السلام عليكم
دلوقتي انا عندي شقة ايجار قديم حوالي١٥ ج صاحب البيت رافض ياخد ايجار من البيت كله بقاله سنتين وانا بفكر ادفع في المحكمة وباقي البيت مكبر دماغه البيت عشرين شقة وحد يعرف صاحب البيت بيعمل كده ليه وايه الحل
عرض للطباعة
السلام عليكم
دلوقتي انا عندي شقة ايجار قديم حوالي١٥ ج صاحب البيت رافض ياخد ايجار من البيت كله بقاله سنتين وانا بفكر ادفع في المحكمة وباقي البيت مكبر دماغه البيت عشرين شقة وحد يعرف صاحب البيت بيعمل كده ليه وايه الحل
اللي اعرفه انه لما يرفض الايجار هيرفع قضية عالسكان انهم امتنعوا عن سداد الايجار عشان يخرجكوا من البيت .. لعبة خبيثة
الحق من بكرة الصبح تقوم محامى وتدفع فى المحكمة
والا ............هتندم حيث لا ينفع ندم
لازم تجتمعوا كلكو مع بعض وتتفقوا تقوموا محامي وهو اللي هيقولكو تعملو ايه بالظبط .. ياريت الموضوع يتم بسرعة ولو عارف حضرتك حد من سكان البيت التاني لازم يتحركوا عشان كل واحد يحافظ على بيتو
ويعملوا ايه اصلا ال 15 جنيه لو خدهم منك
شوف الراجل ممتنع ليه يمكن يكون على حق وانتم اللي غلط
اتفقوا تعلوا الايجار
حرام 15 جنية
حاليا انا في سيجال بيني وبين نفسي في مسئله مثل هذه وعند البحث الشرعي في المسئله وجدت فتوى من مفتي مصر السابق نصر فريد واصل بان قانون الايجار القدين مخالف شرعا للشريعه الاسلاميه وجاري البحث في المسئله ومحاوله ايجاد فتاوى مشابهه
[youtube]https://www.youtube.com/watch?v=5oNja2IhXME[/youtube]
بيعمل كدا عشان بعد فترة يرفع قضية انكو امتنعتو عن دفع الايجار ويصبح من حقة طرد السكان
الحل تروح تعمل اثبات حالة انت والسكان
بخصوص الدور اللي انت ساكن في مخالف ملوش علاقة ((( انت مش صاحب البيت اصلا انتا مستأجر ملكش علاقة بالمخالفات القانونية للمنزل ))
الحل الافضل تجمعو بعض وتروحو تعملو اثبات حالة مع محامي
===========================
بعيداً عن المشكلة >>>>> موضوع ان الايجار 15 جنية وموضوع الايجار القديم بشكل عام شيء جدا مستفز ....ولو حطيت نفسك مكان صاحب العمارة كنت هتعمل اكتر من كدا
يعني علي كلامك الراجل عنده في العمارة 20 شقة بياخد من الشقة 15 جنية يعني 300 جنية في الشهر ....يعني ايجار 20 شقة = 300 جنية في الشهر ......
فليا رأي ومن حق حضرتك تقبله او لأ ...انك تكلم الناس اللي في العمارة وتحاولوا ترفعو الايجار يعني علي الاقل لو الايجارات في المنطقة للشقة 500 جنية مثلا يتخصم 40 % او 50 % وتدفعوا الباقي ...يعني كل شقة تدفع 300 جنية او 250 جنية((( علي الاقل الوضع يكون مقبول شوية ))
الايجار القديم ده اكبر ظلم لاصحاب العمارات و الايجار الجديد اكبر ظلم للمستاجر دوله مبتعرفش تعمل قانون مدروس صح ابدا يا كده يا كده مفيش وسط ولا عدل
جدى كان عنده عماره متأجره كلها قانون قديم و الشقه بتدفع 2 او 3 جنيه فالشهر (و السكان مش بتدفعهم اصلا) و لما توفاه الله العماره كانت الورث الأساسى و طبعا بقى زى قلته
و السكان كانوا عايزين 40 او 50 الف لكل شقه علشان يمشوا منها
هل فالشرع ان المستأجر يمنع صاحب الشقه او العماره من انه يتصرف فيها ؟!!! او ان المستأجر يشارك الورثه فالورث ؟؟!!! او ان المستأجر يورث ابنه الشقه الأيجار ؟؟!!!
