الموضوع: للاهميه مشكله فى سكودا a7 موديل 2014

من الواضح ان في ناس كتير للأسف مجربتش العربية ونازلة فيها نقد بدون معلومات
اكتر ناس مبسوطة من العربية الملاك. والكل علي المنتدي مقتنع بها كقيمة امام سعرها
تيجي بقي ناس تقول تكنولوجيا قديمة وأسكودا بتتاخر وكلام غريب
كل اللي اشتري العربية وانا اولهم كان قدامة ال١٤٠٠ وفضل يشتري ال ١٦٠٠ والفتيس القديم المتجرب في الفنتازيا
يبقي اية المشكلة

ثبات لا يليق بسعرها ، سوقتها يا معلم ؟ ولا معاكو من ضمن اسطول العربيات الی عنكوا ماشاء الله ربنا يزيد و يبارك ؟؟؟ و انا عن نفسی ادفع ربع مليون فی عربيه فخمه واسعه ثابته اعتماديه اخری اجيب بيها 190 مش 260 ؟؟؟؟؟؟؟؟؟؟؟؟؟؟!؟!؟!!!!!!!!!! حضرتك الفيرنا لما تعدی ال 120 بتعتبر نعش طاير بلاش تقول تحط و متحطش ، تعالی عل الصحراوی و نشوف سحب بقی و مش سحب و ثبات متقوليش انا مجبتش سيره الثبات هات العربيه و نتفق علی نقطه بدايه و نهايه بس متجيش تقولی معلش اصل العربيات كتير و معرفتش اجيب ال 260 او كان الطريق ملفات فا حبيت اهدی اجيب ال 50 لحسن النعش يطير منی ، ما هو انت قلت فيرنا فا متقلش فيرنا و تقولی سحب وتجری طب و بعد السحب هجيبك فی ملف قد كده او هسقط غيار او او .
بلاش كلام علی العربيه بدون تجربه
و طرق مصر غير ممهده لی انك تجيب عليها اكتر من 200 اصلا

- أيوة ثبات لايليق بسعرها ثباتها بيقارن بالعربيات إللي تحتها إللي بنفس عفشتها زي السيراتو والكورلا وليس بمثيلاتها سعريا زي الإنسجنيا وال ٥٠٨ والفنتازيا طبعا الله يرحمها. وبالنسبة للتجربة فأنا مجربتهاش بس جربت الليون الجديدة ولو قولتلي إن ثبات الليون الجديدة يختلف بأي شكل عن ثبات الأوكتافيا a7 يبقى خبرتك قليلة في العربيات لإنهم نفس الشاسيه والوزن متقارب جدا ، التورشن بيم بيخلي العربية مش مكلبشة في الأرض زي الملتي وبيخليه خفيفة و بتتنطط من ورا مع السرعات العالية ده غير إن الهوا بيأثر فيها بشكل ملحوظ وممكن تكون بتاخد غرز حدتها قريبة الملتي لكن العربية بتميل بشكل قوي والفرامل الفجائية على سرعات عالية بتخلي العربية تعوم بشكل بسيط بعكس الملتي لو دوست الفرامل كلها على سرعة ٢٠٠ حتلاقي العربية طوبة كبتتحركش من مكانها والحاجات إللي أنا ذكرتها مجتمعة بخصوص العفشة التورشن بالتأكيد بتقلق من إحساسك بفخامة العربية
وإيه أسطول عربيات دي ، أيوه عندنا أسطول حضرتك دافعلنا حاجة منهم !!
وللمرة المليون كلامي بيتحور بخصوص الفيرنا أنا مقارنتش بينهم في الثبات ، أنا بدي مثل مجازي إن مينفعش عربية ب ٨٠ ألف يبقى متورها بنفس قوة عربية ب ٢٦٠ ألف
الفرق بيني وبينك إن كلامي كله عن تجربة ، أنا سقت العفشتين بديني وكلامك إنت إللي أجذم إنه عن غير تجربة يبقى مين فينا إللي بيتكلم في الهوا

انا مردتش ارد على حضرتك فى اولةتعليق لحضرتك بسةالمرة هرد
ياباشا هو حرام على الاوكتافيا ١١٠ حصان
وحلال على الاسترا والفلوينس والمازدا الجديده

