الموضوع: عاوز اشترى ساعة يد

المشاركة الأصلية كتبت بواسطة د.محمود صلاح

كاسيو Edifice

اشتريت منها 3 موديلات gold edition والزجاج بتاعها الياقوت الازرق ضد الخدش sapphire

وايضا سواتش السويرسيري الاوتوماتيك منها ارخص من الكاسيو ولكن ليست زجاج ياقوت

أنا معاك بخصوص قيمة الزجاج ضد الخدش sapphire لأنه بيحافظ على شكل الساعة كأنها جديدة بدون خدوش، مع مراعاة الحفاظ على باقي جسم الساعة و عدم دخول ماء أو بخار ماء، كل هذا (الخدوش + دخول الماء أو الرطوبة) يؤدي إلى تدهور حالة الساعة بمرور الوقت.

و على فكرة ساعات سواتش فيه منها زجاج ضد الخدش، و على فكرة برضه ساعات سواتش مش سويسرية :) مفاجأة للبعض و معظم ساعات سواتش ما يقدروش يكتبوا عليها كلمة SWISS MADE بالقانون لأنه قانونا عشان تعتبر مصنوعة في سويسرا لازم تكون على الأقل 51% من قيمة و عملية تصنيع الساعة تمت في سويسرا، و في الساعات الأوتوماتيك و الملو لازم توصل النسبة 80%
ساعات سواتش معظمها تحتوي على مكنة سويسري و بس، باقي عملية التصنيع تتم خارج سويسرا "أكيد الصين" و لذلك هتلاقي مكتوب عليها SIWSS أو ممكن SWISS MOVEMENT
Swiss Made - Wikipedia, the free encyclopedia

بالمثل ساعات Casio, Citizen, Seiko, Orient اسمها ساعات ياباني، لكن نسبة قليلة جداً منها في موديلات غاليا هي اللي هتلاقي عليها كلمة MADE IN JAPAN على المينا و محفورة على ظهر الساعة. غير كده في الموديلات العادية هتلاقي مكتوب JAPAN, JAPAN MOVEMENT إلخ...

المشاركة الأصلية كتبت بواسطة Amr_MO

يا سيدي شاكر افضالك جدا وتعبك معايا الف شكر ليك
استفسار تاني معلش انا عارف اني زودتها بس الواحد موسوس شوية من موضوع الساعات لاني عاوز اشتري ساعة تفضل معايا لوقت طويل

هل في امكانية لو في ساعة معينة مفيش منها غير دراع بلاستيك او ربر يعني، في امكانية لتغييره بستانلستيل بنفس مقاس الساعة بحيث انه يركب عليها؟ وهل في دراع من ماركة نضيفة كويسة بيتباع سواء لونه سيلفر او اسود لامع بيركب على الساعات الاصلية في حالة الرغبة في تغيير الدراع الاصلي الي هي جاية بيه؟

عندك الساعة دي على سبيل المثال:
Citizen Watch Eco Drive Axiom Date Black on Black Dial Leather AU1065 07E New | eBay

الساعة بتيجي بدراع بلاستك فقط فهل فيا مكانية لتغييره بعد شرائها بواحد ستانلستيل يركب عليها بالظبط ويكون من ماركة نضيفة بحيث انه ميقشرش بعد كدة ويحافظ على لونه؟

كل شيء ينفع، و بعض الساعات تحتاج أستيك "دراع" معين أو مخصوص أو يتعمل فيه تعديل معين عشان يركب، لكن معظم الساعات ممكن يركب عليها أي أستيك

بالنسبة للساعة اللي في اللينك، ده أستيك جلد طبيعي، و تعرف الجلد الطبيعي لو نظرت إليه من قرب أو صورته صورة واضحة و كبرتها هتلاقي "مسام" في الجلد و دي مهما حاولوا يقلدوها في الجلد الصناعي مش هتطلع زي المسام الطبيعية :) لكن برضه بتتقلد




عشان تعرف مقاس الأستيك اللي هتشتريه شوف في مواصفات الساعة أو قيسها Lug width, band width . ده عرض الأستيك من ناحية الساعة بالملليميتر
لو عايز أستيك ستانلس ستيل فيه نقطة مهمة، هل انت عايزه يبقى قافل و مافيش فراغ بينه و بين جسم الساعة، ولا عايزه يبقى قافل بالضبط على جسم الساعة. ده بيعتمد على شكل القطعة الأخيرة في الأستيك End link (القطعة الأقرب لجسم الساعة) دي في منها Straight end، و فيه منها Curved end
طبعاً الStraight end هيركب على أي جسم ساعة بدون مشاكل.
لكن الCurved end لازم يكون الcurve بتاع الأستيك واخد نفس الCurve بتاع جسم الساعة و دي مسألة معقدة شوية لكن كل شيء و له حل
الساعة اللي كنت جمعتها هتلاقي صور ليها بأستيك straight end و أستيك تاني Curved end شوف عملت إيه عشان أعرف أركبه عليها :) لأنه مش بتاعها.
عندك ساعة تانية على المدونة اسمها Timex دي جبت لها أستيك ستانلس ستيل رخيص شوية كان Curved end links لكنها كانت مفرغة فدي كان سهل أظبط الكيرف بتاعها باستخدام مفك، أفتحها شوية و أضيقها شوية و هكذا.
عندك على المدونة برضه ساعة marina militare دي جبت لها أستيك ستانلس بتاعها (مصمم ليها) مستعمل كان بـ 44$
الموضوع فيه تفاصيل كتير لو انت غاوي
عايز أستيك ستانلس كواليتي كويسة موجود بس كله بثمنه :)
ممكن لو عايز أي حاجة و السلام انزل العتبة عند فندق الكرنك هناك محلات قطع غيار و صيانة ساعات هتلاقي عندهم ستانلس ستيل بس انت و حظك في المقاس و الشكل و الكواليتي اللي موجود.

