الله يبارك فيك يا باشا و بأذن الله بمجرد ما افضى و احجز و اخلص هاعملكوا التقرير
ايه اخبار العربية معاك يا باشا طمنا ؟
اطمن يا باشا العربية ماشاء الله ماشاء الله جميلة وناعمة و التكييف فريزر بمعنى الكلمة و غير مؤثر على السحب - الا فى المطالع لما يكون الطرق واقف - بس لما تدوس بنزين جامد شوية العربية بتستجيب فورا
انا بس مش بحب اضغط على الموتور حاليا لحد ما اعمل صيانة الـ 1000 بأذن الله بعد العيد
اكبر مميزات للعربية :
- ارتفاعها الرائع - تقريبا نفس ارتفاع الكارينز - غالبية العربيات التانية بتيجى جنبى بشوف التابلوه كامل و اللى قاعد فيها ( انا مش بحب كده - انا بس بقيس الارتفاع و بحاول اوصله بصورة مفهومة للى بيقرا
- استهلاك البنزين رائع - متوسط الاستهلاك فى الطوالى و الزحمة بالتكييف شغال على طول حوالى 300 كم فى الصفيحة و اتمنى انه يزيد بعد الصيانة لأن من المفروض ان تغيير زيت الفابريكه يؤدى لزيادة السحب و تقليل الاستهلاك تدريجيا لحد 5000 كم - مع تربيط العفشه كمان اعتقد انها هاتستريح عن الوضع الحالى .
- ثباتها ممتاز فى الملفات و على سرعة فى السفر و فراملها جميلة و حساسة
فيه تفاصيل تانى ممكن تلاقيها فى مشاركاتى السابقة بس حبيت اقولك على الاساسيات ...
الحقيقة انا تقييمى الشخصى للعربية دى بأمكانيات الامان اللى فيها من اير باجز و ايه بى أس و اى بى دى
يخللينى احمد ربنا انه وفقنى ليها حتى بعد ظهور المنافسين
حجزت الصيانة الاسبوع اللى جاى بأذن الله
على فكرة ردوا من اول مرة و ارقامهم : 01116699119 و 01116699110
و فى قمة الذوق و الاحترام و خلونى انقى بين المواعيد المناسبة - و لما قولتلهم كده العربية هاتكون عاملة حوالى 1500 كم علشان العيد والاجازات قالولى و لا يهمك و تحت امرك يا فندم و و سألت على بعض الاكسسوار و قطع الغيار قالولى كله متوفر بأذن الله هاعمله فى مركز شارع جوزيف تيتو اللى بيقولوا عليه الهايكستب لأنه قريب منى و هاستمر معاه لو كويسين و هابقى اعمل تقرير بيها ان شاء الله
ما شاء الله ربنا يباركلك فيها ويحفظهالك
المفروض مركز الصيانة اللى في جوزيف تيتو ده هاتنقل في طريق الاسماعيلية لما يخلصو الفرع اللى هناك .. ابقى إسأل عليه قدامهم قد إيه عقبال ما ينقلوله هناك .. وياترى هل هايكون العربيات السوزوكي الفان صيانتها مع باقي العربيات الملاكي برضه
لأن الفرع بتاع جوزيف تيتو حاليا زحمة جدا جدا بكل عملاء النيسان والسوزوكي مع بعض وزيادة عليهم كمان بتوع الميكروباص الفان بقى وأسلوبهم البغيض في التعامل سواء مع مهندسي الاستقبال أو حتى أثناء الانتظار مع بقية العملاء
السلام عليكم
انا كنت في التوكيل من حوالي 10 ايام
هما هناك لسة مش عارفين التوكيل الجديد اللي مصر الاسماعيلية ها يكون فين بالضبط
الهايكستب هايكون نيسان فقط
تقريبا الجديد هايكون سوزوكي فقط
انا كنت بقدم شكوي في الادارة بالكيلو 28 بخصوص عدم الرد علي التليفونات للحجز و قولتلهم ياريتني اشتريت من غبور لان فرعة علي مصر الاسماعيلية جنبي -- هما قالولي الكلام ده
شكلها غيرة
عموماً لما يغيروا من بعض ده فى مصلحة العميل اللى هو احنا :B4_564:
بس انا كان ليا تساؤل : انا عارف انهم بيستعملوا زيوت توتال
يا ترى حد عنده فكره نوع الزيت بتاع توتال الـ 10000 كيلو ايه الكود بتاعه علشان لاقيت كذا نوع و لما دخلت الموقع لأحسن زيت لمواتير
الـ K12B الـ 1200 جالى نوعين مش عارف موجودين عندنا و لا لأ :
Quartz 9000 Future 0W20
أو :
Quartz INEO MC3 5W30
حد يقدر يفيدنا ؟
عملت صيانة الالف فى الهايكستب ...