وبمناسبه السعر كل واحد عارف بيدفع فلوسوا فى ايه وبناقص تكنولوجيا ال tsi طالما هروح اصلح فى عربيه كل شويه
بقى هو دا العقل والحكمه انى ادفع ربع مليون واروح اصلح فى فتيس ونشيل العربيه على ونش ياراجل حرام عليك
كان ممكن اجيب تربوو. بس مش هستخدم ربع قوتوا ياريت متحجرش عالناس الى دافعه فلوس فى العربيه وتكرهم فيها كل واحد واحتياجوا
تحياتي واعذرني ياباشا لو في حدة في كلامي

أنا بعتذر لو كان كلامي دايق حضرتك بأي شكل من الأشكال
أنا إللي مزعلني إن العربيات الفولكس الdsg إللي في مصر مغرقة السوق بجميع أنواعها والفتيس مأثرش في مبيعاتها بشكل قوي فا ليه في الأوكتافيا الناس متأزمة بشكل رهيب كده من ال dsg
فولكس أكيد سهرانة ليل نهار في حل لمشكلة الفتيس وأكيد حتتحل مسألة وقت ليس إلا

المشاركة الأصلية كتبت بواسطة corolladestroyer

ما شاء الله على الاسلوب الراقي في الرد حاجه تفرح بص يا باشا شاهين بنز انا على معرفه خاصه بيه وكلام حضرتك اسطول ومش اسطول حاجه منتهى الاستفزاز الراجل بسم الله ما شاء الله مرتاح وعندهم فنتازيا و(الليون الجديده استلمتها معاه) شخصيا ومعاهم لانسر بومه والصني الجديده وشاهين....ده مبدايا....
ثانيا الراجل كلامه واضح جدااا سحب تعبان وثبات لايرتقي لل ربع مليون جنيه بدليل ان الفنتازيا ب 172 الف ولو حسبتها باسعار دلوقت سعرها 200 الف واثبت من الاوكتافيا الجديده اللي هيا هيا الليون الجديده ك شاسيه و setup عفشه وكل حاجه ف السياره متجربه ومتجربه كويس اوي كمان....
ثالثا الموتور ال TSI لا يقارن نهائيا نهائيا ب ال 1600...
1.4 tsi 0-100. 8.5 sec
1.6 0-100. 12.5
يعني لو استخدمنا الرياضيات كده
اكنك بتقارن الموتور ال TSI بعربيه بيتجيب ال 100 في 5.7 sec يعني ولا حتى الاوكتافيا ال rs ..
ده كلام برضو...

مصطفى إن نسيت تذكر حاجة مهمة بخصوص المقارنة بين المتورين وهي إنه غير تسارع العربيتين من ٠-١٠٠ إن العزم الأقصى بتاع ال tsi بيطلع على rpm قليل جد ،ا ال tsi عشان يجيب تسارع زي ال ١٦٠٠ مش محتاج يعلي ال rpm عن ٢.٥ في جميع الغيارات
والراجل ياجماعة عربيته dsg و داخل عال ٣٠ ألف كم من غير مشاكل تذكر في الفتيس ( ماشاء الله) فا في فتيسات منها بتعمر مش شرط إن العربيات ال dsg كلها فتيسها بيضرب كل يوم

المشاركة الأصلية كتبت بواسطة moratoz

والله يا جماعه لو هدينا شويه وقرأنا المشاركات أكثر من مرة قبل الرد ممكن نفهم القصد من الكلام دون الدخول في مواضيع شخصيه ودون الأنفعال الوقتي
يعني الأشتاذ شاهين بنز مالك لأوكتافيا فانتازيا وحته الثبات دي هوا مجربها كويس لأن فعلا الفنتازيا كانت اسطورة في الثبات فأحيانا كتير لما التكنولوجيا تتقدم بيبقي الواحد فعلا وهوا دافع الفلوس بيبقي عاوز الفوس دي تكون في يعني ايه المشكله برده
يعني لم يتم تغير الموتور والفتيس وقولنا بنشتري شكل جديد لسمعه الفنتازيا السابقة ولكن كان قدام دا لازم علي الأقل تفضل بالعفشة المالتي لينك بتاعتها يعني ما يبقاش كمان العربيه قلت عن السابقة كفايه فرق الأوبشن ئل مش موجود بينها وبين الفنتازيا الفئه القانية زي مرايات التعتيم والكشافات الزينون المتحركة والتكيف التاش ثنائي الجوانب - بصراحه حاجة تزعل قوي .
اما بخصوص الفيرنا انها تحط علي الأوكتافيا فدا شيئ معروق ومفروغ منه انها فعلا تعديها وئل بيعمل كدة صدقوني ما بيبقاش همه حته الثبات دي ناس مجنونه سرعه بجد وهي دي متعتها ( من المتعه ما قتل )

