الموضوع: انطباعى عن مرسى مطروح

بسم الله الرحمن الرحيم

هتكلم معاك شوية عن انطباعى عن مرسى مطروح وللعلم دى مش اول مره اروح فيها بس انا هتكلم بالذات عن المره دى

لو عايز تتفسح و تمشى براحتك فى الشوارع هناك يبقى عندك من الصبح لغاية قبل المغرب فقط بعد المغرب لو جدع تنزل تحط رجلك فى الشارع من تحت بيتك بس بجد حاجة قرف

منصحكش تشترى لب نهائى من هناك فيه محل اصحاب مسيحين هناك مش فاك اسمه بالظبط ده بقى حاجة مسخرة بجد مش عارف اوصف ازاى طوابير من المحل لغاية نص الشارع و الناس بتتعارك وكان معندهمش لب فى بلادهم علشان تاخد بس رقم حجز مش اقل من ساعه و الله

الناس اللى كان دورهم الساعه 10 الصبح لاقيتهم واقفين لغاية الساعه 3 و لسه معملوش حاجة


منصحكش تشترى اى حاجة من هناك نهائى لان الاسعار نااااااااااااااااار و بالذات سوق ليبيا اللى كل منتجاته مصرية عادى

يعنى الاسعار عندنا فى اسكندرية ارخص كتيييييير من مرسى مطروح

مرسى مطروح مدينة بدائية و متوسط البنايات هناك 7 ادوار ولما نقول فيه ناطحات سحاب بتبقى 10 ادوار فقط بخلاف اسكندرية اللى اقل عماره جديدة فيها 15 دور دلوقتى و بتوصل ل 25 دور

مفيش اماكن جمالية هناك حتى البحر هناك زبالة بمعنى الكلمة وكرهت حاجة اسمها بحر بسبب المصيفين هناك يعنى الناس بتنزل البحر كانه الحمام بتاع بيتهم اللى عايز ولامواخذه وانا اسف جدا فى اللى هقوله بيتبرز فى البحر يعنى البحر حاجة تقرف بجد

الحاجة الوحيدة اللى عجبتنى فى مطروح هى نظافة الشوارع نادرا ما تلاقى ورقة فى الارض بعكس اسكندريه

الناس هناك عصبية اوى و مفيش اى احترام الا من رحم ربى لو لاقيت ناس محترمه

فى كل مكان هتلاقى سايس واقف وكانه بيعمل شغل بقى و كذا مره اتعارك معاه و كرهت مرسى مطروح بسببه



اللى بيروح مطروح بيبقى رايح علشان يشترى الاتى :-

- لب و محمصات
- زيتون سيوه
- زيت زيتون

دول الاهم لاى واحد بيزور مطروح احب اقولك و الله هتلاقيهم فى بلدك ارخص كتيير ونفس الجوده

يعنى الزيتون السيوى لاقيته عندنا فى اسكندريه نفسه بالظبط و سعرها ارخص

واللب انا حكتلكم قصته


فى النهاية احب اقول ان فعلا اسكندرية عروس البحر الابيض المتوسط يعنى احنا نعتبر واخدين الطابع الاوروبى من اماكن سياحية او ترفيهيه او كشكل جمالى اسكندريه احسن كتير

اما مرسى مطروح فهى مدينة واخده الطابع البدوى

يعنى عمرك ما تلاقى مكان زى جرين بلازا اللى فى اسكندريه عندهم فى مطروح

او كارفور عمرك ما تلاقيه هناك


بالنسبة لاسعار السكن بقى فى مطروح فحدث ولا حرج

الشقة على البحر من 1500 ل 2000 فى اليوم الواحد

لو عايز بعيد عن البحر يبقى 700 جنيه فى اليوم الواحد

لو بعيد اوى بالعاركه هتبقى ب 350 جنيه فى اليوم الواحد

يعنى الخلاصة انت لو رتبت نفسك تروح تصيف فى الغردقة او شرم الشيخ هتبقى تكلفة الرحلة ارخص من مرسى مطروح وده اللى هبقى اعمله بعد كده باذن الله

تحياتى

والله يا باشا كله بقى زبالة يعنى انا من اسكندرية اصلا وعندنا بحر وكل حاجة بس عمرى ما اصيف عندنا ابدا بسب المهازل اللى بشوفها عندنا ويوم ما اروح مرسى مطروح الاقى نفس المهازل