الموضوع: نصيحه بخصوص بيجو 407

المشاركة الأصلية كتبت بواسطة hossam99

أستاذ تامر حضرتك لو محتاج تسأل علي حاجه معينة أنا تحت أمرك



زي ما ذكرت العربيه ما فيهاش عيب شهير أو عيب صناعة (أنا بتكلم علي النسخة ال2000 cc الأوتوماتيك )
قطع غيار عفشه و ميكانيكا معرفش (عمري ما غيرت شئ في العربيه)
السيرفيس العادي أقل من أسعار الميجان2 بشوية حلوين
توافر قطع الغيار موجوده بالكلبس في التوكيل و التوفيقيه و شوية تجار قطع غيار منتشرين في جميع أنحاء الجمهوريه
الإستيراد موجوده بغزارة

العربيه كعربية ... قوية جداً ... ثابتة جدا جدا .... كماليات و جلود و خامة ممتازة و تستاهل كل قرش يدفع فيها ... المكسب كله إن حضرتك هاتركب عربيه بتمن عربية نص لبة كوري و قطع غيار سعرها مناسب و برستيج عالي و كان سعرها زيرو خرافي

ربنا يخليك يا استاذ حسام :)
حضرتك قلت لنا ان قطع غيارها موجودة توكيل و استيراد و تجاري , لو انا فهمت صح

بالنسبة لاسعارها , و حضرتك حطيت مثال الميجان2
عايز اعرف امثلة ليها , في العفشة و الميكانيكا و الكهربا
يعني كوبلن ميجان2 مثلا , ب3و نص توكيل و بألف جنيه تقريبا استيراد
مقصها بحوالي 1100 توكيل و ب200 جنيه تجاري
علبة دركسيونها ب3800 توكيل و ب1500 تجاري
طنابيرها ب350 تجاري و ب1500 توكيل
بطاحاتها ب1000 توكيل و ب150 تجاري
تيلها الاصلي بحوالي 550 دلوقت , و ليها تجاري ب180 و ب250 , انا شفت ان بتاع ال407 في التوكيل ب650 يعني اغلى شوية
ردياتير الميجان استيراد بحوالي 700 لو انا فاكر صح , و السرنتينة تقريبا زيه , و المروحة بقميصها بحوالي 600 لو انا فاكر صح برده

ايه اخبار قطع الغيار دي في ال407

الاسئلة الاصعب بقى
هل سعرها لسه بيقع زي ما كانت الميجان2 الاول ولا خلاص مسكت سعر ؟

هل فيها اجزاء معروف ان عمرها قصير و بتبوظ بسرعة ؟ الميجان2 فيها بعض الاجزاء فيها العيب ده

فتيسها كام نقلة و اخبار اعتماديته ايه و هل هو عصبي ولا خملان زي بتاع ميجان2 ؟

هل صوت الموتور بيبقى واضح و مسموح جوة الكابينة و العربية فوق 2و نص او 3 آر بي ام ؟

هل العربية فيها منغص معين ؟؟

هل في يوم نتوقع يترفع الدعم عن العربيات الفوق 1600 فسعر العربيات ال2000 يسقط في بئر سحيق ؟ :(
ده اكتر سؤال مرعب بالنسبة لي

انا شاكر لحضرتك و معلش هاتعبك بأسئلتي

المشاركة الأصلية كتبت بواسطة hossam99

مظبوط قطع الغيار متواجدة عند نفس الناس اللي شغاله في الميجان موجوده فرنساوي و أسباني و تركي و تونسي
و موجودة إستيراد في الحرفيين عند كل النا اللي شغالة بيجو
و طبعا موجودة في التوكيل و متوفره

أما أسعار قطع الغيار القطع الخاصة بالعفشة أنا معرفهاش و ما أتعاملتش معاها قبل كده لأن العربيه ما طلبتش ده ... لكن كان لي صديق أشتري الدفرانسيه الخلفي بالأجناب بـ3500 جنيه إستيراد (عفشة خلفية كامله) ... ممكن الأمامية من غير علبة الدركسيون تعمل نفس السعر

و التيل أنا شغال رمسا و فاليو و بيبقي في حدود 160-200 و الفاليو 250
الطنابير أصلي بحوالي 800 جنيه (مغيرتهمش ... لكن سألت علي السعر)

و برضه أنا معرفش أسعار طقم التبريد (الحمد لله العربية بفريون الفابريكه و متزودش و سائل التبريد التوتال بينزل كامل من غير ما ينقص كل سنتين و بيتغير بتوتال و بدون غسيل أو دخول مياه عاديه لدورة التبريد)

بالنسبة لسعرها هي فقدت جزء كبير من قيمتها زيرو و ما أظنش أن سعرها هاينزل تاني ... اللي بيحسبها بيبص علي البيكانتو و الأفيو و أسعارهم و طبعا العربيات الصيني ... فبيقول أحفظ مركزي أحسن و أركب عربيه أصليه و أمان عن الكلام اللي مش جايب همه ده

الأجزاء اللي محتمل تبوظ لو حصل إهمال هي أي جزء كهربا يتعرض لمياه ... يعني شاشة المعلومات بلاش تتمسح بمياه ... وحدة تحكم الزجاج بلاش مياه

إنما هي مش فرفورة زي الميجان و الكليو

الفتيس نفس تصميم فتيس 3o7 و الميجان al4 لكن مختلف في بعض التفاصيل التقنيه و الحجم ... فتيس 4 غيار ستيبترونيك مع الصيانة مبيبقاش فيه مشاكل العربيه علشان 2000 cc عزم 200 نيوتن فمبحسش بأي خمول (بتقطع العربيات اللي حواليها مع حجمها و وزنها ده) و توب سبيد ممتاز

صوت الموتور مفيش و مستوي العزل كصوت و أشعة شمس عالي (و عالي هنا المقصود به إن اللي هاتلاقيه في المرسيدس و البي أم هاتلاقيه فيها )

بالنسبة للعربيه و صيانتها مفيهاش أي حاجه تخلي الواحد يندم علش ركوبها و لا فيها عيب شهير و مزمن

نيجي لرفع الدعم ... دي حاجه ما أفتيش فيها لأن الله أعلم باللي هايحصل و بلدنا بلد غير نمطي و ملهاش خطة معلنة ... لكن الظاهر إن البنزين هايتحرر واحده واحده عن كل العربيات ... لأنه لما زاد زاد علي الكل

أنا تحت أمرك أستاذ تامر و تشرفني أستفساراتك في أي وقت[/color]

ربنا يبارك لك و الله يا حسام باشا و معلش بجد انا تاعبك فعلا

حتة انها مش فرفورة زي الميجان حلوة اوي , و الله الميجان مش فرفورة بس هي نقطة بعض القطع دي
بالنسبة للفتيس فدي يمكن اسوأ نقطة :(
بالنسبة للطنابير , بتوع ميجان2 في التوكيل بباكو و نص , حضرتك متأكد من الرقم ده ؟
لكن , انا كنت امبارح في شارع دمشق و سألت في 3 محلات مثلا من بتوع البيجو هناك و كلهم ما عندهمش , هل حاجتها موجودة في حتة معينة بس مثلا ؟

المشاركة الأصلية كتبت بواسطة minicooper20

اعظم سياره امتلكتها فى حياتى
ابداع بيجو فرنسا
و لا اجمل و لا احلى و لا اروع
امتلكتها سنه و ٣ شهور عرفت معنى الاعتماديه و المتانه

همم , انا شايف حضرتك راكب بي ام و ميني ... متأكد من الكلام ده ؟