الموضوع: حوار من القلب للقلب - الجزء الأول

المشاركة الأصلية كتبت بواسطة نور القمر

علا في البداية ممكن تعرفينا بنفسك اكتر
علا عثمان، متخرجة من كلية الآداب قسم اللغة الانجليزية سنة 1997و من ساعة ما اتخرجت بسنة تقريبا و لحد دلوقتي و انا باشتغل في شركة توظيف و مبسوطة بيها الحمد لله. في آخر إسبوع في السنة ان شاء الله هاتم ال 34 عاما.. آنسة مع سبق الإصرار و الترصد
من خلال تواجدي بالمنتدى فهمت ان ليكي نشاطات كتير في العمل الخيري ما شاء الله عليكي
في البداية ممكن تعرفينا ازاي بدأتي اول ممارساتك للعمل الخير او الاسباب اللي دفعتك للقيام بهذه الاعمال
مافيش يا بنتي، انا جيت كده قرب سن ال30 و لقيت الرقم خضني.. ماخضنيش عشان هاتم ال30 و لسه ما اتجوزتش، انما اللي خضني ان ياااااااه.. 30 سنة عدت من عمرك يا علا؟ عملتي فيهم ايه؟ أفدتي الناس بإيه؟ سبتي أثر شكله ايه؟ و يا ترى العمر فيه كام 30 سنة؟ و يا ترى بعد 30 سنة كمان و لما يكون عندك 60 سنة هاتكوني قادرة تعملي حاجة؟ و لا هتلاقي العمر عدى و انتي صفر ع الشمال و كل اللي عملتيه في حياتك هو الشكوى من حال الناس و تدهور الأخلاقيات و السلبية و السلوكيات و إلخ إلخ إلخ.. كل الأسئلة دي كمان زادت من خضتي و بدأت أدور على إجابات ليها.. فضلت محتارة شوية كده لحد ما قررت اني أعمل ال HR diploma في ال AUC عشان أحسن من مستواي المهني، و لما بدأت لقيت انه مطلوب مني على آخر الدبلومة اني أعمل مشروع تخرج و اعمل له Presentation قدام لجنة تحكيم. طبعا ده كان بالنسبة لي فيلم رعب عشان انا عمري ما حاولت أقدم حاجة قدام الناس و لا باحب الأضواء تتسلط علية و لا حد يبص لي أصلا و لا يراقب تصرفاتي، فكانت أزمة حملت همها من بدري بالرغم من ان كان فاضل عليها حوالي 9 أشهر. انما الحمد لله شهر 9 سنة 2004 جالي إيميل بيقول ان فيه فريق تنمية بشرية بيدي كورسات مجانا و هايبدا بكورس اسمه Presentation Skills انا طبعا قلت هووووووووه ده اللي انا عايزاه بالظبط و قدمت فيه و سبحان الله اختاروني لحضور الكورس و فعلا حضرته و ده كان أول خطوة لية في العالم الرائع اللي اسمه العمل التطوعي. يومها شفت شباب ما شاء الله ناجح جدا في شغله و ماسكين أماكن كويسة في شركات كبيرة و بيدي من وقته الويك إند كله، جمعة و سبت و بمنتهى الإخلاص و الإتقان جاي يعلمني انا ازاي أقدم نفسي و أفكاري بطريقة فعالة. بصراحة انبهرت بيهم و اتمنيت من ربنا اني أقدر اعمل حاجة زي الناس دي، خصوصا اني لقيتهم أصغر مني على الأقل ب4 سنين فزعلت من نفسي أوي اني وصلت للسن ده و لسه ماعملتش حاجة للناس اللي انا منهم و عايشين معايا في بلد واحدة و ماحلتيش بس غير النقد ليهم. المهم عشان ما أطولش عليكوا.. قولوا لي طولي
سبحان الله لقيت نفسي باتجر جر لسكة الخير و العمل التطوعي، و ربنا بييسر لي حضور كورس ورا التاني مع الناس دي لحد ما قرروا انهم يكونوا فريق للبنات و يشاء الله اني أكون انا التيم ليدر بتاع الفريق ده و لا زلت :)