ملحوظة : خلوا بالكوا : ده رقم حجز الهايكستب 01116699110
انما 01116699119 ده رقم ابو رواش علشان محدش يقع فى المطب اللى انا وقعت فيه عشان حجزت فى التانى و ان عاوز اعمل الصيانة فى الاولانى - بس عدت و مأجلوش الميعاد.
المهم كانوا عاوزين يغيرولى زيت 5000 كم !! فسألتهم ده تخليقى و لا معدنى - قالولى تخليقى ؟؟؟!!
رحت واخد بعضى و رحت سألت فى مكان زى مخزن كده اللى بيطلعوا منه الحاجه و طلبت من الموظف يورينى عبوات ال 5000 و ال 10000 - وزى ما شكيت ال 5000 معدنى - رحت رجعتلهم و صممت على تغيير نوع الزيت فى امر الشغل الى زيت تخليقى 10000 كم - حاجة تييييييييييييييت !!
و هذا ما تم في الصيانة :
1- تغير زيت Quartz 9000 Energy 5W40 و حطوا 3.5 لتر مع تغيير الفلتر و سابولى الباقى فى الجركن فى العربية (علشان شددت عليهم جامد فى النقطة دى و بعد ما روحت و ركنت العربية قيست الزيت بعد حوالى ساعه لقيته عند الماكس )
2- تغيير فلتر الزيت
3- تشحييم مفصلات العربية
4- تربيط العفشة
5- ظبط مستوى زيت الفرامل لأنه كان زايد و بيسرب فشالو منه شوية
6- غسيل العربية
* كنت عملت ملاحظة ان الـ VAC بتاع الكاسيت مش شغال لكنهم ماعرفوش يعملوه علشان لسه السيرفيز مانيوال بتاعه لسه ماجالهمش ( على حسب كلامهم اللى مابلعتوش بس عديته !! )
* طلبت تركيب وحدة صوتية للانذار ( بقت ب 880 ج ) و اعتذروا بذوق وماركبهوش عشان ضغط الشغل اللى بعد العيد !!!
و انها عملية معقدة بتاخد لوحدها اربع ساعات ( تقولش بيركبوا قنبلة نووية !!!!)
عامة الموضوع اتكلف 400 جنيه و اربع ساعات مملة قدموا خلالها لكل عميل كوب شاى و حتة كيك !!
الواحد لو مش واخد باله هايزعل بعد كده - عموما قلة الامانه سائدة فى كل مكان ف بلدنا
وطبعا مايعرفوش حاجة عن المقر الجديد - كويس انهم عارفين اساميهم !
طلبت جدول الصيانات اللى بيوضح كل صيانة ايه اللى بيتم فيها و تمنها - مفيش يا فندم !
تقييمى ليهم 6 من 10 و اكون مكارمهم كمان.
