السلام عليكم يا اعضاء نايل موتورز الكرام
هطول عليكم شوية بس اتمنى ان الموضوع يفيد اي حد مقدم على الشراء .
انا تقريبا عضو معاكم من سنين بس كنت في الغالب مجرد متابع للتقييمات و اخبار السوق عشان لو ربنا كرمني و نويت اشتري .
و اخيرا جه وقت الاختيار و كان فعلا القرار صعب بكل بساطة كنت بحاول ادور على عربية اوتو و فيها مواصفات الامان و احس انها تستاهل سعرها .
البداية كنت ميال لل بيجو 301 او بروتون بيرسونا بس لقيت في شبه اجماع ان بيجو مكنتش القنبلة المنتظرة و البيرسونا للاسف التوكيل مهمل جدا و ممكن اركن العربية على قطعة غيار.
بعدها فكرة في حاجة تكون منتشرة وبصيت على الاكسنت و الريو و الريو تفوقت في المجمل و لقيت عشان اركبها بمواصفات امان يبقى محتاج 142 الف و بصراحة استكترتهم على عربية من سنتين كانت اوبشن اكتر ب 117 الف بس للاسف انت في مصر وسعر الدولار ضرب ....
وبكل بساطة 142 من 155 مش فارقة هو الواحد هيشتري كل يوم ... و دخل في الاختيار الكروز و الشارك و الفلوانس اول فئة و السيراتو الخليجي ....
و الدنيا بدات توسع و تعك وهنا كان لازمة وقفة صريحة و تحديد الاولويات ولقيت في كام سؤال عايزين اجابة واضحة .

كلنا بنقول العربية وثباتها و عزمها و الامان .... و بما اني كنت بسوق من اكتر من 13 سنة كان السؤال الفعلي انا امتى جريت بالعربية ... فين الطريق اللي تجري فيه فعلا وتكون محتاج وحش تعتمد عليه تحت رجلك... للاسف مفيش في بلد المليون مطب والحفر و المفاجئات...
يبقى نفكر بعملية شوية و خصوصا ان البنزين غلي و هيغلى تاني لبقى انا محتاج عربية مدينة متورها اقتصادي ومن الاخر تقضي الغرض وكان وقت ظهور السويفت و الاتراج في السوق
نزلت اتفرجت على العربتين على الطبيعة ودخلت عدد مهول من المواقع الاجنبية المتخصصة في الرفيوهات و الكل بيشكر جدا في العربيتين كعربية مدينة وعلى ارض الواقع السويفت عجبتني اكتر كخامات و شكل خارجي هو موضوع ازواق وكنت قلقان من الاتراج بسبب انها 3 سلندر ونزلت اشتري لقيت حجز 7 شهور او اوفر برايس من 9 ل 11 الف جنيه لو فوري . يعني العربية فقدت اهم ميزة وهي السعر اللي ب 99 الف .
قلت اعصر لمونة و اشوف الاتراج تاني وبدات ارتاح للعربية بس من اراء الاعضاء في المنتدى كنت قافل منها جدا .... قلت لازم اجرب بنفسي و فعلا رحت عملت تست دريف عند معرض و بمعنى الكلمة اندهشت .. استحالة ده يكون سحب عربية 1200 و 3 سليندر استجابة الموتور ممتازة والسحب جيد جدا مقارنة ب عربيتين سوقتهم كتير .. اللانوس 1500 و الريو 1400
قلت اكيد بطة بلدي مع التكييف جربت التكيف وشبه لايوجد تاثير على السحب واقتنعت بالعربية 100%
وجه وقت الشراء 103 وتستغنى عن كماليات ولا 113 الف اعلى فئة و بالصدفة شفت موضوع لزميل على المنتدى جاب الخليجي ب 105 وفرقها عن الهاي لاين وكيل فوجات و جنوط ..
وجه تاني نداء العقل فرق 8 الاف جنيه في مقابل الحاجتين دول و ضمان دياموند .. و من دياموند للرواس من تجارب الاعضاء مفيش فرق والجنط مجرد شكل جمالي كده كده مش هجري و مش هيفرق .. بالعكس الجنط الحديد عملي اكتر في مصر لان شدة تحملة وامكانية كسره اصعب بكتيييير من الجنوك السبور الالومنيوم وتوكلت على الله وجبت الخليجي .
العربية ممشتش بيها غير 600 كيلو لحد دلوقتي و كل مرة بركبها بيزيد حبي ليها و اقتناعي بيها ولو فكرت تاني هرجع اشتريها .
العربية كتحكم ممتازة جدا خصوص لصغر قطر دورانها وده تساعدك جدا في الركن و المناورات الجميلة في بلدنا و استهلاك البنوين مع التكييف فعلا اكتر من رائع في الزحمة ومع سواقة تقريبا 60 كيلو بين وسط البلد و كوبري اكتوبر والمحور كان المعدل على الكمبيوتر من 5.5 ل 6 لتر لكل 100 كيلو يعني مع التكييف و الزحمة الصفيحة تعمل من 334 الى364 كيلو وده لسة في التليين واعتقد هيتحيس بعد صيانة الالف .. والمفاجئة الاكبر كانت بليل على الدائري من غير تكييف و الطريق فاضي ومتوسط سرعة من 80-100 عشان التليين والاستهلاك على كمبيوتر الرحلات كان من 4 الى 4.4 لتر لكل 100 كيلو .. يعني تعمل في الصفيحة من 454 الى 500 كيلو بس كل الاقام السابقه مع سواقة هادية ومريح الماتور في النقلات عشان التليين .
بالنسبة للثبات مزودتش عن 130 ومشيت على السرعة مده بسيطة للتجربة فقط لا غير مستني اكمل الالف كيلو الاول و العربية كانت راسية و مش قلقان منها خالص .
ده انطباعي عن العربية بكل امانة و حيادية وهي في نظري صفقة رابحة جدا و انصح اي حد متردد او خايف يجرب يسوقها و مش هيتردد بعدها و هيشتري علطول خصوصا ان البنزين هيغلى تاني واعتقد قطع الغيار هتكون ارخص من الفئات السعرية الاعلى..
ولو حد حابب يسال عن اي حاجة ان شاء الله هرد عليكم و هتابع معاكم عن اي جديد في العربية و خصوصا بعد صيانة الالف .