النقطة اللي باعتبرها نقطة تحول في حياتي هي كانت يوم 24 ديسمبر في نفس السنة اللي هي 2004. وقتها كنت حاضرة محاضرة إدارة الوقت مع نفس التيم و كانوا مستضيفين د. محمد عمر رئيس فريق زدني حاليا. أياما كان زدني مش لسه اسمهم كده و كانوا لسه بيقولوا يا هادي. اليوم ده كان تاني يوم عيد ميلادي، و كنت لسه تامة ال30 سنة و 500 سؤال بيدورا في راسي زي ما قلت لكوا من شوية، عايزة اعمل حاجة بس مش عارفة اعمل ايه و ازاي - ساعتها كان لسه فكرة فريق البنات دي ما اتطرحتش. يومها د. محمد الله يكرمه كان بيحاول يرسخ في أذهانا قيمة الوقت و ده كان بيرمي عندي على قيمة العمر و سبحان الله و انا الخواطر دي بتدور في دماغي لقيته فجأة بيقول: حد هنا كان عيد ميلاده امبارح، مين؟ قلت له انا.. قال لي خدي بالك برضه من قيمة إدارة العمر مش الوقت بس. طبعا هو طلع ما شاء الله عليه مذاكر السيفيهات اللي كانت مبعوتة ع الميل عشان الاشتراك في الكورس و من ضمنه السي في بتاعتي و خد باله من ان الانسانة دي عيد ميلادها اليومين دول و حب ينبهني لحاجة زي دي. و يومها كان أول احتكاك لية بزدني و ربنا فتح لي طريق معاهم برضه مستمر الحمد لله لحد النهاردة و مع الناس دي.. لقيت نفسي :)

حالينا برضه انا مشتركة مع جمعية خيرية تنموية اسمها روح و بنحاول نعمل تنمية في المجتمع و نساعدهم على انهم يعيشوا حياتهم بشكل كويس و ينتموا للمجتمع اللي همه عايشين فيه.
تقدري تقولي لنا العمل الخيري اضاف ايه لشخصية علا
علا انتي كنتي اجتماعية بطبعك ولا اكتسبتي هذه الصفه بمرور الوقت
العمل الخيري هو اللي عملني، من الآخر كده. يمكن انا من النوع اللي ممكن أسيب أثر في الناس أكتر من وراء أسوار و حجب، يعني و انا قدام شاشة كمبيوتر و تحت صوابعي كيبورد باعرف اتكلم كويس و أأثر في الناس، انما في الحقيقة اللي يشوفني يلاقيني حد أقل من العادي في التواصل و التفاعل، خصوصا لو في مجموعة ممكن أصلا أكون العنصر الغائب الحاضر. انما العمل التطوعي إداني ثقة بالنفس ما كانتش عندي قبل كده، شغلي كتيم ليدر كمان خلاني أبقى مسئولة أكتر في قراراتي و اتحكم في انفعالاتي عشان انا ليدر و التيم بتاعي هايمشي ورايا فماينفعش أكون الشخصية الانفعالية اللي كنتها. العمل التطوعي كمان خلاني احتك بصفة مستمرة بناس بيدوني امل في الحياة و في انصلاح الأحوال في يوم من الأيام و انه عمره ما هاينصلح بحد غيرنا، يعني اليأس قل كتير من حياتي الحمد لله و بقيت اكثر تفاؤلا و لله الحمد و المنة.
علا عندها طموحات معينه لم تحققها الى الان
أيوه طبعا، مادام لسه الواحد عايش عمر ما الطموحات و الأحلام ما هاتنتهي. يمكن الطموحات بيقصد بيها الشق المهني أكتر ده اللي هاتكلم عنه. طموحي اللي لسه ما اتحققش لحد دلوقتي هو اي يبقى لي البزنس الخاص بية، انما بإذن الله يتحقق، ربك قادر على كل شئ :)
قريت لك موضوع فكرته غريبه لكن جميل فعلا اسمه درج ذكرياتي
ياترى انتي كنتي محتفظة بهذه الاشياء للذكرى ام لعدم وجود وقت كافي لتنظيم درجك
لو كان الموضوع عدم وجود وقت كافي ما كنتش قررت أرجع بعض الأغراض فيه تاني و ما ارميهاش :)
بتحبي الموسقى .. طيب زي ايه ......
باحب الموسيقى طبعا و سميعة قديمة كمان، خصوصا الأغاني العربية الكلاسيكية بتاعة الجيل القديم. طبعا مش باحب الشخصيات نفسها، يعني أم كلثوم لية رأي فيها و في فنها كمان، و عبد الحليم كمان و عبد الوهاب، بس باسمع بعض أغانيهم و انسجم معاها و أعيش في عالم آخر مع اللحن الجميل، انما برضه في بعض أغاني ليهم لما باسمعها في الراديو باقفل الراديو لحد ما تخلص، يعني تحسيني في الحتة دي متطرفة شوية. و ممكن كمان أسمع قديم اوي، يعني طقاطيق و موشحات و انسجم معاهم. فيه أغنية بتاعة عبد الوهاب باحب اسمعها أوي اسمها أحب اشوفك كل يوم يرتاح فؤادي.. دي من أيام الآلات النحاسية و الكورس ورا عبد الوهاب صوتهم متحف لوحده، بس الأغنية فيها موسيقى حلوة اوي و عبد الوهاب مبدع فيها بصوته، أول مرة كنت اعرف انه عنده الإمكانيات الصوتية الهائلة دي من الأغنية دي. على فكرة هي دي الأغنية اللي فيها المقطع الشهر بتاع رأيت خياله في المنام محلاه يا وعدي.. تراتراتم

