الشتا بالنسبة لك ايه؟

**MoToRiZeR** · 24-10-2008 07:54 PM

الشتا بالنسبة لي هو الفصل اللي بحس فيه إن البلد كلها بتاعتي .. الناس كلها بردانة و قاعدة في البيت .. الشارع الساعة 10 بيفضي .. أنزل انا بقي :) و يا سلام لو الدنيا مطرت سواء ماشي علي رجلي أو سايق و مشغل أغنية بحبها .. و انا و صحابي بردانين بس رايقين من الجو و البراح :) ريحة الجو بعد المطرة .. التمشية في حتة فيها زرع ساعة مطرة (ريحة الزرع + مطرة = روعة !) .. وقفة الشارع جنب العربية و إحنا بنشرب حاجة سخنة عشان البرد من أول الهوت شوكليت لحد حمص الشام .. لعب الكورة في الشتا ! الحمد لله إن فيه صيف عشان الشتا يوحشني كدة .

**OlaOsman** · 24-10-2008 08:19 PM

المشاركة الأصلية كتبت بواسطة SAbuhashem

شوارع مضلمه كلها طين ومياه سوداء

كل شويه في المغسله اغسل العربية وفي طابور عربيات طويل

خناقات مع أي واحد يجي يركب معايا العربية علشان لازم أخليه يلمع جزمته من فوق وتحت قبل ما يركب ولو حقعد ساعة مستنيه :)

Thanks
Eng.Sherif Shaker

بس كده؟ هو ده الشتا بالنسبة لك؟

**OlaOsman** · 24-10-2008 08:26 PM

المشاركة الأصلية كتبت بواسطة MedoMurcilago

*الشتا من اجمل فصول السنة اللي بحبها :biggrinjester:

انا بأه اكتشتف النهاردة بس و انا باكتب الموضوع ده اني باحب الشتا أوي كده :biggrinjester:

*وبحب جدا لما انزل الصبح وافضل اطلع دخان ببؤي

ياااااااه ببقا عامل زي الاطفال :D:D:D

و انا كمان بانبسط اوي من الدخان ده و كمان الدخان اللي بيطلع من كباية الشاي السخنة.. بافضل اتأمل كتير في تشكيلات الدخان و باحس بنشوة غير طبيعية :)

*بفتكر سفرياتي لتركيا وسوريا سافرتهم ف الشتا وكانو تح

ححححفة تحفة تحفة :k18:

برضه من الحاجات اللي نفسي أعملها.. اني أسافر في منطقة ساحرة في الشتا.. أي مكان أشوف فيه الطبيعة في روعتها و جمالها.

ربنا يرضا علينا كلنا ويغفر لينا وميحرمناش من عطفه وكرمه ونعه الكتيرة علينا

اللهم آمين يا رب العالمين.

**OlaOsman** · 24-10-2008 08:37 PM

المشاركة الأصلية كتبت بواسطة m000dy

بتقولى هاتفتقدى ال 15 دقيقه مشى على الكورنيش عشان جبتى العربيه
طب لو معاكى عربيه جديده هاتستمتعى اكتر بتقفيلها وانك تشغلى الكاسيت على اغنيه هاديه انتى بتحبيها وتكونى لوحدك فى العربيه
ودى حاجه الواحد بيفتقدها فى الصيف
الخصوصيه فى العربيه
تسمعى اللى على مزاجك
وتحسى اللى عاوزه تحسيه
وتفكرى بذهن صافى
بس ده باستثناء السفر بالليل

يمكن انا لسه مش بالاقي متعة في قيادة العربية أساسا، عشان كده حاسة ان المشي على الكورنيش الساعة 7 و نص الصبح هايكون له متعة خاصة.. خصوصا اني بامشي و وشي للنيل، باحس بالراحة و صفاء النفسي اوي لما باشوف النيل ع الصبح.. انما مع العربية فأنا وشي في وش المراية و الطريق و زملاؤه.

**OlaOsman** · 24-10-2008 08:38 PM

المشاركة الأصلية كتبت بواسطة aif

الشتا ....
نوم بدري الساعة 10 بالكتيييير
صحيان بدري .... قبل الفجر
كلفته بالعباية الصوف وانا رايح اصلي
مشي بعد الفجر في النادي ........
عالم تاني ..... الزرع مختلف ....
الهواء مختلف .....
الناس مختلفة ......
الشوارع مختلفة .......
رائحة المطر في الهواء دي لوحدها بتسحرني ......
واجمل حاجة النوم تحت اللحاف في عز التلج
......
.....
فليسقط الصيف والحر

..... يا رب الدنيا تبقي شتا علطول

تصور بأه ان حتى اللي مش بيحب الشتا ممكن يحبه من وصفك ده؟ :k52:

**OlaOsman** · 24-10-2008 08:40 PM

المشاركة الأصلية كتبت بواسطة Mohammed_Adel_Amin

حقيقة الموضوع أكثر من رائع .. ولأول مرة أحس بمشاركة إحساس جميل مع الناس بالطريقة دهية ..
لك مني جزيل الشكر على الموضوع والتعليقات

أنا اللي باشكركم و الله على الدفء اللي الواحد حس بيه في الموضوع ده مع دخول الشتا كده :)