حضرتك الـ 15 جنيه اللى بتدفعهم هيعملوا ايه لصاحب العماره ؟؟ و نفس الكلام اولاده من بعده ؟؟
و لو حضرتك مكان صاحب العماره كنت هتبقى راضى عن الأجار ده ؟؟
كان عندنا شقتين ايجار قديم فى بيتنا واحده 150 قرش والتانيه 7 جنيه .. والسكان كمان غير مريحين ..
ومكناش بناخدهم لعدم قيمتهم ومش لهدف طرد السكان ..
بقول لكل ساكن ايجار قديم : القانون معاك .. بس الشرع وعدل ربنا مش معاك !!
هتدفع الفرق يوم الحساب بس مش فلوس لان مش هايكون معاك وقتها فلوس ..
تخيل لما يكون بيت والدك فيه شقق بالايجار ده وانت رايح تسكن برة ايجار جديد !!
يعنى الساكن يورث وانته لاء ..
اتفقوا تعلوا الايجار عشان 15 جنيه مش هتجيب تمن البنزين الى هيجيبوا عشان ياخد الايجار
أخي الكريم صاحب السؤال
أولاً: يجب عليك تسبيق حسن النية فربما الرجل ملّ ولم يعد يهتم لا بالإيجار ولا بالبيت لسبب ما. لماذا لا تتصل به وتستفسر منه؟ ربما مريض، ربما مشغول، ربما لم يعد يكترث بالمبلغ التافه الذي يحصل عليه واستعوض الله في هذه الخسارة الجسيمة..
ثانياً: استعداءه برفع قضيه ضده من دون التواصل معه ومعرفة الأسباب خطأ كبير..
ثالثاً: ماذا تعني الـ 15 جنيه التي تدفعها له في الشهر؟ بالله عليك هل هذا عدل؟ أقل منطقة الآن في القاهرة إيجارها لا يقل عن 700 جنيه.. ابن عمي لديه شقة في عمارات صقر قريش المتهالكة بمدينة نصر يؤجرها بـ 1100 شهرياً.. وهذا مثال للمناطق الرخيصة فما بالك بالمناطق الجيدة..
رابعاً: راجع آراء الأخوة الذين سبقوني في التعليق في اقتراح رفع قيمة الإيجار. شوف متوسط سعر الإيجار في المنطقة وادفعوا له ولو نصف قيمة الإيجار. يعني لو 800 ادفعوا له 400، وهكذا..
أخيراً: نصيحتي لك عامله بود، وتواصل معه بأدب، لا داعي لاستعدائه. ضع نفسك مكانه ومكان أبنائه والتمس له العذر..
انا اعرف ناس أصحاب بيوت مش راضية تاخد الإيجار لانه قليل جدا" و كانوا منتظرين ان السكان يرفعوا الايجار من نفسهم و بيقولو كأنه زكاة عن مالنا
كلام كل الأعضاء جميل
بس عاوز أوضح نقطة ممكن تكون فائتة عنكم
أنا مش هتكلم عن الرأي الشرعي ولكن أنا هرد علي التحامل علي المستأجر
1- هو المالك لشقة متأجرة إيجار قديم لسه موصولش قيمتها حتى الأن عشان نقول إنه مظلوم؟
2- فيه ناس بالفعل بتدفع مبلغ كبير (خلو) عشان ياخدوا الشقة إيجار قديم بسعر رمزي والمالك كان راضي بكده وعارف إن الإيجار مش هيزيد..يعني فيه تراضي
3- هو المالك في أي عمارة بيصلح أي حاجة في العمارة بما إنها ملكه وبياخد إيجار عليها ..هل بيصلح ولا عمره صلح حاجة في حياته؟ أو بيعملها أي صيانة ؟ ولو حد من المستأجرين طلب منه أي صيانة هيعرف يوصله وهيرغمه إزاي إنه يصلح حاجة باظت ؟
رأيي إن لو فيه فتاوى إن العقد غير صحيح شرعا...يحصل تراضي بعد دراسة كل ما سبق مع مراعاة حالة المؤجر اللي ممكن يكون معاه ال 15 جنيه بالعافية في بعض المناطق فبلاش نعمم وإلا ناس كتير هتبات في الشارع
15 جنيه دا ميرضيش الكفرة ياراجل والله
والراجل مش عاوزهم
وبعد كدا تيجي حضرتك عاوز تجيبله البوليس وتجرجرة للمحاكم
وبعدين نلوم علي حال البلد عامل كدا ليه
يا جماعه كل واحد يتقي الله في حياته وبلاش ندور علي حجج زي مثلا انه وصله حق الشقة والكلام الفارغ دا
هو انت هتقاسمه في رزقه
كان عامله مشروع بالحلال والمفروض انه يكسب منه حتي لو هيكسب ميت مرة طالما بالحلال
أنا مش عارف الناس اللي بتبرر الموضوع بتبرره ازاي ....... الايجار 15 جنية وعاوزة يهز طوله وييجي ياخدهم منك ........ اتقوا الله
دور مخالف !!