باسمع برضه بعض أغاني محرم فؤاد و محمد رشدي و فايزة احمد و وردة و العزبي و كل الناس.. كل الناس بجد، و ليه رأي في كل مطرب من دول و باسمع برضه الحديث نسبيا زي منير طبعا و محمد فؤاد و عمرو دياب و هاني شاكر و جميع أغاني حقبة التسعينات حافظاها كلها تقريبا.. و باسمع برضه حكيم و حسن الأسمر و انسجم أوي مع مواويله، انما حاليا نادرا ما تلاقيني أدور على أغنية لحد من الجداد اوي غير أصالة و أنغام، مع اني ممكن اسمع نانسي عجرم عشان حاسها حد مركز في شغله و عايزة تغني مش تستعرض نفسها و خلاص. مش باقول لك باسمع كل الناس

اما بالنسبة للموسيقى فطبعا عمر خيرت بالنسبة للعربي و باعشق الموسيقى الكلاسيك الغربي و باسمع مقطوعة من السيمفونية التاسعة لبيتهوفن باستمرار. اما الأغاني الغربي فبطلت من التسعينات مش عارفة ليه و لو قلتكوا الأسماء اللي كنت باسمع لهم أياما هاتضحكوا علية، اصل الناس دي ما بقتش بتغني خلاص

فاصل و نواصل

المشاركة الأصلية كتبت بواسطة نور القمر

بتحبي الشعر.. طيب ممكن بيت شعر بيأثر فيكي كل ما تقرأيه
متهيألي اني باحب الشغر المغنى أكتر من المقروء، يعني ممكن ما يجليش صبر اوي أقرا قصيدة شعرية، بالرغم من اني اكتر مادة كنت باحبها في دراستي في الكلية كانت الشعر. اما بيت الشعر اللي باحسه أوي و باحس انه حقيقي اويه هو جزء من قصيدة مغناه مش عارفة مين الشاعر بس بتقول: إذا الإيمان ضاع فلا أمان، و لا دنيا لمن لم يحيى دينه.

ممكن ترتبي الاتي على حسب اولويته
العمل
النشاط الخيري
صلة الرحم
الاصدقاء
منتدى نايل موتورز
سيارتك
صلة الرحم (و اللي اقصده بيها هو أسرتي ماما و أخويا و أختي و ولادها)
العمل
الأصدقاء و النشاط الخيري
نايل موتورز و سيارتي مع بعض

علا هل تهتمين بالموضه المناسبة لكي في ملابسك .. ام تميلين للملابس العملية المريحة
عمر ما الموضة كانت من اهتماماتي، بحاول ألبس بس اللي يليق عليه و يتناسب مع الحجاب الشرعي و طبعا نفسي ألبس كل لبسي كاجوال و كوتشي.. ياااااااااه باحس اني منطلقة بشكل و انا لابسة الكوتشي.. انما طبعا ليس كل ما يتمناه المرء يدركه، طبيعة شغلي بتفرض علية اللبس الفورمال في معظم الأوقات.
علا مر عليكي موقف حسيتي انك عايزة تضربي اللي قدامك
بالتأكيد حصل، بس مش حاضرني دلوقتي موقف معين، بس باحس ده كتير لما بالاقي حد بيبلطج أو بيحاول ياخد حق مش حقه، باحس اني عايزة أضرب البني آدم ده بجد.
دموعك قريبة ؟؟ طيب ايه اصعب موقف مر عليكي خلاكي بكيتي بشدة؟؟
دموعي قريبة أوي و باتأثر بسرعة في المواقف المؤثرة، ممكن حتى كمان ألاقي دموعي نزلت قدام مشهد مؤثر متقن في فيلم او مسلسل. دموع الفرحة عندي كمان أقرب كتير من دموع الحزن على فكرة. مرة بكيت بشدة في موقف كنت مظلومة فيه و ظهرت براءتي، في اللحظة اللي ظهرت برائتي فيها لقيت نفسي بابكي بحرقة.

