الموضوع: تقرير عن مميزات وعيوب اللوجان الشكل الجديد 2015

المشاركة الأصلية كتبت بواسطة mody112

انا متابع الموضوع بعناية شديدة من اول مشاركة لغاية اخر مشاركة وكان ليه استفسارين بخصوص مؤشر الحرارة وكمان الاختلاف بين الفئات الخمسة والحقيقة لقيت الرد جوة المشاركات فالموضوع يعتبر مرجع مهم جدا لكن من يريد امتلاك هذه السيارة وان كنت انا شايف انى ممكن ابقى واحد منهم ولكن اسمحوا لى لو قارن ما بينها وبين البى واى دى يعنى الفئة الخامسة للوجان والبى واى دى ال 3 اوتو لان السعر تقريبا واحد والاوبشن تقريبا واحد ( وان كانت البى واى دى هتتفوق فى موضوع الاوتو استيبترونيك - وستارت انجين - وفتحة سقف - وموتور 1500 هوندا سيتى يولد 107 حصان ) افيدونى لاننى فى حيرة من امرى.

استاذي الكريم

السيارة البي واي دي فعلا اثبتت كفائتها كسيارة مانيوال وفعلا انا بحترمها جدا وناس كتير شكروا فيها

ولكن انا غير مقتنع بالفتيس الاتوماتيك في أي عربية صيني مهما كان لان لحد دلوقتي مفيش فتيس اتوماتيك في عربية صيني اثبت وجوده

العربية النيو لوجان عائلية في المقام الاول لا بتاعت جري ولا تفحيط ولا تخميس

حتي من وسائل حماية السيارة لو جربت انك تخمس بيه او ترجع بيها للخلف بسرعة كبيرة جدا الماتور يفصل تلقائيا معك حتي لا تتمادي في ما تفعل

السيارات الصيني من زمان وهي تستقطب زبائنها بزيادة الاوبشن ومحاولة جعلها سيارة منفردة بالاوبشن في فئتها السعرية

انا من النوع اللي بيحب عربيته تكون كلها من انتاج شركة واحده

مش الاقي الماتور هوندا والعفشه تويوتا والصاج صيني والكبالن مش عارف منين والمساعدين منين

تحياتي لك

المشاركة الأصلية كتبت بواسطة corsair

استاذي الكريم

السيارة البي واي دي فعلا اثبتت كفائتها كسيارة مانيوال وفعلا انا بحترمها جدا وناس كتير شكروا فيها .

ودى حقيقة فعلا لا يمكن انكارها واحييك على حياديتك

ولكن انا غير مقتنع بالفتيس الاتوماتيك في أي عربية صيني مهما كان لان لحد دلوقتي مفيش فتيس اتوماتيك في عربية صيني اثبت وجوده

لمعلوماتك الفتيس الاوتو فى البى واى دى من 2009 تقريبا وهو كان من انتاج شركة جاتكو اليابانية وهو نفس فتيس نيسان صنى ( ولم توجد اى شكوى منه نهائيا )

العربية النيو لوجان عائلية في المقام الاول لا بتاعت جري ولا تفحيط ولا تخميس

البى واى دى برده عائلية وبتاعت جرى يعنىلو حبيت تجرى بيها هتجريك عادى لكن مش تفحيط .

حتي من وسائل حماية السيارة لو جربت انك تخمس بيه او ترجع بيها للخلف بسرعة كبيرة جدا الماتور يفصل تلقائيا معك حتي لا تتمادي في ما تفعل

افرض ان الظروف حتمت عليك انك تعمل ده بدل ما تسعفك هت....وبعدين اعذرنى لو فى حد مفترى وبيعمل كده فى عربيته عمال على بطال وهو لا راكب بى ام ولا مرسيدس يبقى يستاهل اللى يجراله

السيارات الصيني من زمان وهي تستقطب زبائنها بزيادة الاوبشن ومحاولة جعلها سيارة منفردة بالاوبشن في فئتها السعرية

ودى ميزة مش عيب بس البى واى دى اضافة الى ذلك جودة واعتمادية

انا من النوع اللي بيحب عربيته تكون كلها من انتاج شركة واحده

على فكرة دلوقتى فى عربيات كتير هيبرد ( هجين ) ومن ماركات كبيرة وفى ناس بتشوف ان فى ده تنوع لتعدد مصادر قطع الغيار وكده .

