بتعرفي تطبخي ايه ؟؟ الحاجه الي تتحدي بيها اي حد ؟؟
طيب هو السؤال ده إجباري؟ انا عايزة بس أطلب تغيير السؤال
أصلي..
أصلي..
أصلي..
احم احم.. أصلي مبعرفش أطبخ :o
ماليش أوي في حكاية الطبيخ دي، مش حاباها يعني، و مافيش وقت أتعلم الطبيخ عشان بارجع من الشغل ع الساعة 6 ألاقي ماما طبعا طبخت الأكل و طبعا مش هاقضي يومين الأجازة الأسبوعية بتوعي في المطبخ عشان مش غاوياه و مش مضطرة. كل العوامل دي أدت إلى إني مش باقف في المطبخ غير لما أغسل المواعين أو أعمل شاي لية او لحد. أحياانا لما تكون ماما مش موجودة بتوضب هي الأكل و اعمل انا الرز.. ماما بتقول اني نفسي في الأكل حلو (لما اتعلمت شوية حاجات و طبخت أيام الكلية) و بتقول اني لو ركزت هابقى شاطرة في الطبيخ، انما الموضوع تحسه كده عقدة بشنيطة و حاجة عارفة اني هاضطرلها في يوم من الأيام و لما يحصل هحتاس.. عارفة و مش باعمل حاجة و عارفة ان ده غلط.. بس الموضوع عايز مني مجهود كبير و مجاهدة نفس مش طبيعية.. انا باتكلم جد على فكرة
أكلتك المفضلة ايه ومن مين ؟؟
انا باحب البطاطس المحمرة اوي.. باكلها باستمتاع غير طبيعي.. انما لما أكون داخلة في مود ريحيم مش باقرب لها. طبعا أحلى بطاطس هي اللي بحمرها بإيدي او اللي ماما بتعملها، أصل ماما ضد أي حاجة فيها دهون أو كوليسترول، فبتعملها بطريقة فيها أقل ضرر يمكن على الصحة او الوزن. مركزة ماما دي و الله
واكلتك التيك اواى المفضلة منين ؟؟
باحب بتيزا تيبستي.. مخدومة كده و بواقي الأكل اللي عليها (على رأي ونيس) بتبقى كميتها كويسة :)
مطعمك المفضل ؟؟
كورتيجانو
كافيهك المفضل ؟؟
سيلانترو
السوبر ماركت المفضل؟؟
مش بتعامل غير مع مترو و الهواري، طبعا الهواري أحسن بكتير، مع ان بضاعته مش بمستوى مترو، انما الستاف هناك بيشتغلوا بجدية اكتر. اما بالنسبة للهايبر ماركتس فمارحتش غير كارفور فمش عارفة أقارنه بحاجة تانية عشان أحكم عليه.
المول المفضل ؟؟
أركاديا أقرب حاجة لية، أقل من 10 دقايق بالعربية، كنت فيه امبارح، انما حرمت أروحه تاني يوم جمعة، غالبا أصحاب المحلات بيكونوا هناك فالبائعة من دول تفضل لازقة في قفايا و انا باتفرج و انا باكككككككككككككككره الحركة دي فرجعت من هناك مش مبسوطة
جنينة مول لا يزال أريحهم بالنسبة لي، مع انه يعتبر من أقدمهم، انما باعرف اجيب منه الحاجة اللي انا عايزاها. اما سيتي ستارز فلسه لحد دلوقتي مارحتوش بهدف الشوبنج فمش قادرة احكم عليه.
مين سألك ومكنتيش متوقعه يسألك
الأسماء اللي سألت و كان سؤالهم أول احتكاك بيني و بينهم في موضوع في المتندى
ومين نفسك يسألك ومسألش ؟؟؟؟
انا كنت عارفة ان فيه ناس كتيرة مش هايلحقوا يسألوا عشان انا مختارة يومين الويك إند اللي فيهم الفلو ع الموقع مش بيبقى زي الأيام العادية
اكتر موضوع شد انتباهك في الآونة الاخيرة هنا ؟؟
هو الموضوع ده بذات نفسه :)
لما علا بتكون مبسوطة بتدندن إيه ؟؟
هواياتي صغيرة.. و اهتماماتي صغيرة (ماجدة الرومي)
عندك كام سي دي او شريط في العربية وايه هم؟؟؟
همه سيديهايتين يوتام (أيتام يعني): جزء تبارك لمشاري راشد العفاسي و سي دي لحفلة فيروز في باريس على مسرح الأوليمبيا.