اخر حاجة جبت مواصفات الزيت اللى حطوه للموتور و هى كالتالى :
QUARTZ 9000 ENERGY 5W40
API SN/CF; ACEA A3/B4
Increases engine life
Preserves maximum power
Provides longer drain intervals
Ensures excellent wear protection
MB-Approval 229.5
BMW LongLife 01
Porsche
Most European OEMs
مش عارف بأه هو كده كويس و مناسب و لا ايه علشان مالقتهوش فى الكتالوج - اللى فى الكتالوج 5W30
هو مكتوب عليه انه مصنع فى فرنسا و معبأ فى مصر
خالص تحياتى
حسيت بفرق بعد عمل الصيانة ؟؟؟
:Y_hi_3[1]: الله يبارك فى حضرتك و عقبالك
الاشارات : طبعا انت عارف ان العادى فى العربيات ان لما تيجى مثلا تدخل يمين بترفع الدراع لفوق و تفضل العربية تدى اشارة لحد ما انت تنزل الدراع او ينزل مكانه مع عدلة الدركسيون
لكن السويفت فيها العادى و فيها اختيار اضافى جميل و هو انك يادوب تلمس الدراع لفوق و بيترفع 2 مللى تقريبا و بيرجع تانى مكانه و ده بيدى عدد 3 مرات اشارة فى الاتجاه اللى انت عامله
حاجه شيك كده و توفير للازعاج و الكهرباء :)
و اى خدمة و تحت امرك فى اى وقت
آخر التطورات :
ركبت انذار فى التوكيل بـ 770 جنيه فقط لا غير شامل الانذار و التركيب و البرمجة على ريموت المفتاح الاصلى و ضرائب المبيعات ... و خد حوالى ساعتين بغسيل العربية :)
حاولت اخد العلبة علشان اعرف نوعه ايه و المواصفات و الذى منه ( اصل انا بحب الالكترونيكس )
بس مارضيوش !!!! و كل اللى عرفته منهم ان نوعه " كوبرا " و ان البورده بتاعته سيمنز المانى و انه بيتجمع فى كوريا
و فيه 3 درجات للضبط السينسور عملوه متوسط على 2 و شغال حلو و صوته كويس
اكتشفت حاجة حلوة برضه ان فلتر الزيت بتاع الموتور " suzuki made in japan " و انا كنت فاكره هندى
على كده سعره معقول 63 ج
العربية ما شاء الله بتجيب 120 كم/س بمنتهى السهوله و الاريحية و من غير اى احساس بشئ غير عادى - منتهى الثبات و النعومة - كأنى ماشى على 70 مثلاً
تحياتى :)
ربنا يكفيك شرها ويرزقك خيرها ومبروك الانذار هيا مش العربية فيها امبلوزير هتحتاج الانذار ف ايه ؟
ربنا يخليك يا باشا :Y_hi_3[1]:
الامبوليزر يحمى السيارة من سرقتها و الاستيلاء عليها بالكامل ( يعنى لا قدر الله صاحبها ينزل مايلاقيهاش :pirate14:)
انما الانذار لمنع سرقة محتويات السيارة اللى داخل الصالون او الادراج او الكاوتش و الجنوط او البطارية من الكبوت .... الخ أو واحد يسند أو يقعد عليها او يخبطها .. الخ من افعال المصريين باعتبار اى سيارة فى الشارع هى ملكية و مصطبة عامة !!! :049:
و احنا بناخد بالاسباب و الاعتماد اولاً و أخيرا على الله يحمينا من معدومى الضمير و خربى الذمم
تحياتى :affection:
ربنا يباركلك فيها ويكفيك شرها وموضوع حضرتك بجد شيق وياريت تواتينا بأي حاجه تحصل مع حضرتك
تحياتی
أنا قرءت المشاركات كلها والف مليون مبروك ، بس حضرتك ما وضحتش هى كام سي سي ؟
الف مبروك ع العربيه . احسن حاجه عجباني انهم مش باخلين ف وسائل الامان الباقي كله مش مشكله . لو كانوا زودوا الايمبولايزر كان تمام
سعرها معقول
استهلاك بنزين عالي جدا
عمليه جدا
نقطه بس عاوز استفسر فيها . حضرتك بتقول ال abs عامل شغل
اللي اعرفه انه بيشتغل ف حياتك كلها تلات او اربع مرات بس لما تدوس فرامل فجاه وبيساعد فقط فقط ف المناوره ومالوش اي علاقه بكفاءه الفرامل او قوه الفرامل . طالما انت بتشكر ف الفرامل يبقي نوعيه التيل كويسه
الله يبارك فيك يا باشا
1200 CC Twin Cam
+11111111111
وفراملها ممتازة ممكن تكون هى بالاضافة لثبات العربية الممتاز اللى مدينى احساس ان abs شغال على طول :biggrin2:
الف مبروك و ربنا يباركلك فيها و يكفيك شرها.