مش الاقي الماتور هوندا والعفشه تويوتا والصاج صيني والكبالن مش عارف منين والمساعدين منين

هو الموتور هوندا والعفشة تويوتا وخلاص .

تحياتي لك

.
اشكرك .

المشاركة الأصلية كتبت بواسطة مروان المصري

طيب انا محتار بين لوجان الفئة الخامسة و اتراچ الفئة الاولي و افيو ارجو الإفاده

والله لو هتزيد عن ال 100 الف يبقي تجيبلك يا بروتون جين 2 يا نيسان صني

لكن تحت ال 100 الف اللوجان وانتا مغمض

الميتسوبيشي انا ركبتها بس معبجبتنيش الصراحه وخامتها رديئة محستش اني راكب ميتسوبيشي خالص

ونصيحة انزل وجرب واللي ترتحلها هاتها

المشاركة الأصلية كتبت بواسطة مروان المصري

انا مرتاح للوجان جدا بس الي مخوفني 1 ان دي اول عربية ليا انا 19 سنه فخايف تتبهدل مني انا اعرف ان الرينو اسعار قطع الغيار غالية جدا 2 سمعت ان الصاج ورق فمعلش طمني انا حاسس اني داخل امتحان الثانويه تاني حاجه اخيرة معلش العربية دي لو هستعملها استعمال عدل تعيش معايا ولا هتفتح بقاها معلش مصدعك و شكرا علي الرد

السيارة يا استاذ روان عملية جدا وعائليه من الدرجة الاولي واسعار قطع غيارها اقل من اسعار قطع غيار الافيو وتقريبا قريبة جدا لاسعار قطع غيار الفيرنا في التوكيل لان قطع غيارها مفيش منها مضروب ولا تقليد زي الفيرنا يعني هتبقي ماشي مطمن وحاطط في بطنك بطيخه صيفي

الرينو الكليو موجوده بقالها اكثر من 14 سنة وتحس انها عربية موديل السنة الجديدة لسه ماشيه علي الارض

الصاح باعها فعلا مش قوي وده مش في الرينو بس ده في كل العربيات علشان يخفف وزن العربية واستهلاك البنزين

بس احب اطمنك ان اللوجان فيها اقوي شاسيه موجود في العالم وهو انتاج شركة داتشيا رائدة صناعة الشاسيهات في العالم

والكبالن بتاعتها انتاج شركة رينو اول من اخترعت نظام الكبالن في العالم

عربية تركبها وانتا مطمن عليك وعلي اسرتك

تحياتي لك

المشاركة الأصلية كتبت بواسطة ahmed moh

استاذنا الفاضل انا متابع الموضوع من اوله ........ مبروك عليك الفئة الثالثة ربنا يكفيك شرها ويحافظلك عليها ......
انا اشتريت الفئة الاولى من حوالى 4 ايام فقط ..... بصراحة العربية ناعمة وسهلة ومش شايف فيها اى عيوب وكان عندى هيواندى اكسنت خليجي جيابها معايا من بره موديل 2000 ....
طبعا الفئة الاولى مفهاش فوانيس الضباب الامامية وبالتالى نظام الداى لايت اللى زهقنى موجود في الفوانيس الاصلية (واخد بالك انت ؟ ) ........
وطول ما انا ماشى بالعربية اطفى النور اطفى النور ......
وقفت بالعربية ونزلت منها واديت المفتاح لواحد بيقولى اطفى النور وقلت له لو طفته هديلك 100جنيه !!!!!
مفيش حل يا استاذنا لموضوع ده ؟واسف للاطالة

استاذ احمد نصيحتي ليك سيب الداي لايت متفصلهوش علشان ده اجمل حاجه في اللوجان واللي بتميز عربيتك عن باقي العربيات في الشارع وانتا ماشي وكمان بيخلي العين تركز معاه وتنشغل عن عربيتك العين فلقت الحجر يا ريس

الاوبل والفولكس والبي ام والمرسيدس بينزلوا بداي لايت هتستكر علي نفسك تبقي ماشي زيهم

وعلي العموم في فيوز عندك لو شيلته بيفصله وخليهم في التوكيل افضل يفصلهولك بس نصيحتي ليك سيبك من الناس واستمتع بكل الاوبشن اللي نازله في عربيتك وربنا يديك خيرها ويكفيك شرها