انصحونى اتراج ولا سوزوكى ديزاير ؟

**dr_a7mad** · 01-09-2014 11:48 PM

ودا رقم المعرض اللي انا اشتريت منه

جاسر تريد
01001883500

في مدينة نصر بالقاهرة

**shedoz** · 02-09-2014 09:55 AM

المشاركة الأصلية كتبت بواسطة d . A .\ ayman

السويفت سواء الديزاير السيدان أو السويفت الهاتش باك أفضل من الأتراج سواء من حيث جودة التقفيل وقوة الموتور (أقوى بعشرة حصان كاملين ... السويفت 87 حصان الأتراج 78 حصان) وأربعة سلندر مش 3 زي الأتراج ومن جوة أحلى بكثير من الأتراج وشكلها من برة بردة أحلى بالنسبة لي

وصوت موتور السويفت أنعم بكثير جدا من الأتراج عن تجربة في المعرض لما كنت أنا بقارن نفس المقارنة دي قبل ما أشتري (شغلت الإثنين جنب بعض وصوت الأتراج كان أوحش وأعلى من السويفت بدرجة ملحوظة والرجة بتاعة الـ 3 سلندر ملحوظة فيها ولسة هاتبان أكثر لما العربية تقدم زي الألتو الـ 3 سلندر اللى كانت معايا كدة

السويفت فيها خمس جنوط سبور بالاستبن ومقاس 15 ... الأتراج أربعة فقط ومقاس 14 ... وقاعدة عجلاتها أكبر من الأتراج (يعني ثباتها أعلى منها وإيروديناميكية أعلى برضه بالنظر لتصميمها)

قطع غيارها موجودة عادي في التوكيل .. بالإضافة إن توكيل الميتسوبيشي مش أحسن من السوزوكي ولا حاجة
السويفت قطع غيارها كمان موجودة برة التوكيل استيراد والعربية معروفة من أكثر من عشرين سنة في مصر وبرة مصر والموديل ده بالذات موجود برة مصر وشوفت منه في مصر من سنة 2008 بس أكيد ناس كانوا منزلينه بطريقتهم الخاصة لإني إتوهمت من جمالها أول ما شوفتها من 6 سنوات

بعكس الأتراج اللى موديل جديد سواء جوة مصر أو برة مصر ولسة نازل السنة وعمرك ما هاتلاقي منها قطع غيار غير في التوكيل ومش هاتلاقي منها قطع غيار استيراد نهائيا لغاية ما تبدأ تنتشر

وفي الآخر السويفت سواء الديزاير أو الهاتش باك أرخص من الأتراج

كونت عايز اعرف منك يا فندم معدل استهلاك البنزين فى الديزاير قد ايه بعد اذنك ؟

**D . a .\ AYMAN** · 02-09-2014 02:39 PM

المشاركة الأصلية كتبت بواسطة shedoz

كونت عايز اعرف منك يا فندم معدل استهلاك البنزين فى الديزاير قد ايه بعد اذنك ؟

أول تفويلة عملت معايا 300 كيلومتر/ 20 لتر ... أو 15 كيلومتر / للتر .. كانت عبارة عن سواقة هادئة لأبعد الحدود بدون أي حرق أو تسارع مفاجئ على اعتبار إنها كانت لسة في التليين وكانت بالتكييف على طول وفيها كتير وسط البلد وزحمة كوبري أكتوبر ... والتفويلة كلها عملت 750 كيلومتر

ثاني تفويلة نفس الظروف لكن كنت سايق براحتي وعلى سرعات عالية شوية وبحرق وبعمل كل حاجة ... وعملت 285 كيلومتر / 20 لتر

الموضوع ده فيه كل ملاحظاتي عن العربية لو كنت لسة ما شوفتهوش

http://www.nilemotors.net/Nile/434488-2015.html

وده رد لي كان حد بيقارن عن الفرق بين السويفت والأتراج في الاستهلاك

التوفير .. من الحسابات على الورق أعتقد السويفت تكسب
السويفت 87 حصان 4 سلندر على وزن 940 كيلوجرام
الأتراج 78 حصان 3 سلندر على وزن 870 .. فرق الوزن بينهم مش كبير .. ولكن فرق القدرة الحصتنية والعزم بتاع السويفت أكبر بكثير ... وبالتالي هاتدي درجة توفير أكبر في الوقود ... المحركين الإثنين VVT بنفس التكنولوجي أو متقاربة جدا