**OlaOsman** · 24-10-2008 08:41 PM

المشاركة الأصلية كتبت بواسطة MoToRiZeR

الشتا بالنسبة لي هو الفصل اللي بحس فيه إن البلد كلها بتاعتي .. الناس كلها بردانة و قاعدة في البيت .. الشارع الساعة 10 بيفضي .. أنزل انا بقي :) و يا سلام لو الدنيا مطرت سواء ماشي علي رجلي أو سايق و مشغل أغنية بحبها .. و انا و صحابي بردانين بس رايقين من الجو و البراح :) ريحة الجو بعد المطرة .. التمشية في حتة فيها زرع ساعة مطرة (ريحة الزرع + مطرة = روعة !) .. وقفة الشارع جنب العربية و إحنا بنشرب حاجة سخنة عشان البرد من أول الهوت شوكليت لحد حمص الشام .. لعب الكورة في الشتا ! الحمد لله إن فيه صيف عشان الشتا يوحشني كدة .

يعيش الشتا يا.. يعيش.. يا.. يعيش.. يا يعيش يعيش يعييييييييييييش :err:

**MTAK** · 24-10-2008 08:48 PM

فى الشتاء
الفسح تقل
الزيارات تقل
الخروج يقل

بالقارنة بالصيف
و مع ذلك كلنا نحب الشتاء
هل نحن منزوون بطبعنا و نحب الاستكانة المستكينه
مش عارف

انا بحب الشتاء اكثر بمراحل
لاسباب كثيرة
بس اول مرة ييجى فى بالى هذا الخاطر

**SHNORY** · 24-10-2008 09:47 PM

طبعا الشتا ده من اجمل الفصول اللي في السنه لان في الصيف بروح من وسط البلد لميامي في ساعتين انما ف الشتا بتبقي في 10 دقايق علشان مفيش مصيفين
جميل فيه الدفا بعد التكتكه جميله فيه شوارع الاسكندريه وهي مغسوله الشجر ونضافته
وعواميد النور وهي بتلمع علي الاسفلت طبعا كل ده علي الكورنيش
والاجمل من كل ده البطاطا المشويه علي كوبري استانلي الفجر طبعا البطاطا ملهاش اي طعم وتحس انك بتاكل كوتشي مشوي بس الموقف كله بيكون جميل الكوبري فاضي والبحر والرذاذ بتاع المطر ودفا البطاطا وتحس ان البلد ملكك
طبعا موضوع التكتكه ده بيفرق من شخص للتاني علشان فيه ناس طبيعه اجسامهم مش بتستحمل البرد ودي حاجه مش عيب دي خلقه ربنا بس برضه الشتا مهما كان برد ممكن تلبس اطنان من الهدوم وتتدفي بعكس الفصل القاسي اللي اسمه الصيف وترابه وشمسه
الحارقه وزحمه الشوارع والعيال اللي بتجري بالمايوهات وسط العربيات وحلل المحشي والبطيخ وما الي ذلك من مظاهر المصيف في الشواطئ المجانيه وحتي ريحه الجو بتبقي مش حلوه
وحتي قبل ما يكون عندي عربيه برضه كنت بحب انزل اتمشي في الشتا وتحت المطر مهما كانت شدته ووالناس تقولي الدنيا بتمطر ارد عليهم واقول يعني هي بتمطر رصاص دي شويه ميه
والبحر والمنتزه والعجمي وكافيهات الكورنيش وحتي اي مكان ملهوش طعم عندي غير في الشتا
وطبعا اجمل زكريات كانت في الشتا
ومن اصول نزعه النقص والتنكيل بسواقين التاكسي انك ممكن تحسس علي شعرك وانت واقف تلاقي 20 تاكسي وقف
انما في الصيف لو رميت نفسك تحت العجل او فضلت تشاور لحد ما يجيلك شد عضلي محدش فيهم حيعبرك بنظره
ولو فضلت اكتب حقول كتير في حق الشتا وجماله وانتهاز فرصه انك تلاقي شعاع شمس تقف فيه تتدفي او تجري تستخبي تحت بلكونه من المطر (بس اختار بلكونه عدله علشان متقعش عليك )
بس بجد بجد بجد انا بحمد ربنا علي نعمه الشتا وانا فعلا مش بخرج في الصيف غير للضروره القصوي وقبل ما اجيب عربيه مكنتش بخرج من اساسه غير قليل اوي
وبقول لكل الناس اللي عايشين في مدن زحمه اسكندريه عندنا ومحدش زينا هههههههههههههههههههههه
ميرسي للاخت علا انها بتحيي جوانا حاجات الواحد كتير اوي بننساها او بنعملها ومش بناخد بالنا من قيمتها

-

الموضوع: الشتا بالنسبة لك ايه؟

LinkBack

أدوات الموضوع

عرض

-

-

-

المواضيع المتشابهه

جواكت جلد للبيع جديدة بمناسبة الشتا

جواكت جلد للبيع جديدة بمناسبة الشتا

هل الماتور الخفيف مش بينقص زيت فى الشتا

سيارة تسير على الماء هى دى اللى تنفع فى الشتا فى مصر!

بخاخات الزجاج علشان الشتا

الكلمات الدلالية لهذا الموضوع

المفضلات

المفضلات

ضوابط المشاركة