علا اتفضلي ميلك شيك في الفاصل حتى نستكمل حوارنا







انتي عرفتي منين اني باحب الميلك شيك يا نور؟

و نرجع تاني نستأنف الحوار :)

اهلا بكم من جديد مع ضيفتنا الجميلة علا عثمان
أهلا و سهلا بيكي يا أحلى نور

يسمعني حين يراقصـــنـي كـــلمات ليسـت كالـكلمــات
يأخذني من تحت ذراعــي يزرعني في إحدى الغيمات
والمطر الأسود في عينــي يتساقــــــط زخات زخــات
يحملني معه يحـــــــملنـــي لمــســاء وردي الشـرفات
وأنا كالطـفـــلة في يديـــــه كالــريشة تحملها النسمات
يهديني شمسا يهديني صيفا وقطيع السنــونـــــــــوات
يخــبرنـي أنـــي تحـفتـــه وأســـاوي آلاف الـنجــمات
وبأني كنز وبــــأني أجمل مــا شـــاهـــد مــن لوحــات
يروي أشياء تدوخـــني تنسيني المرقص والخطوات
كلمات تقلب تاريخـــي تجعلني امــرأة في لحظات
يبني لي قـصراً من وهم لا أسكــن فــيه ســـوى لحظات
وأعـــــــود لطــاولـتـي لاشــيء معــي إلا كلــمــــــات
كلمات ليسـت كــالـــكلمات لاشــيء معــي إلا كلـمـــــــات


ابيات من اجمل ما كتب نزار قباني وغنتها الرائعه ماجدة الرومي

في البداية ممكن اعرف ايه رأيك في الابيات السابقه
باحب الأغنية دي أوي و بتفكرني اوي بأيام الكلية لما كنا بنعمل الحفلة السنوية بتاعة قسم إنجليزي، سمعتها من طالبة غنتها ع المسرح باحساس جميل اوي و من ساعتها و انا كل مرة باسمعها بتاخدني لبعيييييييييييييد.

هل علا ممكن تتأثر بكلمات الغزل والمدح وتعيش في احلام يقظة زي بطلة الشعر السابق ؟؟
طول ماهي مجرد كلمات فلا تعني لي شئ.. اما لو تحولت إلى أفعال فهي تعني لي الكثير

ايه رأيك الرجاله فعلا بتوع كلام معسول ومفيش افعال؟؟
نفس الإجابة السابقة :)

انتي مع او ضد الصداقة بين الرجل والمرأة؟؟
الصداقة بمفهومها الشامل صعب تتحقق بين رجل و امرأة.. صدقيتي الأنتيم عارفة عني كل حاجة تقريبا.. ممكن أكلمها في انصاص الليالي أشكي لها همي او اطلب منها تشاركني مشكلة عندي.. ممكن توحشني اكلمها اقول لها انزلي دلوقتي عايزة اشوفك او أعدي عليها في البيت أقعد معاها شوية لما توحشني مثلا.. كل ده صعب يتحقق إذا كان الطرف الآخر من نوع مختلف. بس برضه في نفس الوقت بتجمعني علاقات فيها الكثير من التفاهم و القرب و الثقة المتبادلة مع بعض معارفي المقربين من الجنس الآخر.. علاقات عارفة حدودها كويس و لا تشوبها شائبة.

ايه الاسباب اللي ممكن تموت الحب بين رجل وامرأه؟
مافيش حاجة اسمها حب بيموت.. يبقى ماكانش حب بأه، كان تهيؤات، اي حاجة يعني.

هل الحب ممكن يتحول لكراهية؟؟
نفس الإجابة السابقة.

ايهما تفضل علا .. رجل محب رومانسي مهذب ناضج فكريا فقير ام رجل عملي مهذب حريص على استمرار حياته مع شريكته جاف المعاملة مركزه مرموق ميسور الحال
ده على فرض ان مافيش حد ممكن يجمع بين الحنية و الدفء و في نفس الوقت طموح و ناجح في حياته؟ طبعا النموذجين غير محببين بالنسبة لي.