هو عقدك بتاريخ سنة كام ؟
شكرا لجميع الردود
الاعضاء المحترمة الي بتقول اتقي ربنا ويرضيش كفرا والكلام ده قله صاحب البيت لما جينا اشترينا من الشقه ساعتها وخدنها طوب احمر واغلي من سعرها الحقيقي وبرده في وقتها الايجار كان اغلي وساعتها كان برداه وكان كسبان في الشقة مش خسران وكان عامل عقد مفتوح يعني زيها زي التمليك وبياخد ايجار وعارف ان في يوم الايجارات هتغلي وكان ممكن يملك لكن هوا قلك اخد خلو حلو وكمان ايجار وكل ده بمزاجه وبالقانون لبقي لما يتوفي ويجي والورثه والدنيا تغلي يقلك نغلي طب كنت قلت لابوك وهوا بيبع الشقه يعمل حساب يوم زي ده طب انا اقدر ازود الايجار مش هتفرق معايا. لكن تفرق مع واحد غلبان دخله مثلا الف مش هقلك اقلك يعمل ايه هيدفع منين هتبص تلاقي الغلابه الي دفع دم قلبهم زمان عشان يدفعو الخلو اترمو في الشارع ويقول الحكومة السبب والكلام ده
ياراجل يا طيب واحد عندنا قافل الشقه مسافر وبيرجع مره في السنه صاحب البيت متفق مع جار تاني عشان يبعلو الشقه اول ميخدها من الرجل
ناس كتير كلمت صاحب البت انه يملك الشقه رفض وقلك ديه شقتي عاايزة تسبها سيبها
وناس كلمته انه يديهم فلوس ويسبو الشقه رفض وقالك ديه شقتي
الايجار القديم لغز ملوش حل بجد لان صاحب الشقه معاك حق والمستاجر معاه حق
والقانون الجديد اعتقد انه بقا افضل مليون مره حاليا
ابناء الملاك ( ورثه الملاك ) بيردوا من وجهة نظرهم فقط ولكن لو كانوا هم المستأجرين كانوا طلعلوا ليك 1000 سبب
واولهم
ان صاحب العماره اللى بناها من 60 سنه بالارض كلفته 5000 الاف جنيه مثلا
وباع كله شقه ب 3000 مثلا
وطلع له مكسب معتبر يوازى المكاسب الحاليه كنسبه وتناسب
وطبعاً برضه قول فى اول 20 سنه كان الايجار برضه متناسب مع الايام الحاليه
يعنى جاب تمن العماره وكسب اد 1000 مره
وبعدين دلوقتى الوريث عاوز المستأجر يسيب الشقه ببلاش
هل تعتقد ان الوريث مش هيبيع الشقه ب 2 مليون لو فى الزمالك او المهندسين
يبقى لو الوريث قال للمستأجر هديك مليون ونص وابيع الشقه على 2 مليون واكسب نص مليون هيوافق
انما الوريث مستنى ان صاحب الشقه يسيبها ببلاش ويروح يقعد فى الشارع
كلام غير منطقى
مش عارف اقولك ايه
هقاسمه في رزقه هوا رزقه ان يااجر شقه وياخد خلو ويعملي عقد مفتوح ولما الايجار يغلي يطلعني من الشقة هوا ده رزقه امال ساعتها في وقتها طلب ايجار كان ساعتها غالي وخلو عالي ليه وعقد مفتوح ليه عشان وقت لما يطمع يطلعنا من الشقه
