الموضوع: بحمد لله استلمت سوزوكي سويفت 2015 هاتشباك

انا عامل الموضوع ده للديزاير يا جماعه للى ليه أسئلة او للى يحب يشارك :)


http://www.nilemotors.net/Nile/439246-2015.html

بعد ما العربية عملت حوالي 1300 كيلو كلمت مودرن موتورز فرع الهايكستب علشان أحجز ميعاد الصيانة

المهم حجزت ميعاد يوم الثلاثاء ... وبعد الحجز تم الاتصال بي يوم الاثنين مساء لتذكرتي بإن موعد الحجز بتاعي في الصباح الباكر الساعة 11

المهم روحت على فرع الهايكستب الساعة 11 بالضبط كنت هناك

فوحئت إنهم عزلوا عربيات سوزوكي في ناحية وعربيات نيسان في ناحية تانية بس مكان الانتظار والاستقبال بتاع سوزوكي مش متوضب كويس وغير لائق وضيق بس التكييف بتاعه كان أفضل من الاستقبال القديم اللى بقى بتاع نيسان فقط اللى كله زجاج والشمس ضاربة فيه مخلية التكييف مالوش لازمة بالرغم إنهم زودوا عدد المكيفات عن زمان بصورة واضحة

المهم سألت عن تركيب الإنذار وحساسات الركن الخلفية قالولي عند مهندس الاكسسوار في استقبال نيسان روحتله اسمه المهندس محمد صلاح وهو رجل ذوق ومحترم جدا ... وخدت منه قائمة بالأسعار والكماليات اللى متوافرة حاليا ...

ودي صورتها




وبعد الاتفاق على تركيب الإنذار وحساسات الركن الخلفية حددلي ميعاد استلام العربية الساعة 4 العصر وتكون جاهزة بإذن الله

ملحوظة كمان على قسم الاستقبال ... هم تقريبا قرفانين وزهقانين من كثر عربيات السوزوكي الفان وإن أكثر اللى العملاء اللى جايين سواقين وأسلوبهم طبعا مش محتاج شرح أفظع من سواقين التاكسي اللى منصور عملهم فرع لوحدهم بعيد عن الملاكي بسبب خناقاتهم اللى كل شوية ...

مهندس الاستقبال كان رايح يتعامل معايا بشيء من نفاذ الصبر والزهق .. وشوية كدة وابتدى يتعدل ويبتسم ويتعامل كويس .. بص على العربية وفتح الكبوت وقالي الموتور عايز غسيل عشان تراب وشحم السفر قلتله ماشي وحسبه علي بسعر 40 جنيه

المهم سيبت العربية ومشيت

على الساعة 3:40 دقيقة كلموني عشان العربية خلصت ... كنت أنا عموما خلاص على البوابة داخل تاني ..
دخلت لقيت العربية مغسولة ومركونة في البارك عند قسم الاستقبال

استلمت العربية وشرحلي خصائص جهاز الإنذار والسينسور بارك وسلمني العربية وروحت عشان أدفع ... دفعت سعر الزيت والفلتر فقط زيت 295 وفلتر 63 .. ده طبعا غير سعر الإنذار والحساسات الموضحين في الصورة وتم إضافتهم على سعر الفاتورة النهائية



ملحوظة مهمة جدا لأي حد هايعمل صيانة السويفت سواء الهاتش باك أو الديزاير

العربية في الكتالوج مكتوب إنها بتاخد زيت موتور 3.1 لتر ... بعد ما دفعت وخلاص مافيش حد غيري في التوكيل تقريبا لأن الكل كان مشي على الساعة 5 .. خدت بالي إنهم محاسبيني على 4 لتر زيت مش ثلاثة .. قلت أروح أبص على مقياس الزيت لاقيته معدي الماكس بشوية .. يعني فعلا هم حاطين لتر زيت زيادة .. يعني فرغوا جركن الزيت كله وخلاص بدون أي حساب للمواصفة بتاعة العربية وحجم موتورها

طبعا الموضوع ده غايظني جدا لأن زيت زيادة يعني حمل على الموتور وحمل على طرمبة الزيت نفسها

عموما هم كلموني إنهاردة عشان يعملوا تقيين لمستوى جودة الخدمة والصيانة وشرحتلهم النقطة دي والله أعلم هاياخدوها بمحمل الجد ولا لأ

المهم بقى إن أي حد رايح يعمل الصيانة يركز في الموضوع ده وينبه على مهندس الصيانة إ، العربية بتاخد 3.1 لتر زيت من الكتالوج مش أكثر ... حتى لو هاتحاسب على سعر جركن الزيت كله (لأن هم ماعندهمش غير جراكن 4 لتر بتاعة توتال) يبقى تاخد باقي الزيت معاك في الجركن .. مش يتحط في العربية وخلاص

.............