علا بتتصرفي ازاي لو اتعاكستي وانتي سايقه
لسه ما حصلش، انما لو حصل دلوقتي و انا لسه باتحسس خطواتي في السواقة بالتأكيد هاتلبخ و هابقى عايزة أنزل أضربه عشان ما يلبخنيش و انا سايقة :k28:

.. وانتي ماشية في الشارع .. في الموبايل
في الشارع مش باعمل حاجة، بامشي في حالي و خلاص و اللي بيعاكس بيفهم ان السكة مسدودة. اما في الموبايل فبازعق و اقول بحزم ما تتصلش في الرقم ده تاني، و لو اتصل تاني بادي الموبايل لحد راجل يكون معايا في الوقت ده، لو في البيت لاخويا و لو في الشغل لحد من زمايلي و همه بيقوموا بالواجب :k28:

علا لو اتعينتي وزيرة للشئون الاجتماعيه هاتعملي ايه ؟؟
هي وزيرة الشئون الاجتماعية دي بتعمل ايه أصلا؟

لو رخصك اتسحبت منك ممكن تلجأي للواسطة؟؟
لسه ما جربتش حاجة زي دي الحمد لله :)

تتمني تعيش في بلد غير مصر؟؟ وهي ايه؟؟
ما أقدرش احدد عشان عمري ما خطيت برة مصر، يمكن فعلا اعرف لما اسافر في حتة.. أي حتة :o

ممكن تتوسطي لشخص في شغل معين وانتي عارفه انه كدة اخد مكان شخص تاني كان يستحقها اكتر؟؟
عمرها ما حصلت و لا هاتحصل ان شاء الله :)

ايه رأيك في احوال المصريين المغتربين في دول الخليج؟؟
باحس ان السفر للعمل في الخليج ده فخ بيقع فيه المصريين، بيقضوا زهرة شبابهم في بلد مش بلدهم، بيتعودوا عليها و يتعودوا على الحياة السهلة في الغربة، مش بيفوقوا إلا لما يلاقوا أول ولادهم لازم يدخل جامعة في مصر، و ساعتها تبدأ حسبة برمة، مين ينزل مع الولد أو البنت و لا نسيبه لوحده؟ لأ يقعد في المدينة الجامعية، و لا يقعد مع جدته احسن، طيب امه تنزل مصر تقعد معاه، طيب و اخواته؟ ماهم برضه من حقهم ياخدوا ثانوية عامة سهلة شوية مش معقدة زي اللي في مصر، و ينتهي الحال على أي حاجة.. كل الحلول بتبقى في الحالة دي أسوأ الحلول و حتى لو فكر رب الأسرة يرجع مصر بعد غياب 20 سنة، هايرجع يشتغل ايه و فين و بكام؟ طيب يعمل مشروع، يعني البلد حالها كده، مشروع ايه ده اللي هاينجح فيها؟ و هكذا دوامة لا تنتهي.. و كل شئ له ثمن.

ايه رأيك في الشباب اللي بيحاول يهاجر لاوربا هجرة غير شرعيه؟؟.. تنصحيهم بأيه ؟؟..
ساعات بالتمس لهم العذر.. مافيش أمل بالنسبة لهم في مستقبل احسن.. و ساعات باحس انهم المفروض يصبروا عن كده شوية و ما يستعجلوش. الصراحة محتارة في أمرهم و اتعلمت اني ما احكمش على حد في موقف انا مش فيه.

وفي رأيك ممكن الدولة تقدم لهم ايه علشان ما يفكروش بالهجرة؟؟
حياة آدمية :o

تعتقدي مصر ممكن تصبح دولة متقدمة في خلال 20 سنه جاية؟؟
لأ.. ممكن تبدأ تنهض بداية طفيفة من أول 50 او 70 سنة من النهاردة.

لو الحكومة طالبت اهالي القاهرة الكبرى بالانتقال للمدن الجديدة النائية واعطتهم حرية الاختيار بين البقاء والانتقال .. هتختاري ايه؟؟
أنقل فووووووووووورا

علا لو عايزة تتسوقي.. نفس البضاعه موجودة في محل صغير يملكه فرد وموجودة في مول كبير زي هايبر او كارفور
هتشتريها منين؟؟
باحب أروح الهايبر عشان ألاقي كل احتياجاتي في مكان واحد، اما المحل الصغير فصعب ألاقي فيه كل حاجة محتاجاها، انما ممكن الاقي احتياجات على أد يومي أو اسبوعي، يعني كل واحد فيهم بيؤدي وظيفة مختلفة.

