الموضوع: اكتر سياره اعتماديه تعيش 5 سنوات مستريح في حدود 190

المشاركة الأصلية كتبت بواسطة م أحمد

متشكر جدا لرد حضرتك الموضوعى
أولا لست متحيز ضد اليابانى مطلقا، لان فى مجال عملى أجهزة يابانى من سنة 1982 شغالة لغاية دلوقتى كأنها جديدة و لى زملاء عملو سنين طويلة معهم و سافرو اليابان و بيحكو باستمرار
ولو مش كدة فيكفى ان اكون زى اى فرد لا علاقة له بالصناعة و اعرف كلمة اليابانى فى الاجهزة معناها ايه
الأجهزة اليابانى الموجودة فى مجال عملنا زى الدهب و لا خلاف على ذلك- بس فى برضه عندى معادن زى البلاتين
و الفكرة هل انا محتاج الدهب و لا البلاتين و ايه اللى يفيدنى
بالمثل فى مجال السيارات...مين ينكر ان تويوتا او هوندا من اليابانى عربيات رائعة بس فيه برضه عربيات رائعة اخرى كتيير غيرهم بتظهر فيهم عيوب زى ما ظهرت فى تويوتا
برضه هناك ربط واضح بين أرقام المبيعات و الاعتمادية ---يكفى اعرف ان السوق الفلانى الجو فيه مولع و بيحب التكييف انزل له عربية تكييفها قوى جدا و احقق مبيعات ضخمة علشان لعب على نقطة التكييف او اعرف ان الطرق فى بلد مكسرة انزل لهم عربية عالية و دا واضح جدا فى حسابات الاعضاء لما بيقارنو بين العربيات دلوقتى فى مصر او أنزل بأسعار رخيصة
فمش علشان التكييف قوى او ارتفاع العربية كويس او ناس اخلاقهم حسنة او انزل حاجة رخيصة تعمل مبيعات يبقى مؤشر لجودة و كفاءة المنتج بالكامل بس ممكن نعتبرها كفاءة تسويقية

أساس الموضوع واحد بسأل على عربية إعتمادية لمدة 5 سنين زيرو فأى عربية زيرو هتحقق له طلبه لهذه المدة او اغلبها - و بعد ذلك على حسب الاستخدام و الصيانات أولا ثم نوع السيارة ثانيا ..و مرور الوقت هو اللى بيحدد الاعتمادية من تجارب الملاك المباشرة و من الأخبار العالمية !

في الحقيقة.. اللي حضرتك بتقوله وأنا مشاور عليه بالأزرق ده هو صلب أسباب نجاح الصناعة اليابانية

زمان كانوا بيقولوا إن الجودة هي الالتزام بالمواصفات

إنما ما حدش قال أيامها المواصفات دي مين اللي بيحددها .. بمعنى إن على أي أساس اللي عمل المواصفة افترض إن الأرقام والصفات اللي بينتج عليها هي أفضل شيء!!!


تعريف منظمة الأيزو للجودة بيقول إن الجودة هي "تحقيق رضا العميل"


يبقى لما العربيات تتعمل بحيث تكون تكييفها ممتاز في المناطق الحارة.. ده مؤشر رئيسي للجودة في المنطقة الحارة دي.

بس على فكرة .. مش العربيات الياباني بس هي اللي تكييفها ممتاز.. العربيات الأمريكاني كمان تكييفها فوق الممتاز... بس إيه اللي يخلي الناس في الخليج تسيب الأمريكاني وتروح للياباني؟؟؟


ازدياد المبيعات مش معناه إن العربية رخيصة... إنما معناه إن العربية بتحقق كل اللي الزبون عايزه من العربية.

وزي ما حضرتك قلت.. "و الفكرة هل انا محتاج الدهب و لا البلاتين و ايه اللى يفيدنى"

وهو ده اللي عملوه اليابانيين

مش هقوللك بقى اعتمادية وتكييف وأوبشنز واقتصاد في البنزين و و و و.... باختصار هما عرفوا الزبون عايز إيه وعملوه.


طبعا.. أنا بتكلم على تاريخ ممتد لحد دلوقتي... واللي كان بيحصل مع العربيات الياباني زمان هو نفسه اللي بيحصل مع هيونداي وكيا دلوقتي


ومسألة الكفاءة التسويقية هي جزء مهم جدا من المنظومة الإنتاجية... لإنها هي اللي بتدرس العميل وبتعرف توجهاته وبالتالي المنتج بيطلع على جودة عالية نتيجة الدراسة الصحيحة

أما بالنسبة لموضوع أخلاق اليابانيين... فأنا أشرت إليه لسببين:

1- إن الأخلاق الحميدة سبب رئيسي للجودة لإن الإنسان مش محتاج رقيب عليه علشان يطلع منتج بجودة عالية.. وبالتالي ده بردو السبب إن معظم البلاد اللي بتحاول تقلد نظام عمل اليابانيين مش عارفين يوصلوا لنفس كفاءة الإنتاج وجودته... لإنهم ما أخدوش صلب الموضوع اللي هو الأخلاق.

2- القيم والأخلاق هي اللي خلت اليابانيين يسحبوا سيارات بالملايين لمجرد اشتباه لأي خطأ ممكن يكون موجود... مع علمهم الكامل بمدى تأثير الموضوع ده عليهم من الناحية المادية والمعنوية... بس هما بياخدوا الموضوع ده كأساس للتطوير عندهم.

وده مبدأ الـKaizen المعروف عن اليابانيين وتويوتا تحديدا.

لو حضرتك قابلت حد اشتغل في أي مصنع أو توكيل محترم لتويوتا.. هتلاقيه بيتكلم بمنتهى الحماس والإيمان بالمبادئ والأخلاق.

كل الكلام ده هو اللي بيأكد إن اليابانيين وتويوتا على وجه التحديد ما وصلوش لل هما فيه من فراغ.


على فكرة... اللوجو ده هو شعار تويوتا قبل سنة 1990... وأنا مش حاطه الرمز بتاعي من فراغ... إنما لعلمي بمدى رقي أسلوب العمل في تويوتا بحكم اطلاعي وشغلي في الجودة... ده غير إني كنت أحد ملاك سيارات تويوتا في الماضي.



...