الموضوع: انطباعى عن مرسى مطروح

معلهش يا أستاذ

yuong313

ممكن أعرف السعر ده كان من يوم كام ليوم كام

والغرفه العائليه دى ممكن يقيم فيها كام فرد

ولو تليفون القريه يبقى شكرا جزيلا

وشكرا جزيلا

السلام عليكوا يا احلى شباب
احب اعرفكوا بنفسى انا اسمى اسماعيل شاب من مطروح ولما قريت كل المشاركات بتاعتكوا حبيت اقول راى بعد اذنكوا
انا هقول كل حاجه ايجابيات وسلبيات زى ماحنا شايفينها كاهل مطروح
نبدا من لحظه وصولك الى بوابه الكيلو 10 لحد ماترجعلها تانى بالف سلامه
اولا وانت جى حمدلله على سلامتك هتقابل مطبات كتير اوى بس هى مريحه بصراحه
ثانيا هتلاقى السماسره الكتير والمنتشرين فى كل حته من الشوارع عشان الشقق والشاليهات ودول بيبقوا ............
ثالثا موضوع الشقق , على حسب الوقت اللى جى فيه مثال : جاى فى شهر 6 هتلاقى الموضوع مناسب الى حد ما .
طيب جاى فى شهر 7 وشهر رمضان هتلاقى الاسعار فى الارض ودى بتبقى فرصه اخوانا المسحيين للمصيف
طب جاى فى اسبوع العيد احنا هنا بنقول على اسبوع العيد ( النار النار النار والدنيا مولعه نار ) كل حاجه بتزيد اضعاف وده هنقول عليه استغلال بس اللى يغيظ ان الناس فى العيد بتوافق على الهبل ده وبالتالى الدنيا بتبقى هيصه
طب الاسعار تظبط امتى تانى باذن الله شهر 9
رابعا : سكنت ونازل تشوف دنيتك الشواطى بقى بالنسبالنا احنا اهل مطروح بنقرف من شواطى الكورنيش بامتداده من روميل والبسنت والنخيل لحد البوسيت وحاليا بنضم عليهم الغرام وكليوباترا وده عشان ضغط المصيفين على الحتت دى عشان قريبه للمدينه والسكن والهيصه وكمان عشان الشواطى دى اسعارها زفت جدا وخدماتها زى اسعارها وزحمممممممممممممممممممممم ه طب فاضل شواطى ايه فاضل عندك الابيض بثلاثة بوابات وشاطى عجيبه اللى فعلا عجيبه وكمان شاطى الرميله ومينا حشيش وبعض الشواطى والاماكن الخاصه بينا احنا اللى محدش يعرفها غيرنا( حته تميز )
خامسا طلعت من المايه خلاص وروحت هتتفاجا بعدم وجود مايه او وجود مايه مالحه او لو حظك حلو هتلاقى مايه حلوه بس مش للشرب
سادسا نازل تتفسح بقى بليل ايوه نعترف ان الاماكن محدوده فى مطروح بس لذيذه او هى ليها جو خاصه كده شارع اسكندرية وسوق ليبيا والكورنيش وتاجير العجل والموتسكلات وشويه حاجات كده بمناسبه اسعار سوق ليبيا فهى غاليه لسببين اولا مطروح مفيش فيها شغل غير فى الصيف وتانى سبب ان هى بعيده فمصاريف النقل زياده كتير
سابعا منتجات اللب والزيتون الاول اللب فمحمصه نصر اللى احنا بنقول عليها نصر المسيحى ( لان فى محمصه نصر الاسلامى دى رقم 2 فى مطروح وبعد كده كله بطيخ ) نصر واخد شهره جامده لان منتجاته ممتازه لان هوا حاليا عنده مزارع للب فى البحيره خاصه بيه فمنتجاته ليها طعم خاص
وبعد كده الزيتون والزيت والبلح ( هنا هقول بؤ صغير كده ) انا مدرس وشغال فى سيوه منبع الحاجات دى فعلا يا جماعه الحاجات دى فى سيوه السنه دى غاليه وده لعده اسباب ملناش دعوه بيها بس فى الاخر الاسعار اوفر حبه بس مقبوله
ثامنا لو انت جى من غير عربيتك جى مواصلات يعنى فعلا هتلاقى حاجات غريبه فى المواصلات وده راجع لان فى ناس كتير بتيجى وافدين فى الصيف يشتغلوا على التاكسيات والمكروباصات وبالتالى بتقول اى اسعار وكمان مش بتبقى عارفه الاماكن وفى ناس بتبقى عندها جشع عادى يعنى زى اى محافظه
تاسعا بقى من اهم مميزات مطروح بقى ان عماراتها مش عاليه وده بيخلى البلد كلها فيها تراوه وماتتخنقش فيها وكمان من المميزات النظافه بجد الدنيا نضيفه جدا بالمقارنه باسكندرية وعلى فكره انا اصلا اسكندرانى ومن سيدى جابر عشان الشتيمه بس بصراحه اللى بيضايقنى فعلا فى مطروح الزحمه اللى بتحصل من الجماعه المصييفين يعنى مثلا ماشى فى شارع اسكندرية وعاوز تخش اى شارع جانبى ادامك حاجه من 3 ياتزق الناس بالعربية وياتنزل تحركهم بايدك يا ربنا ينعم عليك بالصبر لحد مايتحركوا وكمان الجماعه اللى معاهم عربيات عاوز يروح مكان ومش عارف يروح واقف فى نص الشارع ويسال او يروح داخل يمين او شمال او يرجع ومش مهم اللى وراه عادى بقى
عاشرا انت بتبقى فى نفس القصه دى الفتره اللى انت قاعد فيها لحد ما تقرر تروح وتوصل بالف سلامه باذن الله لبلدك ونشوف باذن الله السنه اللى جايه
اى حاجه تحبوا تسالوا عليها انا تحت امركوا