فكرة مشروع مش محتاج راس مال كبير وربحه عالي . رأيكم ؟؟

**Mahmoud Naguib** · 18-08-2014 11:28 AM

ازيكم ياشباب

في فكرة مشروع مش محتاج راس مال كبير ولآ تكاليف وربحه عالي والفكرة دي جت ف بالي من فترة

هي عربية غزل بنات وفشار ف نفس الوقت بس عربية شيك مستوردة مش زي اللي بيمشوا ف أغلب شوارع مصر

وطبعا هحتاج مكان راقي أقف فيه علشان متبهدلش من اللف وعلشان برضه الواحد ميهينش نفسه

المشكلة بقى ف المكان

أنا محتاج حديقة مشهورة وعليها تردد عالي وياريت برضه لو حد يعرف ف أسعار تأجير مكان صغير فيها

يعني الأزهر بارك مثلا أو الحديقة الدولية أو كورنيش مثلا أو ف منطقة راقية زي روكسي أو المهندسين

ياريت حد يفيدني ف الموضوع ده خصوصا اني مش من القاهرة برضه

أنا شغلتي الأساسية مهندس زراعي واللي خلاني أفكر ف الفكرة دي هو اني مش بحب روتين الشغل وعايز أبقى بدماغي مش عايز حد يتحكم فيا يعني

**أبو_يوسف** · 18-08-2014 11:46 AM

ممكن تقف في المولات
شفت عربية غزل بنات في هايبر وان بيعمل اشكال جديدة وغريبة وبيبيع الواحدة ب 20 ج
غير الزلابيا اللي عاملة شغل جامد :)

**abohend** · 18-08-2014 11:52 AM

فكرة ممتازة
في شباب من الأسكندرية عملوا مشروع مشابه
مشروع كافيتريا متنقلة (على شكل مج تقريبا)
وقفوا بيها قدام مول مشهور
بيقدموا مشروبات ساخنة نضيفه في كبايات بلاستيك أو فوم
بيبيعوا كانزات و عصاير و جرانيتا و هكذا

قابلتهم المشاكل الآتية
سايس المنطقة بيشرب و يعزم على صحابه فردة
الحي بيجي ياخد اللي فيه النصيب
عرباوي شغل ابنه معاهم بالعافية
أمين شرطة بيجي من فترة للتانيه ياخد اللي فيه النصيب
وجود كافيتريات ثابته بتقدم مشروبات معتادة و أقل طبعا في الجودة و وجود الشباب دول أثر على أرباحه

مشاكل من هنا على مشاكل من هناك
بلطجية شوية
داخلية شوية
الحي شوية

الموضوع بقى غير مربح و مشاكله كتير
قفلوا و رجعوا أشغالهم تاني

فكر كويس و حدد المكان و التراخيص اللازمة و أصحاب القوة في المنطقة اللي هتقف فيها
و أعرف مين هيتضرر من وجودك و ممكن يحاربك إزاي و هتقدر تدافع عن نفسك و لا لأ

بالتوفيق

**Mahmoud Naguib** · 18-08-2014 11:58 AM

شكرا لتفاعلكم الإيجابي مع الموضوع وأنا مستغرب لأني حسيت اني هلاقي ردود سلبية علشان يمكن ف الظاهر إن الفكرة دي مهينة للي هيعملها !!

بس تمام يعني

timtim صعب حوار المول دي هياخد فلوس جامدة مني غير اني لسة مبتدئ يعني
متعرفش مثلا مكان كويس تاني زي نادي مشهور أو منطقة كورنيش راقية أو منطقة سينيمات أو حديقة ؟؟

abohend مهو أنا برضه مش هختار أي مكان يعني وبعدين هي هتبقى متنقلة يعني لو حصل مشاكل أنقل مكان تاني
ياريت تفيدني أكتر ف حوار المكان ده ؟؟

**أبو_يوسف** · 18-08-2014 12:10 PM

يعني حتى لو على رصيف امام المول او قريب من الباركنج هاياخد فلوس كتير برضه؟
الاماكن اللي فيها هايبر ماركت بيبقى عليها حركة كتير اوي...

**Mahmoud Naguib** · 18-08-2014 12:30 PM

timtim أنا شايف ان اللي بيروح هايبر أو كدة مش بيبقى ف دماغه يجيب فشار مثلا أو غزل بنات وهو مروح يعني !!
يعني الموضوع ده موجه أكتر لل Couples والناس اللي رايحة تتفسح

يعني سينما نادي حديقة كلية مثلا !!

انت اي رأيك ؟؟

**M_samii** · 18-08-2014 02:22 PM

شوف حي الزمالك عند فنون جميله و تربيه فنيه بيبقي فيه طلاب كتيير و كده كان واقف هناك مره عربية هوت دوج و بتبيع السندوتش ب 20 جنيه و المكان مربح و المنطقه و الناس راقيه و ممكن تشوف الجامعات التانيه

**Mahmoud Naguib** · 18-08-2014 02:42 PM

M_samii أنا فكرت جديا ف منطقة الزمالك بس الكورنيش
فكرتك جميلة ماشاء الله مشكور جدا

**#MAAM#** · 18-08-2014 02:45 PM

ربنا يوفقك ياريت كل الشباب يفكر زيك بدل القعدة على القهاوي وانتظار الفرج

**طارق _عبد السلام** · 18-08-2014 03:05 PM

تحيه كبيره لحضرتك ولاى شاب بيقاتل لتحسين معيشته
للاسف بيقابلنى شباب كتير جدا عايز وظيفه نظيفه بمعنى ميوسخش هدومه ولا ايديه وعايز مرتب يجوزه في سنه ولا اتنين طبعا مش في مصر الكلام ده الانادر
لكن لاى شاب المهم البدايه واللى تكسب بيه العب بيه متصرفوش وسع شغلك واصرف كأنك لسه مكسبتش
انا من فضل الله بدأت من تحت الصفر منتظرتش وظيفه واجتهدت في شغلى وما كان فارق معايا رأيى اصدقائى المحبط دائما واحترفت في مجالى ميكانيكا النسيج وتهافتت على توكيلات شركات اوروبيه واسيويه للعمل معهم وكنت انا اللى برفض وجاء لى دعوه من اكبر شركه في العالم لصناعه ماكينات النسيج الدائرى واستضافونى في المانيا وتدريبى على احدث الماكينات ومن فضل الله
الظروف تحسنت لكن المهم التوفيق من الله ..والبدايه

توكل على الله وربنا يبارك لك في حلالك

الموضوع: فكرة مشروع مش محتاج راس مال كبير وربحه عالي . رأيكم ؟؟

LinkBack

أدوات الموضوع

عرض

-

فكرة كويسة -

-

-

-

المواضيع المتشابهه

مشروع هايل محتاج رأيكم

محتاج رأيكم يا جماعه: تأجير السيارات هل مشروع مربح ارجو الافاده لو سمحتوا

فكرة مجنونة... محتاج رأيكم الفني

محتاج رأيكم فى مشروع التخرج

فكرة مشروع

الكلمات الدلالية لهذا الموضوع

المفضلات

المفضلات

ضوابط المشاركة