الفرق الوحيد لصالح توفير الوقود للأتراج هو الفتيس الـ CVT ... وده سلاح ذو حدين ... بمعنى لو مشيت عليه بالراحة بدون حرق نهائي وبدون ما تكون رجلك تقيلة على دواسة الوقود وبمعدل تسارع هادئ جدا هايديك توفير رائع أعلى من الفتيس الأتتوماتيك العادي اللى في السويفت ... لكن لو رجلك ثقيلة على البنزين ومتعود تدوس وخلاص وتحرق على الغيارات وكل شوية بنزين فرامل بنزين فرامل هاتلاقيه بياكل البنزين أكل ولو قريت تجارب الناس اللى معاها الأتراج هاتلاقي ناس بتقول شعر في توفير الوقود فيها وناس تانية لما تكتب معدل استهلاكها وفاكرة إنها كدة موفرة أبص ألاقي البيرسونا الـ 1600 بتاعتي بتعمل أحسن منه

وعموما أنا بحب الفتيس الأتوماتيك العادي عن الـ CVT .. لإني جربته في اللانسر البوما وما عجبنيش نهائيا في أسلوب النقلات بتاعته ... وعلى هو عاجب ناس تانية وعلى فكرة هو عاجب ناس ثانية عشان بس كلامي ما يتفهمش إنه حاجة وحشة ... هو بس عايز معاملة هادئة عشان تاخد منه الهدف بتاعه اللى هو توفير الوقو

**dr_a7mad** · 03-09-2014 03:40 PM

معلش هوا ميتسوبيشي زي سوزوكي في مصر ؟!

توكيل وإعادة بيع وصيانة وصناعة وكدا ؟

**Mahmoud.Fathy** · 28-10-2014 03:26 PM

نقطة تفوق الاتراج الوحيدة عن الديزاير هي الاتساع الداخلي وحجم الشنطة ... فكرة اعادة البيع لصالح الاتراج اعتقد انها غلط ... لسة الناس في مصر ثقافتهم متستمح بشراء عربية مستعملة 3 سلندر 1200 سي سي وبثمنها في الوقت اللى هتتباع فيه يقدر يجيب عربية افضل منها ... الديزاير برضه اسمها سويفت ... والسويفت في مصر من اوائل التسعينات وسمعتها كسيارة كويسة جدا ... غير الاتراج اللى اول مرة تنزل السنة دي (مع اختلاف التكنولوجيا والشكل والموديل) لكن اسم السيارة معروف ... زي الكورولا ... زي اللانسر .. زي السيفيك ... زي الجولف ... عربيات بتنزل بنفس الاسم ونفس العلامة من اكتر من 25 سنة وماسكة نفسها في السوق وبتتطور شكلا وتكنولوجيا ... نفس الامر على السويفت ...

**Dr_Smart** · 28-10-2014 10:46 PM

يا جماعه قصة علامة ميتسوبيشي دي مش هتخلي الاتراج تكسب في اعادة البيع على اي حال من الاحوال

سوزوكي اسمها معروف برضو وسويفت اسم معروف مش جديد على السوق المصري

ماعندك الميتسوبيشي كولت حد سمع ان اعادة البيع بتاعتها كويسه ؟

عموما من الآخر ..اللي بيحكم الموضوع ده هو العرض والطلب .. يعني العربيه اللي هتنتشر اكتر هتبقى مطلوبه في المستعمل اكتر

وفي رأيي الشخصي حرام واحد يحدد قرار شراء عربيه عشان اعادة البيع .. دي أرزاق والله

والسويفت تكسب بكل المقاييس مع احترامي للاتراج وملاكها

**salahudin solt** · 29-10-2014 02:21 AM

المشاركة الأصلية كتبت بواسطة m.m.mohsen

انا انصح حضرتك بالديزاير وبكل صراحة انا لسه مستلمتهاش بس هستلمها كمان اسبوع ان شاء الله، انا كنت رايح احجز سويفت هاتش باك وناويها خلاص والله اول ما شوفت الديزاير اتوهمت بيها وعجبتنى جدا ماشاء الله، قمت بقى اقعدت اجيب مواقع اجنبيه كتير زى الموقع هنا بالظبط وفيها ناس كاتبين عن الديزاير لقيت الناس كلها بتشكر فيها وفسحب العربية واستهلاك البنزين اللى هو اكتر حاجة تهمنى وكمان التابلوه والتقفيل والاوبشن اللى فيها رغم ان التوكيل شال اوبشن كتير منها لكن الاوبشنز كويس جدا والصالون واسع جدا واللى عجبنى فيها ان الكنبة اللى ورا اوسع 15 سم من السويفت هاتش باك وقعدنا فيها لقيناها تاخد 3 مستريحين والشنطه مساحتها كويسه جدا وواسعه ، انا استخرت الله وربنا وفقنى ليها وحضرتك كمان ممكن تستخير ربنا ، ادعولى استلمها على خير وربنا يكفينى شرها ويرزقنى خيرها دى ديون واقساط وشقى عمر

مواقع اجنبية زي اية وياريت ميكونش فيها الافندية بتوع الدعاية لاني بقيت بحس من بعض المواضيع بناس بتكسر في حاجات وناس بتنفخ في حاجات