الموضوع: حصريا: فعلا غرقت في شبر ميه ...لك الله يا مصر...بالصور

انا امبارح نزلت من البيت حوالي الساعة 3 العصر كانت لسه مامطرتش أخدت طريق السويس كالعادة و أول ماعديت كوبري الطريق الدائري السما اتفتحت و الارض اتشبعت مياه

المهم وصلت اخر شارع الثورة علشان ادخل صلاح سالم لاقيت الشارع واقف فتأكدت ان نفق العروبة غرق و قدامهم لحد بكرة علي مايسحبوا المياه منه , فلفيت اليوتيرن اللي في اخر الثورة و رجعت عن طريق الميرغني - الخليفة المامون - العباسية - احمد سعيد

المهم و انا راجع كانت حوالي الساعة 8 مساء و لاقيت لسه صلاح سالم واقف فدخلت من جنب دار الاسلحة و الذخيرة علي الاوتوستراد اللي كان برضه واقف لحد نادي السكة بسبب المياه

طبعا دخلت اول شمال علشان أهرب من العك ده و اطلع علي الدائري من محور الشهيد و فعلا عملت كده ووصلت لحد كارفور و لفيت من النفق و اخدت الاتجاه التاني و رجعت علي الرحاب

بصراحة كانت لفة محترمة ضيعت فيها حوالي ساعة و نص بس احسن من الوقفة

احنا كان عندنا مطر فى الوجه البحرى لكن مش بالشكل ده

بس شاطرين يقولوا لولا ***** ماكانتش مصر عدت الازمه الماليه

امال اللى احنا فيه ده من ازمات يبقى ايه ؟

الناس دى عايشه فى كوكب تانى خالص

حسبنا الله ونعم الوكيل وربنا ينتقم منهم

لان اللى بيحصلوه من المخالفات المروريه وحده كفيل باصلاح كل طرق وشوارع مصر

لكن للاسف كل الفوس دى بتروح بطونهم

المشاركة الأصلية كتبت بواسطة OlaOsman

طيب انا عايزة أفهم حاجة.. هو الشتا كل سنة بييجي فجأة؟ يعني بيعمل للحكومة كمين و بييجي كل سنة؟ و لا المفروض ان معاده معروف و ان الخريف ممكن الدنيا تمطر؟ طيب لما احنا عارفين ان فيه خريف و شتا جايين ليه ما نستعدش من قبلها و نعمل فتحات تشفط المية و لا اي تصرف من ده؟ هو كل سنة نفس الغرقة و الحوسة؟ لأ و كل سنة كمان أسوأ من اللي قبلها عشان عدد العربيات في الشوارع بيزيد و الموضوع بدأ يبقى كارثي :k20:

الشتاء مش بييجي فجأه ولا حاجه، بس الفكره إن البلاعات بتاعت الأمطار دية مش مجرد فتحه في الأسفلت مكتوب عليها بلاعة تصريف الأمطار زي اللي الحكومه عملتها من كام سنه.

اللي أنا أعرفه إن عشان نعمل بلاعات تصريف سليمه يبقى لازم نصمم الطريق نفسه بميل معين بحيث إن لما الميه تنزل تتدحرج ناحية البلاعات.

إنما اللي حصل هو إنهم حطوا بلاعات في أي حته وخلاص وكتبوا عليها بلاعات تصريف الأمطار، على أساس إن الأمطار بتعرف تقرأ وهاتنزل في البلاعه لوحدها.

والشئ المضحك إن بعض البلاعات دية (إن ما كانتش كلها) مش واصله أصلاً على نظام الصرف الصحي، يعني هي مجرد بتصرف على حفره ولما الحفره تتملي الميه بتطلع تاني.

وطالما الموضوع عاوز تخطيط ووجع دماغ كبير وطالما إن الدنيا عندنا بتمطر قليل، يبقى ليه نعمل بلاعات مظبوطه؟ نستحمل العطله والكام حادثه اللي هايحصلوا وخلاص :k49:

المشاركة الأصلية كتبت بواسطة OlaOsman

و الله تعليقك فطسني من الضحك :D :D :D

طيب امال بتوع الاسكندرية بيعملوا ايييييييييييييييييه؟ الطرق عندهم فعلا مصممة بطريقة مائلة؟ يعني دول أصلا عندهم مطر طول السنة و بيبقى ساعات سيول.. أكيد مش بيغرفوا في شبر مية زينا.. و لا ايه؟

إسكندريه فيها شوارع كتير جداً بتغرق في شبر ميه برضه، والمناطق اللي مش بتغرق بتلاقي الشوارع فيها متخططه ومعموله صح.

يا جماعه بجد، المفروض كلنا نجيب لادا نيفا، دية فعلاً عربيه ملائمه للبيئه المصريه. وممكن نبعت للادا نقولهم إعملولنا فيها بس فتيس أوتوماتيك وإحنا مش هانشتري غيرها.