لو كلو واحد يتقي ربنا كان البلد لها ينصلح
يكسب منه لو كان ماجر ايجار جديد او. يعمل عقد بمده محدد
مش يعمل عقد مفتوح وياخد خلو
للاسف كل واحد هيرد من وجهة نظره هو
والملاك دلوقتي بقوا اصحاب ذمم وملايكة ماشية ع الارض
والمستاجرين معندوهمش ذمم لا وايه كمان كفرة
هو مش بيقولوا اللي بيني وبينك عقد
لو عربيتك بي ام وقلتلك هاخدها بخمسة جنيه وانت رضيت حد له عندي حاجة
زمان الواحد لما كان بيروح ياخد شقة ايجار قديم كان المالك بيبيع ويشتري في المستاجر وهاخد خلو رجل وهاخد ايجار كذا يعني كان موافق وهو بياجرها وفي كامل قواه العقلية ولما كان المستاجر بيرجوه يقلل الايجار او الخلو مكانش بيرضي ويقولك انت مترضاش ليا الخسارة
للاسف كل واحد بيتكلم من وجهة نظره ومادام فيه عقد يبقي اخبط راسك في الحيط
اعرف واحد زميلي عنده شقة وهيعزل
شقته في المنطقة دي لو هتتاجر قديم تاني في الوقت دا الايجار بتاعها هيبقي 500 بدل 100
وصاحب البيت هياخد خلو 50 الف
زميلي عاوز عشرين الف ويسيبها لصاحب البيت
صاحب البيت نفسه قاله هديك باقي مقدم الايجار بتاعك اللي هو تلاتة الاف
بالاضافة لخمسة تشطيب
زميلي قاله انت هتكسب لما تاجرها
قاله هاجرها ب 500
وهاخد خلو 50 او 60 الف
مين بقي اللي طماع
أبهي صور "التعسف في إستعمال الحق"
ردا على رقم 1 ....... انت هتشاركه في ملكه ؟؟؟؟؟ ياكش يكون لم تمنها 10 مرات !!!!!
بنفس المنطق
ما انت قبضت كتير ...... تقبض تاني ليه (صاحب الشركة اللي انت شغال فيها)
ما انت خدت فوايد كتير على وديعتك و لميت اصل الوديعة ...... تاخد اصل المبلع ليه (بنك انت مودع فيه)
الخ الخ الخ
أستاذ أحمد
الكلام دا بالتراضي..الناس بتقول إنه خسران وحرام وال 15 جنيه يعملوا إيه
الكلام غلط لأن المالك راضي وعمل عقد بكدا وكان شايف وقتها إنه كدا كسبان كويس في الحاضر وعلي المدي البعيد كمان..والمبالغ اللي أخدها وقتها أكيد إستثمرها في حاجة تانية او جاب بيها ما قيمتها وقتها
الأمثلة اللي حضرتك أوردتها غير كدا...قبضت كتير وأقبض تاني لأن بينا عقد بكدا إني أقبض طول مانا شغال...
نفس الكلام مع البنك..أنا موافقتش إن البنك ياخد أصل المبلغ ويديني فوائد مكانها..وهو ياخد الأصل
[quote=أحمد كمال;3875730069]ردا على رقم 1 ....... انت هتشاركه في ملكه ؟؟؟؟؟ ياكش يكون لم تمنها 10 مرات !!!!!
