الموضوع: تقرير عن مميزات وعيوب اللوجان الشكل الجديد 2015

المشاركة الأصلية كتبت بواسطة member 18

طيب لو هقارن بين اللوجان الفئه التالته والبريليانس كروس ...
علما بان الكروس شكلها الخارجى افضل من وجهة نظرى وبالرغم من انها صينى محدش اشتكى منها ..
الحقيقه محتار جدا ياريت افادة
شكرا

والله انا عن نفسي بحترم ماركة البريليناس جدا بس في اول ما نزلت دلوقتي بقت فعلا تحس انها صيني صيني مش زي ما اول ما نزلت الكل دلوقتي بيدور علي المكسب قبل اي شئ

اللوجان معروفه من سنة 2009 والشكل الجديد هو هو الشكل القديم مع تغيير البودي فقط عربية اعتمادية وهيه اللي تنفع في بلدنا الجميلة ومطباتها

عربية واسعه وعاليه وشنطتها كبيره وتشيل 5 مرتحيين استهلكها للبنزين ممتاز عملت معايا 570 كيلو ب 41 لتر بنزين مع الزحمه وتشغيل التكييف فترات وحمولة 5 افراد بالشنط يعني حوالي 700 كيلو جوا العربية وبسرعة 120 كيلو في الساعه

الاوبشن اللي فيها والامان مش موجود في عربيات سعرها معدي ال 120 الف

وياريت تجربهم الاتنين وتشوفهم علي الطبيعه

وصلي صلاة استخارة واللي ترتحلها هاتها بدون تفكير

المشاركة الأصلية كتبت بواسطة afoshy

معلش يا باشا كان ليا استفسارات بس كلة بسببك انت انا كنت خلاص نازل احجز البرليانس الكروس اخر الاسبوع دا فى التوكيل وكنت شايل اللوجان دى من حساباتى خالص لان مش قابل شكلها لكن لما شوفت موضوعك هنا وشوفت العربية بالشكل الجديد والامكانيات الهايلة دى وخصوصا فى الفئة التالتة بالمقارنة بالبرليانس الكروس (على فكرة الكروس فى التوكيل ب 90000 يعنى سعرها قريب جداا من الفئة التالتة ) انا اتلخبت خالص بصراحة فكنت عايز استفسر منك على شوية حاجات وياريت تستحملنى :zb_sor1[1]:

ههههههههههههههههههههههه لا يا غالي ولا يهمك انا هوايتي صيد السمك يعني الصبر عندي ملوش حدود ههههههههه


1- هو اية الفرق بين ال 5 فئات بتوع اللوجان فى الامكانيات لان حاولت اعرف لكن موقع كونتاكت كار لخبطنى وكمان الفرق فى الاسعار اية بينهم

بص يا غالي الفئة الاولي 2 زجاج كهربا امامي 2 ايرباج كاسيت سي دي بلوتوث فرش للكراسي قماش عادي تكييف بكر سعرها 82500

الفئة الثانية :- 4 زجاج كهرباء نواكل تكييف بكر 2 ايرباج وكاسيت سي دي بلوتوث وفرش قماش من نوعية فاخرة سعرها 86500

الفئة الثالثه :- هتزود علي الفئة الثانية فرامل abs ومثبت سرعة ومحدد سرعة وتكييف تاتش وتاره مالتي سعرها 92500

الفئة الرابعة : - هتزود علي التالته جنوط اسبور وسنسور بارك سعرها في التوكيل 95500

الفئة الخامسة :- هتزود علي الرابعه نافيجيشن شاشه 7 بوصه سعرها 97500

2- العربية برضو زى الكروس مش موجودة فى التوكيل ولو حجزت هقعد بالكام شهر عقبال ما توصل ولا اية النظام ؟

فعلا العربية لو هتحجزها من التوكيل هتنظر من شهرين الي 4 شهور حسب الفئة اللي انتا حاجزها

لكن ممكن تشتريها من المعارض بأوفر برايس 3000 ل 5000 زيادة عن سعر التوكيل واستلام فوري

3-العربية الابعاد بتاعتها حاسس انها تلخبط شوية فى السواقة وخصوصا انها عالية على الارض

فعلا العربية واخده شكل بومبيه وابعدها صعبه شوية وهتاخد وقت علي ما تتعود عليها بس لو متمارس في السواقه مش هتفرق معاك كتير

4- علو العربية مش مأثر على اتزانها على الطريق لان العربيات العالية زيها زى الافيو او ما بتعدى ال 100 بتحس ان العربية بتعوم

العربية فيها عمود اتزان امامي ودنجل خلفي وثباتها جيد جدا لحد 140 كيلو بعد كدا الهواء بيكون مأثر شوية علي عملية الثبات متحسش ابدا بارتفاعها وتاثيره علي سواقتك

