انا متشكر جدا على استضافتكم ليا... بس واضح ان المنهج اساسا صعب... كل دى اسئلة يا جدعان؟؟
في البداية استاذ محمد ممكن تعرفنا بنفسك اكتر
انا اسمى محمد ممدوح بيومى مواليد مارس 1978 حاصل على بكالوريوس تجارة و متزوج و عندى يوسف
مين عرفك على المنتدى ؟
اللى عرفنى بالمنتدى كان سبعاوى ايام ما كنا سوا على كونتاكت
استاذ محمد بنظرة سريعه على ملفك الشخصي لقيت ان مشاركاتك على الاجتماعي نادرة ممكن نعرف ليه مقاطع الاجتماعي
انا اساسا الاجتماعيات عندى ضعيفة جدا... يعنى دى ملاحظة عامة من كل الناس اللى تعرفنى مش انتم بس... حتى فى الزيارات العائلية و خلافة ببقى دايما ساكت و متكلمش كتير لدرجة ان فى ناس بتفتكر انى مش مبسوط من القعدة معاهم مثلا بس دة مش صحيح... انا انسان قليل الكلام بطبيعتى و احب دايما اسمع اكتر ما اتكلم
اما بالنسبة لنايل موتورز فا انا بعتبرة مصدر ليا لمعلومات السيارات و بالتالى الشق الاجتماعى فى نايل موتورز مش من اهتماماتى (اجابة غير دبلوماسية زى ما طلبتم)
ايه اكثر قسم بتحبه في نايل موتورز وليه ؟ واكتر قسم بتكرهه و ليه
اكتر قسم بحبة هو قسم الدايو... بحس ان معايا اصدقاء بيشاركونى نفس التجارب و بنتبادل خبرات من تجارب و مواقف سابقة... يعنى بحس انه المكان الافضل عشان افيد و استفيد
اكتر قسم بكرهة هو الاجتماعى ( و معاه الاخبار المنقولة) لان ببساطة 99% من المشاكل بين الناس و المواضيع الجدلية بتبقى مرتبطة بالقسمين دول للاسف... معرفش ليه دة بيحصل... هل لاننا نفتقد ثقافة الحوار و تبادل وجهات النظر... مش عارف... المهم ان فيه حاجة غلط بتسبب المشاكل دى و انا بصراحة مبحبش المشاكل ولا احب اكون طرف فيها لا من قريب ولا من بعيد
يضاف لكدة انى دخلت المنتدى عشان السيارات فقط و بالتالى المواضيع اللى برة العربيات متهمنيش
صحيح ديما في مقابلات لاعضاء نايل موتورز واكيد اتعرفت على عدد كبير لكن اكيد في اعضاء لسه متعرفتش عليهم
ممكن تقولنا 3 اسماء لاعضاء تتمنى تتعرف عليهم شخصيا
انا معرفش (و معتقدش) انهم بيحضروا مقابلات المنتدى بس انا عايز اتعرف عليهم فعلا
flyingpeugeot
Mohamed_SlvrLan99
ENG\AHMED (AKA NoNaMe)
وبالنسبة للاعضاء اللي اتعرفت عليهم قولنا 3 اسماء كنت سعيد فعلا بمعرفتك بيهم
مينفعش اقول اسماء 3 بس لان الناس اللى سعدت بمعرفتها كتير سواء اتعرفت عليهم فى المقابلات او خارج المقابلات... بجد دة مش رد دبلوماسى بس فعلا مينفعش اختار 3 فقط من وسط ناس كتير اوى
مع ملاحظة ان الردود الدبلوماسية مرفوضه ولازم تقول اسماء
نايل متورز بيشغل كام في المية من اهتماماتك الحياتية اليومية
مش عارف النسبة كام بس هى كبيرة... و احيانا بتسبب مشاكل فى الشغل و البيت
لو لا قدر الله تم حظرك عن دخول المنتدى هتعمل ايه وايه شعورك وقتها
