الزملاء الأعزاء ... السلام عليكم

بدون مقدمات أول ملاحظه هاقول عليها هاتكون بخصوص قطع الغيار وبالأخص فلتر البنزين ... أخر مره اشتريته كان ماركه فايكو المانى ب ٤٥ جنيه
اول امبارح كنت فى اسكندريه ومعايا واحد صاحبى عنده محل قطع غيار وقاللى تعالى ننزل عزبه سعد اجيب حاجات للمحل .. وانا هناك عند تاجر الجمله سألته على فلتر بنزين اوبل قاللى عندى فايكو المانى ب ٣٠ جنيه !! شفته لقيته هو هو اللى بشتريه ب ٤٥ ... صاحبى نزل وحاسب عليه جمله ب ٢٤ جنيه كمان ... يعنى جبت اتنين ب ٤٨ جنيه
معقول يبقى هامش الربح للدرجادى مع انى متأكد ان الفلتر هو بالظبط اللى ب ٤٥


تانى ملاحظه خاصه بعربيتى وهى مع التكييف او الحموله بلاقى العربيه اتخنقت بشكل ملحوظ وبقى سحبها مش حلو خالص .. مع انها فى العادى وانا سايق لوحدى سحبها جبار .. مع العلم ان الكمبروسر عندى لما قيسته كان كبسه وحش ... ممكن بدأ يقفش ؟!! طيب لو بيقفش ايه اللى بيخليها تسحب وحش مع الحموله

تالت ملاحظه :
طبعا كل واحد فينا بيبقى عارف معدل سحب عربيته ولما بيقل بيبقى حاسس ... لما يزيد مره واحده بقى وتبقى صاروخ بعد تفويله من بنزينه مصر للبترول ؟!!! يبقى ايه ؟!
يعنى كل بنزين البلد تعبان وبنزين مصر للبترول سليم ؟؟؟ وواحد صاحبى مون من نفس البنزينه قبلى ولما حكيتله قاللى حصل نفس الموضوع معايا مع نفس البنزينه

آسف على الإطاله ومستنى رأيكو
تحياتى