيه

تقريبا الاجمالى 1500 جنيه والحمد لله من امبارح وانا مروح لحد دلوقتى حاسس انى راكب عربيه تانيه السحب ممتاز ما شاء الله الدواسه خفيفه اوى حاسس ان استهلاك البنزين اتحسن لوحده

قلقى الوحيد ان الطقم مكيونش اصلى ويحصله حاجه بسرعه وبصراحه مش طالبه خالص دلوقتى انى اغيره دلوقتى والى اعرفه ان طقم الدبرياج ممكن يقعد بالعشر سنين لو فى اهتمام بيه ونفسى الجديد داه يقعد كده

رايكم واقتراحاتكم ونصيحتكم