أنا ببيع عربيتي علشان مسافر لو حد هنا عاوزها ولو ممكن مساعدة في تسعيرها

**AshTurbo** · 08-09-2014 01:01 AM

السلام عليكم ورحمة الله وبركاته .. تحية طيبة مباركة لجميع نجوم هيونداي خاصة وباقي أعضاء المنتدى عامة يارب تكونوا في أفضل حال ..

أنا قبل ما أعمل أعلان في أي حتة قولت أجيلكم أفكر معاكم الأول في موضوع البيع أنا عربيتي ألنترا 2012 أوتوماتيك Dual AB - Abs الفئة اللي ب حاجة مائة وستين دلوقتي عاوز أعرف هتعمل كام لو بيعتها هي فيها شوية كماليات مركبهم كلها كماليات أصلية كنت أشتريتها من السعودية آخر سفرية عبارة عن :

ليد أمامي Angel eyes - ليد خلفي BMW - مشتت هواء خلفي Rear Diffuser - فرش جلد أصلي ألماني - Sun&Rain Visor - ال Roof Spoiler - ال Rear spoiler .

الكماليات دي عملت حوالي 14 ألف جنيه لأن كلها أصلي يا كوري يا تايواني بس طبعاً حاجة محترمة جداً .

قبل أي حاجة لو حد من المنتدى هنا عاوزها يقول أنا لسة معملتش أعلان في قسم الأعلانات ولا على أي موقع وجيت أقولكم هنا لأن أنتم أولى بحالتها دي علشان العربية ماشية 36 ألف كيلو وكل صيانتها في التوكيل مفيش حاجة برة التوكيل كل اللي في العربية كانت حكة من الباب اليمين والرفرف اليمين وأنا طالع من الجراج واحد محترم كان مركب خازوق في الأرض جديد من غير مايحذر الناس وده أتصلح في الحرفيين عند أنظف سمكري هناك وأترش بأنضف بوية وأخدت معاه الأكصدام الأمامي رش علشان كان فيه خرابيش وخبطة خفيفة وأنا بركن في الجراج بتاعنا فقولت بالمرة أخدوا نظافة يعني من الآخر زي شغل التوكيل بس الفرق أني كنت هتشمط فالتوكيل عالفاضي ....

الطلب التاني لأصحاب الخبرة فالتسعير متكرمين تساعدوني في تسعيرها قبل ما أعمل أي أعلان ولكم جزيل الشكر وأي أستفسار أنا جاهز

وبيني وبينكم أنا زعلان عشان هبيع عربيتي حبيبتي اللي عمرها مازعلتني ولا كسفتني ولا بهدلتني

بس طبعاً مش حابب أسيبها مركونة فترة طويلة وطبعاً طبعاً ربنا يبارك لصاحبها الجديد ويتمتع بيها ويجعلها وش السعد عليه .

آخر طلب محدش يقولي عاوز صور هنا بجد أنا بعتذر ولا أنا معقد ولا أنا غريب الأطوار بس أنا شيرت صورة واحدة من وراء وأخدت الحكة دي امال لما أصورها كلها هيحصل أيه وربنا يحفظكم جميعاً هو بس أستثناء للأعضاء المعروفين هنا ممكن أبعتلهم الصور برايفت لو يحبوا يشوفوها .

**omar tarek 456** · 08-09-2014 02:10 AM

135 الف

**crazy car** · 08-09-2014 09:21 AM

تسعيرها 148

**A_A_ELAZIZ** · 08-09-2014 10:03 AM

هتعمل من 140 ل 145 واانت وشطرتك لو عرفت تيجبلها سعر اعلى من كده

**drcobra** · 08-09-2014 11:29 AM

موفق ان شاء الله

**2CODE** · 08-09-2014 01:14 PM

يعني نقول 140 الف وده التعديلات غير كده الالنترا كنت بشوف واحده مع صاحبي بـ121 اوتوماتيك بس مش عارف فئاتها فمش عارف كانت ايه اللي بنتفرج عليها

ومبرووووك عليك هروبك من بلاد الجحيم :)

**AshTurbo** · 09-09-2014 10:18 PM

متشكر جداً لكل الردود ... العربية معاها الفوانيس الأمامية والخلفية الأصلية للعربية بحالتهم الأصلية أنا شيلتهم وحطيتهم في كرتونة الفوانيس الليد زي ماهم ... بالنسبة للأسعار أنا هأعمل أعلان على 150 لأن العربية بحالتها والأضافات كمان كانت مكلفة لأن كلها أصلي وكمان معاها الفوانيس الأصلي بتاعتها وطول الوقت مركونة في الجراج وتقريباً مبركنهاش بره غير في باركينج حتى بخاف أسيبها فالشارع فمش متهانة ومتشكر جداً لرأيكم .

**AshTurbo** · 09-09-2014 10:23 PM

المشاركة الأصلية كتبت بواسطة 2code

يعني نقول 140 الف وده التعديلات غير كده الالنترا كنت بشوف واحده مع صاحبي بـ121 اوتوماتيك بس مش عارف فئاتها فمش عارف كانت ايه اللي بنتفرج عليها

ومبرووووك عليك هروبك من بلاد الجحيم :)

متشكر لردك أولاً بس نفس الفئة تمنها جديدة 164 في التوكيل سعر رسمي يعني بالتعديلات داخلة في حوالي 178 يعني على السعر ده هايكون سعرها نزل 38 ألف ودة كتير طبعاً مش هأبيعها بالسعر ده .