5- العربية تقفيل فرنساوى من بلدها ولا تقفيل مصرى ولا مغربي ؟

العربية بالكامل فرنساوي وتجميع مغربي فقط لا غير

6 - قطع الغيار متوفرة ولا لا وكمان غالية زى اللوجان القديمة ؟

قطع الغيار سعرها مش غالي زي مانتا فاكر سعر قطع الغيار ارخص من الاوبترا والالنترا والاكسينت الشكل الجديد بس اغلي من الفيرنا والانوس والافيو شوية بس معمرة ومفيش منها مضروب ومتوفرة لان قطع غيار الشكل الجديد نفس الشكل القديم مع اختلاف البودي الخارجي

7- عنوان ورقم التوكيل لو معاك احسن انا مش عارف مكانهم فى القاهرة فين بصراحة :)
معلش تقلت عليك اوووى يا باشا بس والله انت لو تعرف حيرتى فى موضوع العربية دى هتعذرنى انا بقالى سنتين دماغة بتلف :zb_sor1[1]::zb_sor1[1]: وجزاك الله كل خير ويباركلك فى العربية ويكفيك شرها ويرزقك خيرها ان شاء الله ويبعد عن العيييييييييييييييين

انا عازرك والله وربنا ييسرلك الحال بس نصيحه حاول متتسرعش وخليك راسي ولما تجيب عربية تفرزها اكنها مستعمله الغش مالي البلد اليومين دول

رقم تليفون الوكيل 16202

وممكن حضرتك تقولي انتا ساكن في منطقه ايه علشان اقولك علي اقرب مكان ليك

وتحياتي وتحت امرك في اي استفسار تاني

متااااااابع

المشاركة الأصلية كتبت بواسطة hamisa08

مرسى يا باشا على التقرير و انا فعلا شكلها عجبنى جدااا وبفكر تفكير جاادى انى اجبها
بس سوال مهم اووى بالنسبة ليا بخصوص قطع الغيار غالية بردة زى الرينو بوجه عاام ؟؟

السوال التانى اللى واخد مساحة كبيرة من تفكيرى العربية 8 صباب وسمعت ان سحبها تقيل او العربية تقيلة فى المطالع والكبارى وسحبها تقيل ؟؟

الشكر لله يا فندم

وبالنسبة لموضوع ال 8 صباب فعلا بيخلي سحب العربية ضعيف شوية بما اني كان معايا قبلها فيرنا 1600 16 صباب 2 كامه فالفرق واضح معايا جدا

بس مفيش عربية كامله لازم هتلاقي في نواقص في اي عربية في مصر ادخل حتي علي قسم البي ام والمرسيدس في المنتدي هتلاقي في ناس بتتكلم عن اوبشن وبعض المطالب اللي كانو نفسهم تكون في الموديلات اللي اشتروها مع العلم ان سعرها بيكون معدي ال 400 الف وانتا طالع

لكن في النهاية موضوع ال 8 صباب بيكون موفر شوية في البنزين عن ال 16 صباب بس في الاخر هيه عربية عائلية من الدرجة الاولي وليست رياضيه لو عايز عربية سحب وجري يبقي خليك في البروتون جين 2 بس قاعدتها ضيقه من الداخل

بالنسبة لقطع الغيار هي علي عكس الميجان والفلوانس اسعارها مش غالية زي ما الناس متصوره الفانوس الخلفي ب 600 في التوكيل والامامي ب 800 وانا عامل موضوع هتلاقيه متثبت في قسم اللوجان هتلاقي في اسعار بعض قطع الغيار الجديدة

وربنا يوفقك لما فيه الخير

المشاركة الأصلية كتبت بواسطة م.ابرهيم

سلمت يداك ابومحمد موضوع مميز جدا
انا بفكر من زمان انضم لعائلة الرينو وموضوعك ده شجعنى جدا
بس دلوقتى الحيرة كل الحيرة بالنسبة للفئة
محتار بين الفئة الأولى والتالتة وخصوصا انى من اسوان يعنى حاسس ان الفرامل abs مش هيفرق كتير بالنسبة لأسوان الدنيا هادية ومفيش زحمة ،وكمان موضوع التكييف التاتش ده عايز اعرف ايه ميزته عن التكييف العادى

تسلم يا بشمهندس ابراهيم

الفرق بين الفئة الاولي والتالته كبير فعلا اولا مفيش كمبيوتر رحلات ولا زجاج كهرباء خلفي والفرش مختلف ومفيش تكييف تاتش ولا مثبت سرعة ولا محدد سرعة ولا فرامل abs ومهمة جدا ومش شرط تكون بتجري علشان تسعفك لا لو في مياه او رمله علي الطريق وانتا بتضرب فرامل ولو حتي ماشي علي التاني او التالت هتحس بفرق كبير

وغير كدا كمان مفيش فوجات ولا نواكل والكرسي مش هيبقي في اوبشن الارتفاع والانخفاض

لو هتجيبها بأوفر برايس هيبقي الفرق قريب جدا بين الفئة الاولي والتالته لان الفئة الاولي الاوفر برايس بتاعها بيكون حوالي 6000 ل 7000 جنيه لكن الفئة التالته الاوفر بتاعها ممكن تجيبها بحوالي 2000 ل 3000 جنيه وانتا وشطارتك

وربنا يوفقك لما فيه الخير واسف علي التاخير في الرد