مش عارف اركن بسبب الجيران

**solycar** · 21-10-2008 03:20 PM

المشاركة الأصلية كتبت بواسطة MMamdouh

اعملة محضر عشان الحديدتين اللى فى الارض... حيتعملة غرامة محترمة

حط عود كبريت خشب فى القفل اذا كان حاطت سلسلة... بس تكون عربيتة مركونة عشان يتحبس

MMamdouh

مفتكرش موضوع المحضر دة مجزى

لان مش هيبعتوا حد اصلا لموضوع تافه بالنسبالهم زى دة

بالنسبة لعود الكبريت و انا بحطهولة و اتقفشت مع اول قلم هقول على محمد ممدوح و شركاه اللى قالولى على الفكرة دى:D

**solycar** · 21-10-2008 03:34 PM

المشاركة الأصلية كتبت بواسطة mohamed_rhem

بص يا جميل
من الاخر شوف حد تعرفه صاحب معرض سيارات او حد عنده عربيه ملهاش قطع غيار او حد مسافر وهات علي قد ما تقدر وارشقها عربيات علشان يعملولك الف حساب
انا مره راكنت بسرعه عند والدي وكنت عامل حسابي مغبش اكتر من دقيقه علشان كان في اولاد بيلعبوا كوره وقالولي معلش ارجع ورا
طبعا انا زوق حتي مع عيل صغير
خصوصا انا مش حغيب
المهم طلعت وماما اخرتني شويه
نزلت لاقيت عربيه حارنا قافله علي الطريق تماما
هو شاب صغير يصغرني ب 10 سنوات
قولت يمكن ميعرفش العربيه ندهت عليه
قالي انا ندهت عليك وانت مردتش
قولت في عقلي ده انت عارف انها عربيتي وقاصد
طيب بكل زوق ممكن اخرج قالي المفتاح مش هنا
قولتله طيب
روحت رايح معرض اخويا وجايب مرسيدس لونج
وراكنها وقفلت عليه
وطبعا هو اللي بقي في وضع يتحايل علي
انا والله لو حد ركن مكاني عادي اودر علي حته تانيه مفيش مشكله
وخليك زوق مع الزوق
واللي يقرفك طلع عينه بالادب برضه ومتغلطش في حد
الموضوع مش عداء انت عندك عربيه وهو عنده عربيه والشارع للجميع
بس بأحترام واللي يعدي حدوده يبقي يستاهل اللي يجراله
او ممكن تسيب نسخه مع والدك من مفتاحك والعكس علشان متطلعش كل اما تحب تركن توديله المفتاح وريح دماغك طالما هما ملتزمين
ودمتم بخير
ابو اياد

للاسف الناس مبقاش عندها اخلاق

عاوز تشوف بنفسك انزل امشى فى الشارع بعربيتك

هتلاقى واحد ولا تعرفه ولا عمرك شفتة عاوزيلبسك مطب لمجرد انك عاوز تعدى منه

و واحد تانى بعد متعدى منه يضرب نور لذيذ عشان تعديت حدودك و عديت منه

و لو مدى اشارة تلاقى اللى جاى من ورا معندوش اسنعداد يساعدك بفرمله صغيرة جدا

و لو سرحت وانت ماشى و عملت غلطة بسيطة تسمع ابشع الالفاظ

و لو حد رما عليك و انت لحقت نفسك منه نادر لما يعتذرلك باى اشارة منه

هى دى اخلاق 95% من قائدى السيارات فى مصر اللى عمرك مشفتهم قبل كدة ولا تعرفوه و تقولى خليك زوق

طب انا لما بكلم حد بزوق ممكن تلاقى رد بقلة زوق

**shanodaa** · 21-10-2008 04:35 PM

بلاش مشاكل اتفهمو مع بعض بالخير والاحترام تاني منعا للمشاكل عشان الموضوع ما يكبرش

