حد بيمشى فى الشقه

**هيثم مجدي** · 10-09-2014 12:04 PM

كل شئ وارد
بس موضوع (القرآن شغال) دا محتاج اعادة نظر
القرآن للقراءة والتدبر في معانية, مش شغال عشان بركه و خلاص :)
ويفضل ان سورة البقرأة (تقرأ) كاملة
قال رسول الله صلى الله عليه وسلم : لا تجعلوا بيوتكم مقابر، إن الشيطان ينفر من البيت الذي تقرأ فيه سورة البقرة

**a7medsh3rawi** · 10-09-2014 12:11 PM

ما فيش عفريت ولا حاجه .. وخصوصا ان الساعه 2 بيكون عقل الانسان فى اضعف حالاته
فى دراسه علميه بتقول ان عقل الانسان ما بين الساعه 1 للساعه 3
بيكون فى حالة خمول لانه بيبدأ يستعد لليوم التالى
والانسان فى الفتره لازم ينام او على الاقل يكون مسترخى
الرابط دا فى معلومات مهمه
الاعجاز الطبى فى الساعه البيولوجيه للانسان

**غزلة** · 10-09-2014 02:02 PM

من غير راس. تبقى اكيد من داعش

**Fo1Fo** · 10-09-2014 02:03 PM

انا لوشفت حاجه زى كده مش ها أقول لولادى . يظهر ان الحاج قصده يطفشكم .

**Abo_Mazen** · 10-09-2014 02:53 PM

المشاركة الأصلية كتبت بواسطة fo1fo

انا لوشفت حاجه زى كده مش ها أقول لولادى . يظهر ان الحاج قصده يطفشكم .

ههههه...الله يحظك يا شيخ..فعلا يظهر إن الحاج مش عايز حد معاه في البيت

بس في موقف حصل مع جدي الله يرحمه والروايه من عمتي الله يرحمها..جدي صعيدي وشيخ بلد ..ومن الصعايده اللي ما يناموش غير والسلاح متعلق فوق دماغهم أو في حضنهم..وكان حاطط سرير أوضته في مكان بحيث إنه وهو حاطط راسه على المخده ..لازم يكون كاشف صحن الدار كله..وفي مره كان جدي نايم وبعدين قلق بليل وعينيه فتحت بس ما شالش دماغه من على المخده ..على كلام جدي إنه شاف في صحن الدار حرمه قاعده على اﻷرض لبسه فستان فضي لامع وبتسرح في شعرها الطويل..جدي إستغرب وفكرها بنت من بناته..قام إتعدل في قعدته..ونده بصوت عالى ..مين بره ..لكن مفيش رد ..نده تاني ..مين بره ..محدش رد ..قام جدي ساحب البندقه اللي كانت متعلقه فوقيه وطلع بنفسه في صحن الدار يشوف مين الحرمه دي وجات منين ..بيقول طلعت في صحن الدار..لقيت معزه قاعده بتهز دماغها وعماله تتشدق..أتاري بقى ضوء القمر اللي داخل من فتحه في سقف البيت ضارب على المعزه مع شعر المعزه الطويل باﻹضافه إنه كان لسه صاحي وعيننيه مش مركزه ..كل ده إتبرمج في دماغه إن فيه حرمه قاعده بره وبتسرح شعرها..كل ده ..وجدتي نايمه جانبه ولا هي هنا ..

ممكن المخ يبرمج حاجات بناء على أحداث محيطه بالشخص..زي اللي بسمع صوت أبوه بعد أبوه ما مات من كتر تعلقه بأبوه..أو بيسمع صوت بكاء أمه لما يكون مزعلها وضميره مأنبه

**yuong313** · 10-09-2014 03:14 PM

علي فكرة قصص الجن والعفاريت حقيقة حقيقة حقيقة وحصلت كتير لناس اعرفهم وحياتهم صعبة جدا
الموضوع مش مضحك بالعكس تماما ربنا يصبركم

**amz2011** · 10-09-2014 04:16 PM

الناس بتهرج و بتضحك بس فعلا لو حصل لحد فيكو الى انا بقوله مش هيعرف ينام
و العضو اللى داخل يقولى انها جايه من عندى انا بشكره

**بحار** · 10-09-2014 04:26 PM

المشاركة الأصلية كتبت بواسطة amz2011

الناس بتهرج و بتضحك بس فعلا لو حصل لحد فيكو الى انا بقوله مش هيعرف ينام
و العضو اللى داخل يقولى انها جايه من عندى انا بشكره

ياعم ماتقفش .. احنا بنهزر معاك .. لكن أنا مؤمن باللى بتقوله انه موجود .. وعندى قصص حصلت لاصحابى كمان .. وانا اسف لو كان تعليقى زعلك ماأقصدش والله .. شكرا لرحابة صدرك ..