الموضوع: هو ليه ا لجواز بقي بيعه و شروه كده

ازيكم يا احلي شباب الواحد مخنوق من موقف و عايز يفضفض معاكم
كنت كتب كده مش شهرين عن موضوع الجواز و البحث عن العروسه
http://www.nilemotors.net/Nile/436485-a.html
و كمان عملت موضوع بطلب فيه النصيحه ازاي ادور علي عروسه بطريقه تانيه غير جواز الصالونات
http://www.nilemotors.net/Nile/437502-a.html
المهم النهارده لما رجعت من الشغل لقيت الحاجه بتقولي ان في واحده من معارفها قالتها ان هي كان عندها عروستين دكاتره و انها قالت ليهم عني و مرضوش لأن شافوا ان شقتي اللي هما مشفوهاش اصلا مش هتناسبهم علشان هي في عماره قديمه مش عماره جديده مع انها شقه تمليك و علشان هي اوضتين بس
الغريب ان الناس دي لا شافتني و لا اتكلمت معايا و لا شافت شقتي و اعترضوا انهم يشوفني اصلا علشان العماره قديمه
و ان هما ناس مسترييحن ماديا و مبسوطين و مش عارف ايه و ابوهم استاذ في الجامعه و امهم مش عارف ايه
حسيت ان الموضوع بيعه و شروه و ان هو هتدفع كام و هتسكن فين حتي من قبل ما نشوف البني ادم
حسيت معلش اني رأيح اشقط واحده من الشارع و عايز تطمن اني هدفعها كويس و يجي بقي شكلي و شخصيتي بعدين
الغريبه ان والدتي اتخانقت معايا و قالتي انت حوشت شويه فلوس كمان المفروض تغير الشقه بقي و تبيعها و تجيب واحده تانيه اوسع في عماره جديده
قولتلها اصلا الشقه عمرها ما وقفت في طريق جوازي و انت عارفه ان ال 12 عروسه اللي شفناهم الموضوع مكملش من ايام المقابلات و مدخلناش بيوتهم و لا اتفقنا علي حاجه يعني الرفض كان من الرؤيه و كده
قالتلي ما شوفت اهه الناس مش عايزه تشوفك علشان العماره قديمه
انا مش عارف اول ايه و اعمل ايه
اعمل زي ما امي عايزه و ابيع الشقه اللي هي مش مشكله اصلا
و لا رأيي انا صح ان دي ناس طماعه و عايزه تبيع بنتها للي يدفع اكثر