تقييمي للعربية بعد الصيانة

ما شاء الله في فرق جامد في العفشة وحسيت إنها أريح بكثير بعد التربيط وأصوات كتير اختفت

تم تزييت وتشحين كل مفصلات أبواب العربية والكبوت والشنطة

تم غسيل الموتور زي ما قلت

نعومة العربية أعتقد بقت أفضل

سحبها أفضل بكتير


الإنذار
====

1- لما بتنزل من العربية حتى لو سيبتها مفتوحة الإنذار بيشتغل لوحدة بعد دقيقة واحدة يعني لو أي باب اتفتح الإنذار بيضرب ... يعني لو نزلت من العربية وجيت تركب تاني لام تفتح العربية تاني حتى لو كانت مفتوحة

2- صوته لذيذ ومش مزعج قوي ومش ضعيف برضه

3- أول باب السائق لما بيتقفل بيدي صوت سريع صغير للتذكرة بقفل السيارة

4- بيتم تشغيله على ريموت السيارة نفسه

5- ليه حساس يمكن ضبطه لدرجة الحساسية المطلوبة لأي مؤثر خارجي عشان الإنذار يضرب البسرينة بتاعته

أعتقد بس كدة لو افتكرت حاجة تاني هاكتبها بإذن الله


حساسات الركن
==========

تم تركيب أربع حساسات في الإكصدام الخلفي بعد رشهم بنفس لون السيارة وتركيب شاشة صغيرة جدا على التابلوه أمام السائق بتوضح درجة قرب الجسم الخلفي من السيارة وبتبدأ تنور لما الجسم يكون على قرب 1 متر وتنور تماما لما الجسم يكون على بعد 50 سم مع صوت متقطع في الحالة الأولى وصوت متصل في الحالة الثانية

بس حسيت إن سرعة استجابة التنبيه للجسم العائق خلف السيارة بطيئة شوية عن اللى متعود عليه في البروتون مثلا أو غيرها من السيارات


........................

بعد الحوار مع المهندس / محمد صلاح .. عرفت منه إن فيه إكسسوارات أخرى للسيارة ستصل في المدة القريبة القادمة منها الكونسول مسند الذراع اللى في النص للسائق وهايكون شعره في حدود 400 جنيه لكن الكلام غير مؤكد

......................

في النهاية القييم النهائي بالمقارنة ببعض التوكيلات الأخرى

هم أفضل بمراحل من عز العرب والكلام ده قلته في قسم بروتون أول ما اتعاملت مع عز العرب بعدهم وإتأكدت برضه لما اتعاملت معاهم بعد عز العرب ... والفروق مش في الإستقبال والنظام وسرعة إنجاز العربية فقط ولكن في كفائة الفنيين المكلفين بصيانة العربية وإحساس الواحد إن العربية اتعمل فيها شغل

أفضل من منصور بكتير لنفس النقاط السابقة

غبور اتعاملت معاه زمان أيام ما كانت مصر كلها بتشتم فيه معرفش دلوقتي هل اتحسن ولالأ ... بس لو التقييم على غبور اللى اتعاملت معاه زمان يبقى مودرن موتورز أفضل منه برضه بمراحل

التقييم ده مجرد رأي شخصي لتجاربي مع التوكيلات دي .. يعني استحالة يبقى مقياس عام لتوكيل عن الآخر

الف مبروك عقبال صيانة ال١٠٠ الف

على فكرة اعتقد انهم حاليا بيعملو مركز صيانه منفصل لسوزوكي في طريق الاسماعيليه .. وفي ابو رواش برضو بيجددو في ورشة السوزوكي وهتبقي اكبر من ورشة نيسان

ربنا يكرم

الف مبروك و عقبال صيانة المليون كم يا باشا :)

يعنى هى بتيجى من غير انذار أصلا !! امال ايه النور الاحمر اللى بينور و يطفى فى التابلوه تحت زرار الانتظار ده ؟

و معلش سؤال بالنسبة للفاتورة - هما حاسبوك على تمن الحاجتين دول اللى مكتوب بس يعنى ده شامل مصنعية التركيب و الضرائب و كله ؟