ممكن حضرتك تقولى هيا الافضل ولا الاتراج و تنصحنى بيها ولا لا انا معايه تمنها و عايز اجيبها بس متردد انا بعت بروتون برسونا بسبب استهلاك البنزين و قررت اجيب دى او الاتراج و كلام صاحب المعرض انها عفشتها وحشه و عربيه مش كويسه دا صح ولا علشان يقنعنى بالاتراج ..
و التسليم بعد اد ايه و جبتها منين ..
شكرا :)
الله يبارك فيك
و الله يا باشا انا قبل ما اشترى قارنت بينها و بين الاتراج و ركبت دى و دى و اخدت قرار و اتكلت على الله بشراء السوزوكى السويفت السيدان و الحمد لله
بالنسبة للعفشة هى لا توصف بكلمة " وحشة " !!
تصميم العربية و ارتفاعها مخللى العفشة قوية و ناشفة شوية بس بطريقة مقبولة
و ده مقابل مميزات هامة زى : الارتفاع الممتاز و اللى بيخليها ماتحكش فى اى مطب مهما كان عالى
و ميزة الثبات الممتاز على السرعات و فى الملفات
و استهلاكها الفعلى للبنزين الصفيحة بتعمل من 315 كم الى 350 كم مختلط طوالى و زحمة مدينة
و حسب طريقة و ظروف القيادة
فى السفر و الطوالى بتعمل اكتر من كده طبعا و ده كمان بمرور الوقت و بعد الـ 5000 كم بيبان بالظبط
و انا حجزتها مع التوكيل مباشرة و استلمتها بعد حوالى شهر
اى خدمة و بالتوفيق
طب الصاج بتاعها اخباره ايه خفيف زي الصني والاتراج ولا محمل وكويس والف مبروك على العربيه
الف الف الف مبـــروووك
ربنا يملهالك بركة يارب وتبقي خير عليك
حقيقي سامحني اني مختش بالي انك اشتريت عرفت متأخر
جت متأخرة لكني بردوا فرحت انك اشترتها
مبروك مرة تانية يا غالي ..
استفسار صغير وارجو الرد بسرعة
هل العربية دى تكفى ان يركب فيها خمسة افراد ولا تبقى مش مريحة
الصالون بتاعها زى الفيرنا مثلا ولا اوسع
اتمنى اشتريها
انا معجب بكل حاجة فيها بس اللى مخلينى متردد موضوع اتساع الصالون
شكرا مقدما
الف الف مبروك و ان شاء تتبسط بيها و ربنا يكفيك شر طريقها.