هييييييييييه.. أسئلة نور خلصت

المشاركة الأصلية كتبت بواسطة MoDyBeNz2008

الاسئلة
1- ايه اكتر حاجة بتكرهيها في المجتمع
السلبية و ال"أنا".

2- مفيش حد فينا مفيهوش عيوب علان كدة ايه اكتر عادة بتتضايقي منها في نفسك و هل بتحاولي تغيريها و لا لأة
أكتر حاجة بتستفذني فية هي الاستسهال.. اختيار أسهل الطرق للوصول للي انا عايزاه.. بحاول في أحيان أقول لنفسي لأ في حاجات كتير من دي، و احيان تانية باحب اريح نفسي

3- لو اتعاكستي في الشارع بيكون رد فعلك ايه
راجع ردي على سؤال مماثل لنور :)

4- لو مش هتعيشي في مصر تحبي تسافري فين (دول)
برضه راجع ردي على سؤال مماثل لنور :)

5- لو مش هتعيشي في القاهرة هتعيشي فين (محافظات)
استنجرية طبعا.. باحبهاااااااااااااااااااا

و لسة هفكر كمان

فكر يا سيدي.. هي الأسئلة عليها فلوس؟

المشاركة الأصلية كتبت بواسطة aif

كول دي كوبايت شيكوليطة ...... ياااااه
ده مش قر لا سمح الله .:K13:... ده نق وحسد بس ....:k35:
ح تشربيها لوحيد يا علا .......
بالهنا والشفا
ح الف لفة كدة واحضر تلاتين اربعين سؤال وارجع ( ابتسامة شريرة جدا )

يا ساتر يا رب.. كل ده شر في البشر؟

ربنا يسترررررررررررر

المشاركة الأصلية كتبت بواسطة mohamed_kta

السلام عليكم

عندى للأخت علا ثلاثة أسئلة :

1 - ما هى أقرب لحظة لكى مع الله و ماذا تقولين ؟

2 - شخصيتين عامتين مصرية و عالمية تحترميهم جداً ؟

3 - أفضل نصيحة وجهت أليكى و تحبى أن تقوليها لنا ؟

1- أقرب لحظة لما اتأمل بديع صنع الله في الطبيعة او في مخلوقاته، ساعتها مش بالاقي على لساني غير سبحان الله و الحمد لله انه اختارني عشان يوريني الجمال ده و يمتع عيني بيه :)

2- شخصية عامة مصرية: الأستاذ عبد الوهاب مطاوع الله يرحمه.. قريت كل كتبه تقريبا.. أثرت فية كتاباته اوي، و بكتاباته طبعا مش باقصد بريد الجمعة و مشكلات الحياة، انا باقصد عبد مطاوع لما يكتب.. أتعلمت منه الكثير الصراحة و بادعو له بالرحمة و المغفرة و الجنة زي ما بادعو لوالدي بالظبط رحمه الله.
شخصية عالمية احترمتها فعلا: كيفن كوستنر لما أنتج و مثل و أخرج فيلم الراقص مع الذئاب.. مواطن أمريكي بيعرف الأمريكان و العالم كله الناس دول أصلهم ايه و بيضحد كل اللي ملوا بيه دماغ العالم في أفلام الغرب الأمريكي من تمجيد الرجل الأبيض المتحضر و التحقير من شأن الهنود الحمر بوصفهم همج و ناس بدائية. بيفرق معايا اوي البني آدم لما ييجي يغير مفاهيم كانت بالأمس مقدسات و مسلمات.

3 - أفضل نصيحة: لو عايز فعلا تتغير ما تفضلش تعمل نفس اللي بتعمله هو هو و تتوقع نتيجة مختلفة.. لازم تغير من نفسك الأول و هتلاقي الدنيا من حواليك بتتغير للي انت عايزه.

المشاركة الأصلية كتبت بواسطة Chicco

متابع إن شاء الله ... بس مش في صمت ;)

أنا عارف يا علا باشا إن علشان فشقة بيك يا رمضان ما سألتنيش ....أنا بقى ما أعرفش رمضان

في انتظار ردودك حاحضر روح مارد اسئلة جديد من نفس الفصيلة اللي تعاملت مع موتو باشا

طيب انت الناس استفردت بيك و هرتك أسئلة و جربت احساس اللمونة المعصورة.. عايني أجرب نفس الإحساس ده لييييييييييييه؟

ماشي يا هشام.. في انتظار عودتك و الأمر لله.