مش متفق معاك ابدا حضرتك
واللي شاري عربية مرسيدس زيرو من ١٠ سنين زي ده يبقى ايه
عمري ماركبت ولا هركب زي المرسيدس
اللي مجربش العربيات الفارهة بس بيقول كده
بس لازم تعرف ان ألوف من المصريين راكبين بي ام و بنز
و الحياة جميله مش هبطلها عشان وحد خدشها !!!!
متفق مع معظم كلامك ا. هانى و رأيك :)
الموضوع محسوم ١٠٠٪ لصالح ال 508 اجمالا و لا مجال للقارنه مع الكورولا ... لكن موضوع المقارنه بالمرسيدس دى وسعت منكم شويه :)
و ازاى الصديق elenor بيفتقد قوه ال ٥٠٨ و موتور ال e280 قوه ٢٣٠ حصان و عزم ٢٧٠ نيوتن ؟؟؟ !!!
حضرتك لما جربت بنزين ٩٥ شعرت بال ١٥ حصان فرق ... تفتكر ال ٨٠ حصان فرق فى المرسيدس هوا يعنى ؟؟ :)
كما ان المرسيدس c180 الجديده ١٥٥ حصان و عزم ٢٥٠ نيوتن ... و طبعا موضوع البنزين ٩٥ و غشه ده مشكله ... لكن اعتقد ان شركه كبيره زى مرسيدس حيكون فيه علاج و حلول لكل المواضيع ديه ...
تقبل تحياتى ...
منورنا يا باشمهندس والله
انا عن نفسي رائيي الشخصي ان البيجو ٥٠٨ بديل جيد للمرسيدس يعني من الاخر التايواني بتاعتها تايواني مش الصيني ههههه يعني اللي نفسه يركب مرسيدس و السيوله مش قوي ممكن يركب ال ٥٠٨ و يبقى مرضي الى حد ما
انا بس كنت بفكر الاخ شيف براءيه القديم اللي كان فيه مبالغه و اللي دلوقت اتغير ١٨٠ درجه
و انا كنت بتكلم عن المرسيدس ال cla ال ١٢٠ حصان مش ال c
وبالنسبه للزميل elenor بعد ما ركب المرسيدس ال E280 قال بالنص ان العربيه عواجيزي شويه و مش حاضره تحت رجله زي البيجو و اعتقد في رائيي انه بيقتقد احساس التربو اللي بيخطفك او ما تلمس الدواسه و ده كان موجود برضه في الياسات TSI بصرف النظر عن اقصى قوه و اقصى عزم و ده جميل لو بتتسارع تحت من الثبات او السرعات البسيطه و انا عن نفسي طلعت من ال E300 في الرانج ده جوه منتجع النخيل بالتجمع الاول و كنا بنهدي كتير عشان المطبات الصناعيه (ده بجد ما وسعتش مني ههههه) و ممكن اخلي elenor يدخل يعمل مشاركه عشان يتكلم بنفسه يبقى الموضوع اوقع
تحياتي
ده بنورك ا. هانى ... كلك ذوق :)
متفق معك ان ال 508 من افضل البدائل المتاحه فى السوق المصرى للمرسيدس و البى ام ...
و انا عن نفسى حاجز السى الجديده و مستنى الاستلام .. و لو مشاكل البنزين ال ٩٥ و المواتير لم تحل .. ممكن جدا لو مش 316/320 f30 ... تبقى ال 508 هى البديل الاوروبى العملى جدا و خصوصا الفيس ليفت الجديده :)
بخصوص التحرك من الثبات اكيد مواتير التربو اسرع من ال raw ...لكن القوه و العزم حتبان فى التسارع مع الوقت ...
تقبل تحياتى ...