اكيد حبقى زعلان... و من ناحية حعمل ايه فا مش عارف لانى عمرى ما فكرت فى الموقف دة
ممكن توجه كلمة لكل ممن يأتي
ادارة نايل متورز - كريم منير - سبعاوي
ادارة نايل موتورز:
keep up the good work
كريم منير
سعدت جدا بمعرفتك و احييك على المجهود اللى عاملة فى المنتدى
سبعاوى
شقيقى و حبيبى... من زمان ملقتش حد بيحب العربيات كدة و فاهم اوى كدة و كتاباتة فنية اوى كدة
كنت متابع لحلقاتنا السابقه من حوار من القلب للقلب ولا لأ ؟؟ لو ايون .. مين الضيف اللي كنت معجب بحلقته اكتر واحد
للاسف مكنتش متابع... و اتخضيت اصلا لما لقيت الموضوع معدى 150 صفحة
فاصل صغير وسنعود بأذن الله اكرهك لانك مزقتي شرايين قلبي بجمودك
اكرهك لانك ملكتي قلبي ولم استطع انتزاعه منك
وخطفتي بصري ولم اعد ارى سواك
اكرهك لانك تركتيني وحيداً
بعد أن وهبت قلبي اليك
فاصبح مجنونا بك
واصبحت اراك في يقظتي واحلامي
وشعرت بحلاوة ايامي
ياترى ممكن الانسان يحب ويكره نفس الشخص في نفس الوقت؟؟
مينفعش انسان يحس احساسين متضاربين فى نفس الوقت
انت بتهرب لاحلام اليقظة علشان تعيش حلم مش قادر تعيشه في الواقع؟؟
بيحصل كتير
ممكن تتغاضى عن عيوب في شخصية محبوبتك لان الحب اعمى؟
مفيش انسان كامل... و لو كل اللى بنبص عليه هو عيوب غيرنا حتبقى الحياه سودة... مع الاخذ فى الاعتبار اننا برضة عندنا عيوب زى باقى الناس
لو بنت عاكستك في الشارع او الموبايل ردة فعلك ايه نفسيا وعمليا؟؟
الاجابة تعتمد هل مراتى معايا ولا لا
الموضوع حصل بالفعل بس انا بنفض للقصص دى... لان فى الاخر انا عارف ان الموضوع غلط من الاول و مهما حاولت اخفية او حطة فى صورة مقبولة اجتماعيا حيفضل بردة غلط... يبقى ليه ابذل مجهود و اضيع وقت فى حاجة مش حتجيب الا المشاكل؟؟؟
كنت مراهق عاقل ولا متهور؟
نسبيا مقارنة باصدقائى كنت عاقل بس احيانا بتبقى فيه فلتات بتبقى تهور من الاخر
لو اعجبت ببنت بتصرح لها بمشاعرك ولا بتفضل الاحتفاظ بمشاعرك لنفسك؟؟ كنت الاول بحتفظ بالموضوع لنفسى و مكنش بينوبنى غير وجع القلب فا قررت انى اصرح بالموضوع لان مفيش جدوى من كبت المشاعر
لكل انسان ذكريات معينة يتمنى نسيانها .. ياترى سيادتك تتمنى تنسى ايه؟؟
الحادثة اللى عملتها
ايه كتر حاجة بتحس انك مخنوق منها؟؟
الهمجية و الهرجة و الفهلوة اللى فى البلد
ياترى سيادتك ممكن تطلع اسرارك الشخصية جدا لحد ولا بتحب تحتفظ بيها لنفسك .. ولو بتحب تطلعها لحد مين هو ؟؟؟
تعتمد على طبيعة السر... و فيه حاجات مينفعش تطلع لحد... لكن بشكل عام لو فيه حاجة حتطلع لحد فا بتطلع لاقر اقرب الاصدقاء فقط
جات عليك اوقات كنت تبكي وتضحك في نفس الوقت؟؟
مينفعش تحس بمشاعر عكس بعض فى نفس الوقت
اوصف لنا نفسك بذكر 5 صفات حميدة و3 صفات سيئة
طيب
خدوم
ذكى
منظم
امين
عصبى
حاد
متسرع
بقول كفاية كدة واسيب فرصة لباقي الاعضاء [/QUOTE]
هو لسة فى تانى
MMamdouh
المفضلات