**l0new0lf** · 21-10-2008 05:02 PM

طيب بما ان موضوع الحديد اتفتح
انا عندى نفس المشكله
الناس (مش بس الجيران لا برضه ناس من شوارع تانيه) بتركن و تقفل عليا باب الجراج مع انى كاتب عليه (جراج رجاء عدم الوقوف)
زمان لما كان فيه صحه و قلة عقل كنت بجيب العصابه و نشيل العربيه شيل و نرميها فى اى مكان, و مره بعد ما دخلت عربيتي رجعنا العربيه لصاحبها تانى قدام الجراج و قمت فاككله ال 4 بلوف بتوع ال4 فرد
الان العصابه نصها بتقضى احكام فى المزرعه و النص التانى بلغ فرار
انا اعمل ايه؟؟
احط حديد والا القانون بيدينى الحق انى اكسر اى عربيه قافله عليا و ازقها؟

**M.Elhamy** · 21-10-2008 05:15 PM

ممكن تحط برميل

**l0new0lf** · 21-10-2008 05:20 PM

المشاركة الأصلية كتبت بواسطة elhamy201

ممكن تحط برميل

اتسرق
:D

**waleedrahmy** · 27-10-2008 06:02 PM

ياجماعة براحة الجار لو عليا جار والنبي وصي علي سابع جار

**HeMa_LanCeR** · 27-10-2008 06:20 PM

المشاركة الأصلية كتبت بواسطة l0new0lf

طيب بما ان موضوع الحديد اتفتح
انا عندى نفس المشكله
الناس (مش بس الجيران لا برضه ناس من شوارع تانيه) بتركن و تقفل عليا باب الجراج مع انى كاتب عليه (جراج رجاء عدم الوقوف)
زمان لما كان فيه صحه و قلة عقل كنت بجيب العصابه و نشيل العربيه شيل و نرميها فى اى مكان, و مره بعد ما دخلت عربيتي رجعنا العربيه لصاحبها تانى قدام الجراج و قمت فاككله ال 4 بلوف بتوع ال4 فرد
الان العصابه نصها بتقضى احكام فى المزرعه و النص التانى بلغ فرار
انا اعمل ايه؟؟
احط حديد والا القانون بيدينى الحق انى اكسر اى عربيه قافله عليا و ازقها؟

الموضوع ده انا كمان بعاني منه بس الحل لذيذ جدا وهيخلي الواحد مايركنش تاني
اولا جبت قلم دوكو وكل ما واحد يقف اكتبله علي الأزاز (برجاء الأعتناء جراج خاص) أظن في منهي الأدب
هتقولي افرض عملها تاني هقولك سهله جدا أكتبهالو علي الصاج وياسلام لو معاها فرده نايمه
وعندك بقي لو فضل واقف وانا عايز امشي أجيب عربيه نقل من بتوعنا وهات أكصدام في أكصدام طبعا انا بألأكصدام الخلفي علشان عباره عن صاج 3 مم
واقوم زاقق العربيه ومره مع مره الناس ابتدت تفهم ان ده جراج
وممنزع تعمل حديد اقل شكوي في الحي هينزلو علشان ياخدو الحديد ليهم (سبوبه يعني) وقلم الدوكو ب 5 جنيه بس جميل قوي

**Karim_Mohy** · 27-10-2008 06:58 PM

mohamed_rahem gab mn el a5r< 5alik zoo2 m3 el zoo2>.....we msh shart elet adab...khalik bared we kolo bel adab bardo

**Mystique** · 27-10-2008 07:37 PM

احنا عندنا نوعا ما نفس المشكلة..المكان اصلا بتاعنا عشان تحت عمارتنا بس تقول ايه للناس اللي ف الشارع كلهم بيحلالهم الركنة ف الحتة دي بالذات..مع ان في جراج قدامنا ب50 متر.

أنا عموما بتصرف كالآتي
معايا مفتاح الاستبن بتاع والدي وهو معاه مفتاحي..بنركن موازي للرصيف -ممنوع الركنة عمودي- بس ورا بعض وفيه رصيف طالع عن الشارع سنة هو اللي بتبتدي من وراه الركنة..اللي بييجي فينا الأول بيحجز مكان عربيتين..يعني لو انا جيت الأول بركن مش قدام الرصيف على طول..لأ..بوسطن نفسي..لا تكفي عربية ورايا ولا قدامي..لما ييجي والدي بيحرك عربيتي قدام سنة ويركن ورايا..وبنسيب بقية المكان للي حاطين عينهم عليه.

خللي معاك مفتاح والدك..ومعلش استحمل حكاية انك تحرك العربية..في سبيل تكبير الدماغ ومنع المشاكل.