كلام موزون ومرتب ومايحتاج اى تعليق ؟ لكن انا بشوف ناس عينها على ال508 وهى ميزانيتها على اد الكورولا ويحتار بين الاتنين مع ان الفئتين مختلفين وممكن يحمل نفسه فوق طاقته ويشترى ال508 بس هو فى حيرة ؟ عينه عن الامكانيات والشكل ؟ وعين تانيه على الاعتماديه ومصروف البنزين ؟ اولا واخيراا طبعاا كل الاحترام لكلام حضرتك مقنع وانا مقتنع به تمام تمام تمام ؟ ودايما هافضل اقولها البيجو 508 تحديداا احلى واجمل واشيك واوسع من المرسيدس زات نفس الفئه لا لا عن تجربه ااقدر اقول كاخامات بيجو 508 احلى من هوندا اكورد فى خامات الصالون ؟ الشكل الاكورد يكسب ؟ افخم واروع من الكامرى ؟ لكن فرق السرعات والبهدله الاعتماد الكامرى يكسب ؟ 508 موديل 2015 اللى هو هاينزل مصر اواخر 2015 يتفوق عن الاتنين من كل النواحى الا عزم المواتير ؟ وبالمناسبه ؟ صاحبى اللى عنده الكورولا الجديده رفض يبادل معايا ورجع فى كلامه ؟ لا ان اخواننا السعودين هنا لايقبلون على سيارات بيجو الا القليل جدا منهم للاسف اعاده البيع لجميع موديلات بيجو والسيارات الاوربيه تحديداا بتنزل اكتر من نصف تمنها فاشكلى ادبست فيها ؟ والجمارك للاسف مش هاتقل عن 90 الف ولسه فيس لفت كمان نازل جديد ؟ ربنا يستر بقى ؟ وليكن مايكون ؟ مرة تانيه انا شاكر لمجهود حضرتك ؟ ولو عاوز اى كماليات للبيجو اللى معاك اجيبهالك ؟ معايا وعلى احدث صيحات ومش كلام بس لما ابقى نازل ؟ وشكراا جزيلا يا استاذ هانى
ياسيدى المرسيدس سيارة جميله وحلوة ماقلتش حاجه بس لما تقارن البيجو 508 بمرسيدس سى 180 البيجو يكسب من ناحيه قطع غيار وصيانه ووسع الصالون حتى الموتور البيجو 163 ومرسيدس 155 ده اولا لا انها كانت معايا وعن نفسى ماعجبتنيش من ناحيه الوسع الداخلى والسفر وللعلم خلاف ذلك فى السعوديه خصيصاا تكلفه صيانتها غاليه جداا عند الجفالى اللى هو وكيلها ووغير اللى فى مصر هنا اقل فئه 1800 و2000 سى سى وتقفيل امانى مش مصرى واوبشن غير مصر اللى حلو فيها بس النجمه والشكل اما داخليااماحستش انها مرسيدس مقارنه بمرسيدس clk,ولو حضرتك بتتكلم عن السيارات الفارهه فعلا مش هاقولك بورش بانيمرا ولا اودى a7الحمد لله ركبنا سيارات فارهه كتيييييير المهم انت محتاج ايه وينفعك اي وصيانتها ايه بس ده كل اللى فى الموضوع
ياباشا انا موجود هنا فى السعوديه وبفكر اشترى البيجو بس بصراحه كلامكم حيرنى:majd(4): ياريت تفيدنى وتقولى هيا تتكلف جمارك كام لو حبيت انزلها وهل تنصحونى بيها ولا لا وكم سعرها بمصر
حيرة ايه يا باشا و الاستطلاع اللي في اول الصفحه البيجو واخده اصوات ٣ اضعاف الكورولا
و بعدين العربيه في السعوديه كماليتها وهم و مش موجوده في النسخه المصري
اتكل على الله العربيه فعلا اكتر من سقف توقعاتك
الاصوات اللي راحت للكورولا عشان عايزين حاجه عمليه توفي بالغرض و مش باصيين للقوه و الفخامه و بالمناسبه انا بامتلك العربيتين و فعلا انا باستعمل الكورولا للحاجات السريعه
امبارح كنت بالكورولا و معايا بنتي الصغيره اللي ولا ليها في العربيات قالت لي بالنص انا يا بابا ببقى مش مطمئنه في الكورولا زي البيجو و ده رغم اني البيجو اقوى من الكورولا
المهم سئلتها ليه قالت لي اصل بحس البيجو ثابته في الارض
تكييف زي الفل انا عمري ما عليته عن ٢٢ لما كانت درجة الحراره ٤٤ عندنا
التوكيل متوسط مش وحش و مش قوي الفكره ان العربيه محدش بيشتكي منها
بتتباع هنا الكامله في التوكيل ب ٢٩٩ الف مفيهاش اي درايف ولا حساسات النقط العاميه ولا حساسات ركن امامي ولا نظام الصوت جي بي ال و سمعت ان الخليجي اللي بتقول ماما و بابا ممكن توصل ل ٣٨٠ الف
البنزين شغال كويس بال ٩٢بدون مشاكل ولا تسقيف و السحب بيه ممتاز
و احنا عاملين بالمناسبه رابطه لملاك العربيه على الفيس و فيه ناس عدوا ال ٧٠ الف بال ٩٢ و العربيه بحالة الزيرو
بس للامانه ال ٩٥ هيخليها انعم و عن تجربه