بنفس المنطق
ما انت قبضت كتير ...... تقبض تاني ليه (صاحب الشركة اللي انت شغال فيها)
ما انت خدت فوايد كتير على وديعتك و لميت اصل الوديعة ...... تاخد اصل المبلع ليه (بنك انت مودع فيه)
الخ الخ الخ[/quot]
هشاركة في ملكه والعقد الي معايا ده ايه ( العقد ايجار مفتوح لحد منا اسيب الشقه اوالبيت يقع ويمكن القانون يتغير)مش مكتوب في العقد ان بعد كام سنه يغلي الايجار او يطلعنا من البيت
اما صاحب الشغل انته متفق معاه علي مرتب محدد كل شهر مجبر يدهولك وذياده سنويه محدده تقدر تغصب علي الصاحب الشغل يضعفلك مرتبك هيقولك مش عجب سيبه
اما الفوايد انا حاتط مبلغ متفق عليه اني هاخد فوائد شهريه معينة تقدر تخليه يضاعفلك الفوائد طب هقولك انته عامل وديعه لمده عشره سنين بفائده عشره في الميه بعد خمس سنين من الوديعه البنوك عملت ودائع بعشرين في الميه تقدر تقوله زودلي
لازم تمشي علي العقد الي معاك انته مجبر كده
انا شايف ان لازم يبقى في حل بالتراضي
لان ساعة تحرير العقد كان الطرفين متراضين والمالك كان مبسوط اكتر من المستأجر كمان
انما لو تم فسخ العقد دلوقتي هايبقى المستأجر الخاسر الوحيد والمالك هايتحقق له المنفعة بدون اي خسائر
زي ماكنت المنفعة في البداية متبادلة يبقى برضه الخسارة متبادلة.. ولا ايه؟
ايه الي يخي العقد يتفسخ
المالك الوحيد دلوقتي هوا الي كسبان لو المستاجر خرج وانا قلتلك انا مثلا امكانياتي تسمح بانه يعلي الايجار غيري ميسمحشغيري بقي يعد في الشارع عشان صاحب البيت طمع وعايز علي الايجار
لو مدفعتش في المحكمة او العوايد عشان اامن نفسي وعملت حساب لصاحب البيت وانا عارف انه ممتنع عشان ياخد الشقه لومملتش كده هلاقي نفسي ي الشارع خصوصا ان امكانياتي متسمحش اجيب شقه لبقي عشان خاطر صاحب البيت ميجلوش محضر اترمي انا وعيالي في الشارع
هو دا يافندم اللي الناس بتقولة
يعني وقتها كان صاحب الملك مستفاد ....لكن اي حاجة بتزيد وسعرها بيزيد وكل عقود الايجار كانت كدا زمان ..ومستحيل كان صاحب شقة يتوقع ان سعر الايجار يوصل لكدا ....يعني تخيل حضرتك دلوقتي متأجر شقة ب1000 جنية وجيت انا اقلك اني متوقع ان بعد 50 سنة ايجار الشقة هيكون ب50 الف جنية في الشهر ....طبعا هتقول عليا مجنون
هقلك بالعكس ...هو لو متأجر الشقة دي من 20 سنة ب 15 جنية ...ودلوقتي سعرها 1000 جنية ....هيبقي الإيجار زاد 60 مرة تقريبا او اكتر !!! ...
لو حسبتها بنفس المنطق دا ...يبقي الشقة اللي ايجارها 1000 جنية دلوقتي هيبقي ايجارها بعد 20 سنة 60 الف جنية في الشهر ....
(((((((((( وطبعا دا مستحيل صاحب الشقة كان يتوقعوا او حتى المستأجر )))))))))))
يبقي افضل حل حتى شرعيا ....ان يحسب متوسط الايجارات في نفس المنطقة لو الايجار مثلا ب800 جنية يدفع ولو 300 جنية عن الشقة
يعني بدل ما صاحب العمارة يلم 300 جنية من 20 شقة ...يبقي علي الاقل بيلم 6000 جنية ...اهو حاجة تعتبر معقولة !!!
مشكلتنا يافندم اننا بنبص لغيرنا
فيها اية لما حضرتك تبدأ بنفسك وملكش دعوة بحد ...تروح لصاحب العمارة وتقولة والله انا هرفع الايجار بتاعي كذا عشان تكون انت راضي ومكنش ظلمتك وفي نفس الوقت عقد البيت معاك وتاخد ايصالات سداد
وملكش دعوة بقي بغيرك ..محدش هيتحاسب عن حد !!!