بتعحطي معطر في العربي؟؟ نوعه ؟؟
مش باحط.. مستمتعة بريحة العربية و هي جديدة، الفرش يعني و كده، لما تروح بأه أبقى أحط معطر
كفاية كده عشان شكلي هضرب :) او هتدعي عليا
قوللي بأه ايه احساسك و انت ماسك حد بتسألة 500 سؤال زي دول؟ :k44:
بسم الله ما شاء الله يا علا باشا ... اجاباتك الرائعة حطتني في موقف لا يحسد عليه .... نفسي أسألك اسئله تانية للمزيد من الأجابات الرائعة و في نفس الوقت مش عايز اتقل عليكي ... أقولك خيرك سابق برضه ... رمضان حيتابع في انسجام :)
متابع باستمتاع....و من غير اسئلة....و بلاش زعيمة...عشان ماتزعليش خليها سيدة المنتدى الأولى..زى ما مستر موتوريزر قال( اذا ما خانتنيش الذاكرة)...ربنا يعينك ع فعل الخير و تحققى اللى نفسك فيه.
يشرفني متابعتك يا شهاب و جزاك الله خيرا على الدعاء :)
لو ما كانش اسمك علا عثمان ..... كنتي تختاري لنفسك اسم ايه .... اسم ثنائي
فرط الرمان
ده سؤال ده يا أحمد؟ طيب اسأل نفسك كده نفسي السؤال و ابقى قول لي هاتجاوب تقول ايه
وسؤال تاني .... والدتك بتعمل البطاطس المقلية من غير دهون وكوليسترول ازاااااي ؟؟؟
هي لو احتاجت تقلل شوية منهم بتسلق البطاطس الأول و بعدين تحمرها في زيت و بعد ما تطلعها بتنشفها كويس اوي بمناديل المطبخ عشان ما تكونش شاربة زيت. و لما تبقى مش عايزة تشم ريحة زيت في حاجة بتسلقها و بعدين تحطها في الفرن و بتطلع و الله مقرمشة و لذيذة برضه.
انتي ما فكرتيش تعملي عمره او تحجي يا علا ......
فكرت طبعا بس لسه ربك ما أرادش :)
ادعي لي ربنا يرزقني بعمرة أو حجة.
حلقة جميلة كالعادة وإختيار موفق من نــور القمر لضيفة برنامجها ويارب يا نـــور تـزودى الحلقات النسائية لإن الرجالة هنا إتهرو بأمانة وللأسف ملحقتش الحلقة بس الأعضاء هنا قاموا بالواجب وزيادة وبجد الأنسه عـــلا حلقتها واقعية ومن القلب فعلا , وده كان المنتظر من إنسانة ناضجة زيها . وربنا يباركلك متابع بإنسجـــام
ده سؤال ده يا أحمد؟ طيب اسأل نفسك كده نفسي السؤال و ابقى قول لي هاتجاوب تقول ايه
طيب انا اعمل ايه يا علا .... ما انا علي ما فسحت العيال شوية رجعت لقيتهم خلصو كل الاسئلة اللي ممكن اسألها ....وانا بقى لازم اسألك اي سؤال ولو من باب اثبات التواجد
انا كنت اسمي نفسي : حمزة محمد عبد الرؤف القاضي ادعي لي ربنا يرزقني بعمرة أو حجة. ربنا يكتبهالك قريب ان شاء الله
.... لكن فعلا اسم فرط الرمان ده ظريف اوي ....فرط الرمان عثمان ... اسم سينيمائي
يظن الناس بي خيرا وإني ... لأشقى الناس إن لم ترض عني ومالي حيــلة إلا رجــائي ... وعفوك إن عفوت وحسن ظني محاسب / احمد ابراهيم
المفضلات