ارجو المساعدة في اسرع وقت قبل التورط

**engboy** · 27-08-2014 02:23 PM

رحت انا وصاحبي اتفرجنا على عربية اوبترا 2009 ماشية 70 الف كيلو اللون دهبي
راشة حزام بس ..
وكبوت وشنطة وسقف فبريكة حالة الموتور ممتازة .. بس العربية فيها حتة بسيطة مردودة على البارد في الصاجة اللى فوق الفانوس الامامي يمين والحوض فاربكة ما شاء الله .. السمكرى اللى معانا قال مفهاش حاجة ومتعيبش العربية .. الخبطة قد عقلتين صباع من اثر خبطة امامية في الفانوس اليمين
فضلا ان عتب العربية من تحت في شوية حكات وخبطات وقالى دي عادي برضه متعيبش العربية
وبطن العربية فيه حكات من من اثر مطبات مصر الجميلة وقالى عادي برضه 90% من عربيات مصر لازم هتلاقي فيها الحكات دي من المطبات الغبية والعشوائية بتاعتنا .. فهل ده يعيب العربية ؟؟

برضه كشف على فردتين السلاح او الشاسية ورى وقدام قالى زيرو فبريكة وزي الفل

اخيراً
انا معرفش حتة الصاجة اللى بيتربط فيها مسمارين الفانوس من فوق اسمها ايه .. بس هل دي تعيب العربية في الحتة المرودوة على البارد واللى اكلمت عليها فوق ولا ملهاش قيمة ؟؟

وهل هى دي اللى اسمها شنب العربية في العربية الاوبترا ؟؟

**Molham** · 27-08-2014 02:37 PM

العربية دى كانت مع واحد صاحبى وراح باعها لتاجر ب 60000 وهيا اوتوماتيك وفيها كل المواصفات اللى انت بتقول عليها لو هيا دى العربية قوله دى عربية واحد اسمه عمر لو هيا اشتريها واديله الفين جنيه ولا حاجة بس هيا عربية ممتازة

**engboy** · 27-08-2014 02:44 PM

المشاركة الأصلية كتبت بواسطة molham

العربية دى كانت مع واحد صاحبى وراح باعها لتاجر ب 60000 وهيا اوتوماتيك وفيها كل المواصفات اللى انت بتقول عليها لو هيا دى العربية قوله دى عربية واحد اسمه عمر لو هيا اشتريها واديله الفين جنيه ولا حاجة بس هيا عربية ممتازة

اتوماتيك وبـ 60000 :)
ايه الاسعار الجميلة دي انا عايز اتنين

عموماً لا مش هى عشان صاحبها اصلا من مرسي مطروح وهى معاه من الزيرو وهو اول يد وطالب فيها 80000 الف مش راضي ينزل جنيه

بس برضه معرفتش هل الخبطة البسيطة اللى في الصاجة واللى فوق الفانوس الامامي يمين تعيب العربية رغم انه ردها على البارد وفيه تقشيرة خفيفة للبوية فيها وهى قد عقلتين الصباع ..
هل ده يعيب العربية لو حب صاحبي يبيع في المستقبل ؟؟

**ايمن فهمى** · 27-08-2014 03:23 PM

يا باشا ولا حاجه من كل اللى انت قولته ووصفته يعيب العربيه او اى عربيه
لو عجباك اتكل على الله

**abdalaha** · 28-08-2014 10:30 AM

العربية زي الفل و80 الف سعر مناسب جدا للموديل والمواصفات

**engboy** · 28-08-2014 11:34 AM

المشاركة الأصلية كتبت بواسطة ايمن فهمى

يا باشا ولا حاجه من كل اللى انت قولته ووصفته يعيب العربيه او اى عربيه
لو عجباك اتكل على الله

جزاك الله خيرا ً
يعنى الصاجة المخبوط اللى فوق الفانوس واللى فيه صدادات الجلد بتاعة الكابوت وبيتربط فيها مسمارين الفانوس الامامي دى ما تعيبش العربية .. وزي ماقولت خبطتها قد عقلتين صباع ومردودة على البارد

معلش انا عمال اكرر فيها لانى مش عارف انتوا فاهمين قصدى ولا لا

على اى حال ربنا يكرمك وبدات اطمن

**engboy** · 28-08-2014 12:47 PM

المشاركة الأصلية كتبت بواسطة abdalaha

العربية زي الفل و80 الف سعر مناسب جدا للموديل والمواصفات

يعنى 80 الف مناسبة عليها ..؟؟
يعنى مش صاحبي مش هيبقى مغلوب 2000 او 3000 جنيه ؟؟ فيها

**ahmed.zahra** · 28-08-2014 01:46 PM

يا جماعة انا مش بقطع على حد بس انا احتمال اشتري عربية تانية يوم السبت و لو ربنا وفقني فيها حبيع عربيتي و هي 2009 لون سماوي ماشية 49930 كم فابريقة بالداخل و الخارج و كاملة أوتوماتيك بحالة ممتازة صالون الفابريقة زيرو و عليه فرش جلد و أرضية جلد من أول يوم و لسه مغير مساعدين امامي و بطاحات و مغير سير كاتينة و بلية و شداد كاتينة و سير المجموعة من حوالي 15 يوم و اشتريت طرمبة مياة عشان المفروض بتتغير مع طقم الكاتينة بس الميكانيكي قاللي اللي راكبة حالتها ممتازة فاللي حيشتري العربية حلال عليه الطرمبة الجديدة و زيت فتيس من 10000كم و البطارية متغيرة من حوالي 4 شهور طبعا فيها بعض الحكات و الترييحات الخارجية. بالكتالوجات و المفاتيح الأصلية و مركب لها إنذار غير الأصلي بتاعها و طالب 85000 نهائي

**ايمن فهمى** · 28-08-2014 01:56 PM

المشاركة الأصلية كتبت بواسطة engboy

جزاك الله خيرا ً
يعنى الصاجة المخبوط اللى فوق الفانوس واللى فيه صدادات الجلد بتاعة الكابوت وبيتربط فيها مسمارين الفانوس الامامي دى ما تعيبش العربية .. وزي ماقولت خبطتها قد عقلتين صباع ومردودة على البارد

معلش انا عمال اكرر فيها لانى مش عارف انتوا فاهمين قصدى ولا لا

على اى حال ربنا يكرمك وبدات اطمن

ياباشا انا عارف الى انت تقصدة اسمه الشنب من الفانوس اليمين للشمال
اتكل على الله
ربنا يجعلها وش الخير عليك ويديك خيرها ويكفيك شرها

**engboy** · 28-08-2014 02:36 PM

المشاركة الأصلية كتبت بواسطة ايمن فهمى

ياباشا انا عارف الى انت تقصدة اسمه الشنب من الفانوس اليمين للشمال
اتكل على الله
ربنا يجعلها وش الخير عليك ويديك خيرها ويكفيك شرها

يا باشا مش عارف اقولك ايه طمنتى ربنا يبارك فيك ..
هو هيتجنن على لونها .. هى بصراحة ظريفة رغم انى بحب الاسود والرصاصي في الاوبترا .. انا عن نفسي عربيتي اسود ملوكي
الف شكر صديقي العزيز