المشاركة الأصلية كتبت بواسطة dr_smart

الف مبروك عقبال صيانة ال١٠٠ الف

على فكرة اعتقد انهم حاليا بيعملو مركز صيانه منفصل لسوزوكي في طريق الاسماعيليه .. وفي ابو رواش برضو بيجددو في ورشة السوزوكي وهتبقي اكبر من ورشة نيسان

ربنا يكرم

هو قالي الكلام ده فعلا لما اشتكيت من سوء المكان وعدم الاهتمام به .. قالي إنه في فرع مستقل هايفتح لسوزوكي على طريق اسماعيلية قريب إن شاء الله

المشاركة الأصلية كتبت بواسطة el prince

الف مبروك و عقبال صيانة المليون كم يا باشا :)

يعنى هى بتيجى من غير انذار أصلا !! امال ايه النور الاحمر اللى بينور و يطفى فى التابلوه تحت زرار الانتظار ده ؟

و معلش سؤال بالنسبة للفاتورة - هما حاسبوك على تمن الحاجتين دول اللى مكتوب بس يعنى ده شامل مصنعية التركيب و الضرائب و كله ؟

أنا سألت عن اللمبة الحمراء اللى في التابلوه ده دي وما حدش إداني جواب مضبوط ... حتى ما فيش ذكر ليها في الكتالوج نهائي ... بس واحد قالي إنه خاص بنظام الإيرباج .. وده مرجح .. لأن في الإس كروس مكتوب تحته passenger airbag ... وإنه ممكن يتطفي من داخل درج التابلوه ...

وممكن تكون بتاعة الإنذار الأصلي بتاعها اللى بتنزل بيه برة ... عموما أنا هاتابعها مع الإنذار الجديد وهل في فرق في أسلوب الإضاءة بتاعتها ولا لأ

والله أعلم


سعر الحاجات اللى مكتوب في الصورة اللى أنا رافعها فعلا بالتركيب والمصنعية والضرائب .. لأن سعر الإنذار في الفاتورة من غير الكلام ده 650 جنيه والباركينج سينسور 450

اللمبه الحمرا اللي بتنور وتطفي لما تبطل العربية دي تمويه للحراميه ان فيه انذار :) بجد مش هزار مكتوبه كده في الكتالوج بتاع الsx4 .. هي مكانها عندي في جنب الساعه في التابلوه فوق

المشاركة الأصلية كتبت بواسطة Dr_Smart

اللمبه الحمرا اللي بتنور وتطفي لما تبطل العربية دي تمويه للحراميه ان فيه انذار :) بجد مش هزار مكتوبه كده في الكتالوج بتاع الsx4 .. هي مكانها عندي في جنب الساعه في التابلوه فوق

حضرتك أكيد بتتكلم بهزار صح

المشاركة الأصلية كتبت بواسطة yassin19

اولا مبرووك وربنا يحفظهالك
من فضلك انا حجزت مع معرض العربية وطبعا اوفر برايس لاني لما كلمت التوكيل قالي مش قبل 5 شهور لان في مشاكل في الجمارك والعربية مش هتوصل اصلا غير بعد 4 شهور وكدب المعارض التانية الي مفروض انا حاجز عندهم على اخر الشهر بالكتير بصراحة مش عارف مين الي بيكدب وخصوصا اني محتاج العربية في اقرب وقت ....فحضرتك عندك اي معلومات او اي حد؟؟[/

اللى أنا فهمته من التوكل إن معظم المعارض دي كانوا حاجزين العربية أصلا من قبل حتى الإعلان عنها ودافعين ثمنها بالكامل .. عشان كدة بيكون ليهم الأولوية في الدفعات الأولى عن العملاء اللى لسة حاجزين وبرغم كدة التوكيل ابتدى يسلم عدد من العملاء عربيات من الدفعات اللى كانت مخصصة لبعض المعارض ... ده اللى اتقالي لما استلمت

أما بقى مشاكل في الجمارك !!! دي مش مفهومة ... لأن توكيل كبير زي ده صعب يقابل مشاكل في التخليص الجمركي .. ده بيبقى عنده جيش موظفين للغرض ده فقط وعاملين حسابهم على كل الإجراءات من قبل ما ييجي وقتها عشان العربيات ما تقعدش في الجمرك أكثر من عدة ساعات ... لأن طول ما هي قاعدة في الجمرك بيتدفع عليها فلوس كثير أرضية

إلا بقى إذا كان في توكيل تاني بينافسه ومن مصلحته إن العربية تتأخر أكثر وأكتر والبساط اتسحب منه بسببها وهو السبب في المشاكل دي .. والله أعلم