اللهم امين
يا أستاذ برنس أخبار السياره معاك ايه و حالتها بعد الصيانه الأولي يا ريت تكتب عن السيارة أكتر الله يكرمك
صالونها واسع و حلو بس خللى بالك هى كوباكت سيدان يعنى اربعة بيكونوا مسترحين جدا
انما موضوع خمسه ده مش عارف هايكونوا مستريحين و لا لأ - بس هى اوسع و اعلى من الفيرنا
ممكن على حسب اوزانهم و فى الحالة دى انت الوحيد اللى تقدر تقرر بتجربة ركوبها فى المعرض
الله يبارك فيك - اللهم آمين
الله يخليك يا باشا - لو حضرتك رجعت للمشاركات السابقة هاتلاقى انطباعاتى كل فترة من ساعة الشراء و بعد صيانة الالف الاولى
و الحمد لله عربية جميلة من كل النواحى و لم يتغير رأى فيها بمرور الوقت بل يزيد اعجابى بيها لزيادة التحميل و الوزن عليها مع استعمال التكييف دائماً و هى تتجاوب دائماً بصورة مرضية لى تماماً
و أحمد الله على توفيقى اليها
الحمد لله استلمت عربيتى و دى اول عربيه ليا و انطباعتى الاولى عنها اقتصاديه فى الوقود و الترخيص ان شاء الله و عاليه عن الارض و سواقتها سهله و حجمها مناسب جدا و مريحه فى السفر
السلام عليكم
ايه اخبار استهلاك البنزين لسه زى مهو ولا ايه الاخبار؟
ممكن نعرف اسعار قطع الغيار؟وشكرا
سؤال مهم جدا بالنسبه ليا :::::
هيا الكنبه الخلفيه بتنطوى foldable زى الهاتشباك؟؟؟!!
رخصت امبارح فى مرور المنصوره اتكلفت ترخيص 3 سنين 1100 جنيه و دى اول مره اتعامل مع المرور اول حاجه اشتريت ملف ب 51 جنيه و بعدين روحت الفحص و رفعوا البصمه لرقم الشاسيه و الموتور و شنطه الاسعافات و ورق الطفايه خلصته واحد سمسار اخد 40 جنيه و ادانى لوحتين معدن وقاللى روح على المرور هتلاقى ورق الطفايه هناك و دى كانت غلطه لان الطفايه مهمه و امان و كمان لما روحت المرور ورق الطفايه ما جاش على طول اتاخر اكتر من ساعتين او 3 ساعات طبعا كنت متغاظ جدا و رجعت عند الفحص ما لاقيتش حد قلت يبقى بكره و لكن رجعت المرور لاقيته لسه واصل طلعت عند ترخيص الملاكى الجديد زحمه جدا و انا مش عارف الاجراءات قابلنى سمسار خد الورق و قدمه و مشورنى شويه اطبع النمر بس لازم تاخد بالك من السماسره بينجزوا مع واحد اول مره بس طماعين لو طال ياخد كل اللى فى جيبك ها يخده كانك بتطبع الفلوس المهم دفعت الضريبه 3 سنين 605 جنيه و كنت عامل تامين اجبارى 3 سنين ب 275 جنيه و شنطه الاسعافات ب 70 جنيه و دخان 100 جنيه على كذا مره 20 فى 30 ؛؛؛
والحمد لله اخدت الرخصه فى نفس اليوم و طلعت بره و قابلونى الاولاد اللى بيقصوا اللوح الصاج و الخطاط االلى هيكتبه و ركبت النمر اتكلفت حوالى 25 جنيه النمرتين و اخيرا خلصت و ما حدش بيتعلم ببلاش
بس سؤال يابرنس ازاى اضبط ساعه العربيه و الصيانه العاديه زى تنضيف فلتر الهوا و ازاى اشيك على ميه الرادياتير و هل ينفع بعدين يتزود ميه من الحنفيه ولا لازم ميه خضرا انا مشيت بالعربيه لغايت دلوقتى اكتر مت 220 كيلو جو المدينه و خارج المدينه و زرار الرحلات بيدينى متوسط 14.7 كيلوا فى اللتر هل دا كويس لعربيه لسه فى التليين و ايه اللى اخد باللى من قبل ما اروح اعمل صيانه الالف كيلوا