المشاركة الأصلية كتبت بواسطة FAR!D

استاذ ابو حسني استفسار
واخد صديق الساعه امنيه حياته اسمها بيلوت
اكتشف ان ليهم توكيل بمصر ودخل يسأل عليها لقاها ب480 مش جنيه الف جنيه
و اقل ساعه لاقاها ب150 في التوكيل
هل فعلا في ساعات بالاسعار المجنونه ديه؟ وهل المدعوه بيلوت ديه تستاهل؟

عادي زي ما فيه عربيات بأسعار خرافية و أعداد محدودة، هتلاقي ساعات كده برضه، هتلاقي موديلات غالية جداً ممكن ما تسمعش عنها. و هتلاقي صيانتها بأسعار وهمية زي العربيات برضه. و فيه أغلى من كده و عندهم ما يبرر ارتفاع السعر زي: العدد المحدود، الإمكانيات بيسموها complications، الخامات، عدد عمال محدود ذوي خبرة عالية بمرتبات فلكية. تكلفة الأبحاث و التطوير خاصة لما تكون الشركة دي بتعمل ابتكارات معينة بتصنع المكنة بنفسها مش بتشتريهاجاهزة و تحطها في ساعة. حاجات كتير.
النوع اللي حضرتك قلته ده هو HUBLOT و ينطق "أوبلو"
طبعا دي للفرجة فقط لو صاحبك نفسه في الستايل بتاعها يبقى يشتري شبيه ليها homage .هتلاقي كتير

المشاركة الأصلية كتبت بواسطة solyahmed

مبروك الساعة الجديدة يا ابو حسني .. واضح ان حضرتك بتفضل الساعات التقليدية الكلاسيك يعني . مش شايف عند حضرتك ساعة كاجول او ديجيتل و اية رأيك في ساعات جي شوك عموما

واية رايك في الموديل دة
GA-1000FC-1A - Watches - CASIO

أنا فعلاً كلاسيكي شوية :)
ال G-shock حلوة طبعاً و مليانة وظائف إلكترونية بس مش الستايل بتاعي

المشاركة الأصلية كتبت بواسطة solyahmed

انا دورت علي الموديل ده علي اي باي نفس الماركه اللي حضرتك قولت عليها
U-BOAT Italo Fontana U-51 Rattrapante

ودي اللي لقيتها علي اي باي

Parnis 50mm Mechanical Stainless Steel Big Black Dial Automatic Mens Watch E565 | eBay

ايه راي حضرتك هل هي نفس الموديل بالضبط ؟؟ الحجم وسمك الساعة وحضرتك شايف ان الماركة دي جيدة وبتعيش parnis

الناس اللي بتجمع ماركة Parnis دي بيستعملوا مكونات ذات جودة عالية بناء على تجاربي الشخصية و آراء الناس على النت من كذا سنة. البائعين أمناء و ثقة و عندهم استعداد لاستبدال التالف و عمليات الصيانة يعني اطمئن. و إن شاء الله هتستلم ساعة شغالة منهم يبقى مافيش مشاكل عندك
الساعات الصينية الhomage لما تشوفها و تقارنها بما يسمى كوبي هتديها أكتر من سعرها بكتير و تحس الفرق.
الموديل ده كبير جداً خلي بالك 50مم هيكون على الطبيعة كبير. و بتستخدم فيه مكنة أوتوماتيك مشهورة (بيستخدموها في كتير من ساعات Parnis أشكال تانية كلاسيك) و العدادات بتاعتها (تاريخ، يوم، 24ساعة، شهر) يعني نتيجة كاملة.
و يتم ضبط التاريخ و اليوم و الشهر عن طريق ضغط 3 أزرار (الاتنين اللي حوالين الشاكوش، و التالت في الجنب التاني هتلاقيه لوحده)
الشاكوش Crown عليه Crown guard محترم قلاووظ. شوف الفيديو
ملحوظة تانية الموديل ده هتلاقي منه زي الأصلي (الشاكوش على الشمال) و هتلاقي موديلات تانية الشاكوش على اليمين. اختار اللي انت عايزه

رأيي لو عاجباك و عايزها اتوكل على الله لن تندم.

https://www.youtube.com/watch?v=nTMYZ9-72bw