وانا عن نفسي حاجز الa7 وربنا يسهل ونستلم قريب بس بالدفة ركبتها امس مع زميلي في العمل بصراحه عفشه مش متوقعه نهائي حتي مع قرأتي لمواضيع النشوفيه والهبد الخلفي بس مكنتش متوقع انها كدة حسيت اني مش مبسوط ومبقتش منبهر حتي بالشكل
والله العظيم قمت نازل بالليل واقعدت اتفرج علي الفلوانس والسيراتو وال508 تاني ومش عارف أعمل ايه ( انصحوني بقي )

وكمان بالأشارة لكلام الأستاذ aziaro نقول بردة حاجة صغيرة احنا لما بنتكلم عن عربيه احنا بنتكلم علي مجملها وعلي الأستخدام الطبيعي والعادي بيها يعني من وجهه نظري انه مش الطبيعي اني أقول انها مش بتجيب 210 و220 والكلام دا وأبقي مضايق اقوي لأن دا ما بيحصلش انا ركبت من غير اسماء عربيات كتير ولم اتعدي بأي منهم أكثر من 180 وكان علي سبيل التجربه فقط وشعور السرعه والأمر لم يتجاوز ال 5 دقائق طبعا في ناس بتحب تجيب اكبر من كدة وتقفل العدادات بس عددهم اد ايه من ملاك أي نوع عربيه فطبعا الأفضل ليهم البحث عن بديل أخر يوفر لهم احتياجاتهم

في الأخر الموضوع احتياجات واقتناع ودمغنا كلنا مش زي بعضها
تحياتي للجميع وبرجاء التكرم بمحاوله المحافظه علي صداقاتنا داخل المنتدي

انا عايز الاول احيي حضرتك على اسلوبك الراقي و انك اخدت الكلام بموضوعيه مش من منطلق الدفاع و الهجوم .
و ثانياً انا برضه في موقف حضرتك بالظبط من ال a7 و بعد تفكير قررت اني اصرف نظر عنها و اتجه لاحد حلين اما اني اشتري فانتازيا موديل 2013 بحالة الزيرو تعمل حوالي 170 او 175 الف و اوفر اربعين الف جنيه بدون تضحيات تذكر و لما ابيعها بعد 4 سنين مثلاً هاخسر اقل من اللي بيخسره اللي اشترى زيرو عموماً ده غير ان قطع غيارها ، و الفوانيس و المرايات الجانبيه و خلافه في حالة الخبطات الخفيفه لا قدر الله هتكون ارخص نسبيا و متوافره بره التوكيل جديد او استيراد لان الموديل بقاله فتره . و ممكن كمان اجيبها الفئه التانيه او الهاي لاين و استفيد بالكماليات الزياده .
او اني اجيب بيجو 508 موديل 2013 برضه و دي بتعمل تقريباً 210 الف (بيز لاين ) او موديل 2014 بحوالي 220 الف بحالة الزيرو . اللي هو نفس سعر ال a7 الزيرو تقريبا بس في عربية افضل بكتير . و متفكرش ان سعر اعادة البيع في البيجو ضعيف لانك شاريها مستعمله و بالتالي اللي باعها لك هو اللي تحمل هذه الخساره ده غير انها مش واقعه في السعر جامد حتى في موديلات 2012 لانها فعلا عربيه مميزه .
**** لو حضرتك مصمم تشتري زيرو مش هتلاقي حاجه ب 214 الف افضل من ال a7 بسهوله . و بالتالي اما انك توفر فلوس و تتجه للفلوانس او التويوتا مع الاعتراف بانهم اقل من ال a7 او تزود فلوس و تتجه للبيجو 508 زيرو . ده رأيي . الانسجينا لم تختبر كفايه زي ال 508 و الاوبل عموما مفاجأتها كتير و توكيلها سئ بعكس توكيل البيجو اللي حاليا بيتقال انه من افضل التوكيلات فى مصر و سعر قطع الغيار عنده منطقي جدا بالنسبه لتمن العربيه .