لو هتعمل اكتر من مفتاح لاضائة لمبة بستهلك ضعفين السلك لو هتعمل مفتاح واحد يعنى حوالي 10 - 15 متر زيادة مش حاجه كبيرة متتخضش :)
والسلك بين المفتاحين ملوش دعوة باللوحة الرئيسية
حاول تخلي كل أوضه على مفتاح فى اللوحه بلاش كل اوضتين تلاتة على مفتاح وخلي مفتاح او اتنين اسبير فى اللوحة

بخصوص المطبخ 4 ملي معقول لتلاجة وديب فريزر وسخان صغير لكن بدون افران او ميكرويف
لكن لو 6 ملي يشيل سخان كويس وتلاجة وديب فريزر وفرن او ميكرويف مستريح ولو حبيت تشتري بعد كده بوتجاز بالكهربا عادي
6 او 4 بيتحدد حسب احتياجاتك انت والاجهزة الى هتكون فى المطبخ
ومش لازم الفردين يكونوا 6 ملي ممكن فرد الكهربا 6 ملى والارضي 4 ملي

وصلة الفلتر حاجة بسيطه جدا مبتاخدش حاجه فتحة واحده زي فتحة الغسالة بيعملها جنب حوض المطبخ وبيطببها (يحطلها طبه يقفلها بيها عشان لو عزت تركب فلتر فى أي وقت تشيل انت الطبه بنفسك عادي وتركب الفلتر طالما انت عامل حسابها فى التأسيس أو ممكن تركب فيها حنفيه 0.5 بوصه زي بتاعت الغسالة)

الادوات الصحية متجبهاش دلوقتى عشان متتبهدلش
هات حاجت التأسيس بس الى هتركبها فقط الى هيا المواسير لكن الطقم والاحواض والخلاطات متجبهمش الا قبل التركيب عشان ميتبهدلوش
واول ما تخلص تأسيس السباكه خلى السباك يسدلك فتحات الصرف عشان متطلعش منها حاجه
وخلي الكهربائي ينورلك الحمام بلمبه ونبه على الصنعيه كلهم الى عايز يعمل حمام ينزل يتصرف تحت مش فى الشقة